Паламын Сүндэв, Дашбалбарын Базарсад гээд баавартай генералууд байв даа. Элдэггүй сэлэм, элэгддэггүй дөш шиг эрс байв. Базарсад нь УИХ-ын гишүүн хийж элбэг явсан, Сүндэв Элчин сайдын албанд зүтгэж ханагар явсан. Одооны генералууд ч дээ, эдний хажууд “ямаа шүдлэн” аятай.
Батлан хамгаалахын сайдын үүргийг эдүгээ Гүрсэдийн Сайханбаяр гүйцэтгэж байна. Улаанбаатарын унага. Дэслэгч генерал. Албан тушаал, цол дэвийн гудмаар саадгүй давшиж яваа. Засгаас засгийн танхимд шилжиж сайд хийгээд л. Урамтай. Саунд сууж энхрийшсэн, салхинд явж нүүр холцруутаагүй, ер нь бол Батлангийн хүмүүсийн царайнаас өөр маягийн царайтай л хүн яваад байгаа. Сайн андын буян их юм даа. Буян байж болно оо, бололгүй яахав. Буяныг даана гэдэг, албандаа тэнцэнэ гэдэг чинь л буяндаа тэнцэх эсэхийн шалгуур.
Гүрсэдийн Сайханбаяр гүйцээж элдсэн сур шиг, гүрмэл хар генерал шиг ажиллахгүй байгаа юу гэвэл, энэ салбарыг мэдэх хэн ч хэлнэ. Тийм эрхэм нот байж чадахгүй байна аа гээд. Хотод өссөн, мэдээлэлд ойр торнисных уу, юутай ч улс төрийнхөө хор хошооныг бол гадарлаад, доторлоод байдаг болохоор алба ахиад яваад байдаг шиг байна.
Салбарынхан нь яриад л, бичээд л байх юм. Яамны сайд, төрийн нарийн хоёр генерал эрх ашгийн зөрчил ихтэй ээ, элдэв юм дуулдаад л байна гээд барим тавим яриад байх. Барилга нэлээд барьсан бололтой юм. Салбарынхандаа. Бас ардын армийн цэргүүд барилга зам барихад их оролцох болтой юм.
Гэхдээ энэ барилгууд, дэд бүтцийн ажлууд дунд эрхэм сайд, төрийн нарийн хоёр генералын эрх ашиг, захиалга заавал ордог гэдэг яриа батлан хамгаалахынханы дотор байнга сонсогдох юм. Баригдсан байр болгонд эрх ашгийн хүмүүстээ, өөртөө наах боломжийг олгодогоо гэж ярих. Энэ үнэн үү? Үүнд Г.Сайханбаяр, Д.Ганхуяг нар хариулах хэрэгтэй.
Авлигатай тэмцэх газрынхан ч гэсэн энэ асуудлаар нэг шинжилгээ, сорилыг эрхтэнүүдэд тавих нь буруугүй. Г.Сайханбаяр генерал барилга тойрч явахаар хилээ тойрч явсан нь дээр дээ. Одоо, хаврын тарчиг цагт хилчид, хил дээр асуудал гарамтгай байдаг. /Цэрэг арми дах хүчирхийлэлээс болж гарсан гэмт хэргийн талаарх мэдээллийг та энд дарж уншина уу/
Байлдагчийн эрх үүрэг байрандаа байна уу, дарга эрхтэн нь дарамталж байна уу гээд хилээрээ яваад хийх ажил мундахгүй. Алтай суманд гэхэд хоёр цэрэг даргаа хөнөөсөн нь, дарга цэргийн дэг журмаас хэтийдсэн харилцаа байснаас л үүдсэн асуудал байсан.
Батлангийн Сайдыг Ц.Цолмон, Н.Энхболд гээд яг салбарын биш улбан сайдууд их хийсэн. Г.Сайханбаяр салбараас төрсөн генерал, сайд нь үнэн юм бол энэ салбартаа Засгийн газрын гишүүдээс цолгортол ажил үйлс хийгээч ээ. Байгаа байхгүй нь мэдэгдэхгүй л хүн байна шүү дээ.
Эрхэм сайд Архангай ойр ойрхон явамтгай болсон сурагтай. Өмнөх сонгуулиар Архангайн гурван гишүүн соёолон морьд шиг биднийгээ сонгоод өгөө гээд явцгаасан. Архангайнхан тэднийг хоёр ч удаа сонгоод өгсөн, түрүүч нь замын дундаасаа орхилоо, орхилоо ч гэж дээ орхихоос өөр аргагүйд хүрлээ, үлдсэнүүд өнөө маргаашгүй татуулчих гээд бөөн асуудал. Явуургүй. Архангайд суларсан УИХ-ын гишүүний тоонд Г.Сайханбаяр сайдтан ардын намаас очих гэж байгаа бол адаглаад нийлж бүдүүрсэн морь шиг, нэжгээд бус ажил хийж, хүний өмнөөс харахтайгаа очсон нь дээр болохоос, рапортод унадаг маршалын тоомсог шиг зүгээр л гоё ганган “амьтан” очоод хэрэггүй л болов уу. Гоё сайхан үг яриа, дуу шүлгэнд Архангайнхан хууртаж ханалаа.
Дэслэгч генерал гэдэг бол том цол. Армийнхандаа бол баавгай байх. Г.Сайханбаяр Засгийн танхимдаа баавгай байж чадахгүй байна, ажил үйлсээрээ. Батлангаас олон арван хүн ажлаас гарч байгаа юм билээ. Шалтгаан нь шударга бусаас үүтгэлтэй, цалин хангамж нь бага гэдэг тайлбартай. Энийг Г.Сайханбаяр сайд ултай бодох, эргэж харах хэрэгтэй.
Та өөрөө Налайхаас цааш явсан нь эргэлзээтэйгээр салбартаа ажилласан намтар харагдах. Хил манаж үзсэн эрс, тангараг өргөсөн эрс яагаад салбараасаа дөлж байна бодох хэрэг шүү. Сайд өөрөө дэслэгч генерал. Өмнөх сайдууд нь энгийн байсан юм билээ. Цол хэргэм нэмэгдэх тусам хариуцлага яригддаг. Үүнийг сайд тун болгооно бизээ.
Энэ салбар бүтээн байгуулагчийн ажлаас илүүтэй батлан хамгаалах салбар гэдгийг бодох. Сайд, дэслэгч генерал хүний даах зүйл их. Хэр дааж байгааг салбарынхан нь хариулаад өгнө. Дунд дүн тавихад ч бэрх гэх түгээмэл хандлага байна.
Г.Сайханбаяр та үүнийг сайн бод! Таны удирдсан салбарт урьд хожид байгаагүй яг ямар шинэчлэл хийгдлээ, танд хэлэх юу байна вэ, сайд аа, гэж асуухад Г.Сайханбаяр юу гэж хариулах сонин байна. Хэвлэл мэдээлэлд яриасай. Хэвлэл мэдээлэл ч энэ сайдын хувьд хол зүйл шиг билээ дээ. Ингэж дуугардаггүй нь, энэ агуулгаараа ээлж өнгөрөөсөн нэгэн шиг л харагддаг.
Б.БАЯР
Amlalt.mn
