Хүрэлбаатарын Булгантуяа нэгэнтээ Миеэгомбын Энхболдод хандан “Энхбаяр даргадаа баярлалаа” гэж хэлж байв. Эндүүрч. Харин одоо эндүүрэлгүйгээр Л.Оюун-Эрдэнэ даргадаа баярлалаа гэж хэлэх нь зохист болов уу. Учир нь, түүнийг намын дарга нь Боомтын сайдаар томилоод төд удалгүй Хөдөлмөрийн сайдаар шилжүүлэн томилов.

Энэ томилгоог Д.Амарбаясгалан болон намын дарга хоёр шийдсэн бололтой юм. Намынхаа УИХ дахь эмэгтэй гишүүдийнхээ эсэргүүцэл, дургүйцлийг эс харгалзан Х.Булгантуяа дээрээ буужээ. Ингээд харвал наян оны дарга нар наян оныхоо эмэгтэйг илтэд дэмжин “эрхлүүлж” байгаа байдал илхэн. Сайхан хэрэг ээ, үе тэнгийнхээ нам толгойлж байгаа нөхдийнхөө итгэл үнэмшилд ийм бат байгаа нь. Энэ нэг л хэрэг.

Одоо Х.Булгантуяад жинхэнэ асуудлууд тулна даа. Эсэргүүцсэн хүүхнүүд тань эвтэй байж дэмжих эсэхийг өөрөөсөө, ажлаасаа эрэх хэрэгтэй байх. Нийгмийн даатгалын багц хуулийг батлуулахаас эхлээд ажил их байна гэж шинэ сайд мэдэгдэж. П.Анужин гишүүн, Хөдөлмөрийн яамны төрийн нарийн бичиг Г.Өнөрбаяр нар энэ хуулийг тун сайн банжсан.

Б.Пүрэвдорж гишүүн ч энэ талаар боломжийн ажиллачихсан байх. Үндсэндээ энэ хууль эдгээр хүний гараас эх баригдсан. Хуулиа батлуулалгүй яахав, гэхдээ Хөдөлмөрийн сайдын хувиар энэ хууль дээр хэрхэн “эх баригч” байсанд бодууштай нь ойлгомжтой.

Хөдөлмөрийн яамны сайдын суудал өнцөгдөөд удаж байгаа. Хэд хэдэн сайдыг ширвэчихлээ. Ээ дээ, Булгантуяа сайд минь, тун бэх суухгүй бол болохгүй шүү. Өмнөх сайд хүүхнүүд тань одоо болтол өш хонзон маягийн юм ярих нь өчигдөр гэхэд хэвлэлээр гараад л байх. Аюур нар нь асуудалтай хэцүү байсаар.

Хөдөлмөр, нийгмийн хамгааллын яам чухал яам, бодлогын яам гээд Б.Тулгыг алгасуулан, хэл амаас үл айн дарга нар тань томилсон болохоор Х.Булгантуяа сайд энэ суудлыг булган сүүлтэй болгохгүй бол өмнөхүүд нь “бохирдуу” суудал болоод удчихлаа.

Х.Булгантуяа сайд аа, яамныхаа ажлыг маш сайн судал аа. Намынхаа этиктэй, арга барилтай хэрхэн нийцэхээс эхлээд бод. Манай улсын халамж мундаагүй. Харин үйлдвэрлэл таг. Үйлчилгээ сайнгүй. Эрүүл мэнд, нийгмийн даатгал төгсгүй. Энэ чиглэлээс л шинээр ажиллах хэрэгтэй дээ. Халамжаар бус хөдөлмөрөөр амьдрахын зөвийг шинэ жишгээр эхлүүлээсэй. Хэнд халамж очих ёстой гэдгийг онож нарийвчлах нь дамжиггүй. Юуны учир даатгагддагийг ч утга төгөлдөр мөрдүүлээсэй.

Хэцүүдсэн салбар шүү. Х.Булгантуяа зүтгэлтэй байх, зүтгэлээ чин зүрхнээсээ гаргах учиртай санагдах. Нөгөө талаар намынхаа, ерөөс Монголын хүүхнүүдээс одоо бол албан тушаал, эрх мэдэлд ойроороо нэгэнт цолгорлоо. Эмэгтэйчүүд төрд, шийдвэр гаргахад илүү олон болгох нийгмийн давалгааг иргэний нийгмийн байгууллагууд тун сайн хийж, төр ч, намууд ивээж байна. Энэ учир эмэгтэй хүн илүү том, илүү ажиллаж чадахын үлгэрийг Х.Булгантуяагаас монголчууд харна, нэхнэ. Үүнд тэнцэх.

Нөгөөтэйгүүр хөгжлийн бэрхшээлтэй иргэдийн хөдөлмөр эрхлэлт, шийдвэр гаргах түвшний оролцоог шинэ сайд үнэмлэхүй өөрчлөөсэй. Эл асуудлыг хариуцсан агентлаг байдаг. Дарга нар нь нүүдлийн шувуу шиг л яваад байх. Дотроос нь сайн хүн тавиад энэ агентлагаа утга төгөлдөр ажиллуулаасай.

Хөдөлмөрийн яамны олон сайдын ороо бусгаа явдлаас үүдэн энэ салбар ширвэгдэж гүйцсэн. Шинэ сайд шинэ томилгоо хийлгүй, хуучин яамыг шинээр манлайлж ажиллаасай билээ. Хүрэлбаатарын Булгантуяад нам сайн хандаж байгааг ярилтгүй боллоо. Нэгээс дээш сонгогдсон хүнд сайдын суудал өгнө гэсэн нэг “юм” Ардын намд байдаг байх.

Түүнийгээ Х.Булгантуяа дээр барьсангүй. Ингээд олон талаас нь харвал Х.Булгантуяад алдах эрх алга. Яамаа, УИХ-аа, Тө өө, намаа гээд мөн ч олон элэг сэтгэл түүнд хэрэгтэй болно. Дэд сайд байхдаа ажил ихийн, чармайн зүтгэж байснаас үүдээ биз дээ, төрийн ордны арын цэцэрлэгт Х.Булгантуяа нярай хүүхдээ ажлын завсраараа хөхүүлж суугаа зураг байдаг.

Одоо Хүрэлбаатарын Булгантуяа сайдыг тийм элбэрүү, нинж төрх үйл, сэтгэлээр ихийг бүтээхийг Монголын ард түмэн ажиглаж эхэллээ дээ.

З.БАЯР