“Ер нь энэ бол танил технологи, нийгмийн анхаарлыг авлигын маш том хэргээс холдуулах гэсэн тактик шүү дээ. Шүүх дээр байгаа бүх хэргийн он, сар, өдрийг сурвалжлаач, та нар. Шилэн болгох хэрэгтэй. Тэгэхээр шүүх Д.Мөнх-Эрдэнэ, Д.Монголхүү нарт гаргасан бяраа жинхэнэ авлигачдад яаж гаргахыг нь харцгаахгүй юу”.
Энэ бол Ерөнхий сайд Лувсаннамсрайн Оюун-Эрдэнийн хэлсэн үг. Тэрбээр “E-Business” платформын нээлтэд оролцоод, төгсгөлд нь Д.Мөнх-Эрдэнийн шүүх хурлын тухайтад асуусан асуултад ингэж хариулж. Эл хариултаас маш тодорхой зүйлүүд ажиглагдаж байна. Шүүхээс эрх мэдэлтнүүдийг шүүж чаддаггүй. Жинхэнэ авлигачдад цээрлэл үзүүлж чаддаггүй. Жинхэнэ том том авлигын асуудалд хойш суудаг. Эрх ашиг ордог. Хашигнадаг. Тангаргаасаа няцдаг. Арагш налдаг. Ийм л байдал байгааг хэллээ.
Тийм ч учраас удаа дараа “Шүүхийг харж“ байна гэдэг үгийг хэлсэн. Ийм учраас, ингээд жинхэнэ хэргийг шүүдэггүй учраас л “Шүүхийг харж байна” гэдэг үгийг хэлсэн байна. Өчигдөр сэтгүүлч М.Батбилэг хэллээ. Олон нийтийн эрх ашгийн төлөө яваад ингээд шийтгэгддэг юм бол хэн олон нийтийн төлөө явах вэ гэж. Үнэн шүү дээ. Н.Өнөрцэцэг сэтгүүлч бас хэлсэн.
Эгдүү, игзаар үнэхээр хөдөлж байна. Нүүрсний, Хөгжлийн банкны өчнөөн идлэг уулгын хулгайчуудаа шийтгээгүй байж Д.Мөнх-Эрдэнэ нарыг ингэж шийтгэж байгаад үнэхээр гутарч байна гэж хэлсэн. Монголын байдал ийм л байна.
Лодонгийн Түдэв гуай эрт хэлсээн. Толгой дээр нь өтгөн шингэнээ асгаад байхад үг хэл, үзэл бодлоо хэлдэггүй байхын гутамшиг юунд хүргэх тухай маш тодорхой хэлсэн. Мөхөл л биз дээ. Нийгмийн шударга ёс хаана байна.
Эрх барьж байгаа намын дарга, Ерөнхий сайдын өчигдрийн үгээс л манай шүүх, прокурорын үнэн дүр төрх нэн тодорхой харагдаж байгаа юм. Жинхэнэ авлигачдадаа жинхэнэ бяраа гаргаач ээ гэж Ерөнхий сайд хэлж. Жинхэнэ бяраа шүүгчид жирийн иргэдэд гаргадаг гэдгийн логик маш тодорхой ойлгогдож байна.
Жинхэнэ авлигачдад шүүгчийн жинхэнэ бяр гардаггүй байна. Жинхэнэ ажилладаггүй байна. Үнэмлэхүй олон суудалтай, эрх баригч намын дарга ингэж хэлэхээс илүүгээр Монголынхоо шүүхийн үнэн байдлыг хэн хэлэх вэ. Шүүх засаглалыг оройд суугч Д.Ганзориг оо, Шүүхийн ерөнхий зөвлөлийнхөөн, бүх шатны шүүгч нар аа, та бүхэн улс орныг сүйрүүлж байгаа жинхэнэ авлигачдаа, жинхэнэ тонуулчдаа, эрх мэдэл албан тушаал, мэдээлэлд ойроороо дөчин их наядаар нь идээд уусан хулгайч дээрэмчдээ шийтгээч ээ, жинхэнэ бяраа харуулаач ээ.
Та бүхнийг жинхэнэ бяраа харуулахыг Ерөнхий сайд шаардаж байна. Та бүхэн бол эгэл арддаа жинхэнэ бяраа гаргаж, эрх баригч тонуулчин дээрэмчдэдээ жинхэнэ бяраа гаргадаггүй адгийн хүмүүс байна. Монгол эх орны хувь заяа, Монголын ард түмний хувь заяа шүүхийн дэнслэл дээр байгааг яагаад ухаардаггүй шударга үнэний тангарагтнууд вэ.
Халаглан харамсмаар. Та бүхэн Хөгжлийн банк, Тээвэр ложистикийн, Төмөр замын, сангуудын, албан тушаалын үй түмэн хэргүүдээ шийдээч ээ.
Ерөнхий сайд хэлсэн байна. Шүүх дээр байгаа бүх хэргийн он, сар, өдрийг сурвалжлаач, та нар. Энэ огноог бүх сэтгүүлч судалж бичээч, мэдээлээч. Хэрэг болгоны ард ямар завхрал нуугдаж байгааг илчлээч. Эх орныхоо, эгэл ард түмнийхээ төлөө.
Монголчууд өнөөдөр үнэндээ, хулгайч бас хулгайч бус гэдэг хоёр аангилалд л багтаж байна. Хулгайчид нь эрх мэдэлт, албан тушаалтнууд. Мэдээлэл, эрх мэдэлд хуяглагсад. Хулгайч бус нь эрх мэдэлгүй, жирийн ардууд. Боломжоо тонуулагсад. Ийм оршихуй байх ёсгүй. Ингэж амьдрах ёсгүй, Монголчууд.
Б.БАЯР
Amlalt.mn
