Монгол Улсын Их Хурлын Сонгуулийн тухай хуульд нэмэлт, өөрчлөлт оруулах тухай хуулийн төслийг өнөөдөр /2023.04.05/ өргөн мэдүүллээ.
Хуулийн төслийн талаар Ажлын хэсгийн ахлагч, УИХ-ын гишүүн Н.Энхболд, УИХ дахь МАН-ын бүлгийн дарга Д.Тогтохсүрэн, УИХ-ын гишүүн Т.Доржханд нар мэдээлэл хийлээ.
Ажлын хэсгийн ахлагч, УИХ-ын гишүүн Н.Энхболд: УИХ-ын сонгуулийн тухай хуульд нэмэлт, өөрчлөлт оруулах тухай хуулийн төслийг өргөн барилаа. УИХ-ын даргын захирамжаар зургаан хүний бүрэлдэхүүнтэй ажлын хэсэг байгуулагдаад, өнөөдөр хуулийн төслөө өргөн барьж байна.
Хуулийн төсөлд сонгуулийг холимог тогтолцоогоор буюу 50 хувь нь жагсаалтаар, 50 хувь нь тойргоос сонгогдох зохицуулалт орсон. Сонгуульд оролцож байгаа иргэдийн санал гээгдэхгүй байх тал дээр энэ тогтолцоо давуу талтай. Иргэдийн саналын тал хувь нь гадаа үлдчихээд байна гэдэг шүүмжлэл байдаг. Зардал хэмнэх, мөнгөний нөлөөг зэрэг давуу талтай.
Мөн гадаадад сурч, ажиллаж байгаа иргэдийн оролцоог нэмэгдүүлэх үүднээс санал өгөх хугацааг нь нэмж, зохион байгуулалтыг илүү боловсронгуй болгох заалтууд оруулсан. Эмэгтэйчүүдийн хувь 30-аас доошгүй байна. Жагсаалтаар нам биш хүн дугуйлна. Олон хүний нэр бичих учраас саналын хуудас олон хуудастай болох байх.
Одоо парламентын бүтцийн байгууллагууд хэлэлцээд сонгууль болохоос жилийн өмнө Сонгуулийн тухай өөрчлөлт оруулсан байх ёстой. Энэ нь ирэх зургадугаар сарын 20-оос өмнө гэсэн үг.
