Хууль зүйн сайдуудаас Хууль зүйн сайд шиг ажиллаж байгаа нь Хишгээгийн Нямбаатар гэхэд хилсгүй болов. Таван Ш-ийн ажиллагаагаас эхлээд түүний ажил мундахгүй. Ямартаа л түүнийг бүх мэдээллийг мэддэг, бүх ажлын хэсэг, дорви борвыг толгойлдог гэж байхав. Үнэндээ ч тийм юм.

Ерөнхий сайд Л.Оюун-Эрдэнийн хувьд Хууль зүйн сайдаа л түшихээс аргагүй. Хуулиас давсан бохир нь улс орныг үнэгүйдүүлсэн болохоор аргагүй. Хэзээ л манай Хууль зүйн сайдууд Х.Нямбаатар шиг хэзээ л хэрэгт сэжиглэгдсэн иргэнээ гадаад улсаас ингэж Бадамжунайг авчирч байгаа шиг авчирч, хэзээ л манай улсаас оргон зайлсан хэрэгт сэжиглэгдэгсэд сайн дураараа буцан ирж шалгуулж байлаа даа, маргахгүй биз.

Оюу толгойн хувьд ноогдох хөрөнгө оруулалтаас үүдэлтэй өрийн бичилтийг тэглэхэд Ерөнхий сайдад Хууль зүйн сайд, дэд сайдтайгаа тулсан. Жагсаал цуглаанууд болсон. Х.Нямбаатар гарч алхаад л, Засгийн газрын өмнөөс үг тайлбар, зөвшил болж зогссон. Ерөнхийлөгч асан Х.Баттулгыг ч хаан шиг байхад нь, ордны зүүн талаас шүүхэд нөлөөлж байна гэж хэлээд, сайд болохдоо зэмлүүлж л зогссон.

Одоо Женког бүр тод шүүмжлэн, шүүх дээр очих ёстой оо гээд хэлж байна. Сонгинохайрханд Хурлын дарга явсан, Орхон төгссөн энэ залууг ингэтлээ түргэн өсөж, иймэрхүү энтэй улс төрч болох гэж хэн хүн нэг их санаагүй байх. Зүтгэл, зөвийн талд явахад ингэж тодордог жамтай.

Тэр тусмаа шударга ёсыг сахин, хуулийг сахиулахын төлөө чин зүтгэхэд энэхүү ард түмний дэмжлэг, сайшаал магад ирдгийг харж болохоор байна. Х.Нямбаатар зөөлөн ярьж, чанга гараар ажиллаж байна. Энэ зөв. Том ярьж, хар ярхийн, шударгын дүрээр дөрвөөс дээш сонгогдсон Хууль зүйн сайдууд байв.

Хэн ч ингэж Х.Нямбаатар шиг асуудлыг язгуураас нь ярьж, зөөлөн боловч зөвшиж, зангаргатай хандлагаар дөрөөлж байгаагүй. Дэвшил огт гаргаагүй гэхэд огт хилс болохгүй. Өөрийн эрх ашгаа хамгаалж, өөрийн баялагаа өсгөсөн эрх мэдэлд, мэдээлэлд ойроороо өөрийнхөө тусын тулд л ажилласан Хууль зүйн сайдууд өмнө байсан.

Өмнөх Хууль зүйн сайдууд Хууль зүйн сайд шиг ажиллаж байсан бол өнөөдөр дөчин их наядын хулгай гарахгүй байсан. Зоригийн хэрэг хэрхэн яасан нь эрт тодорхой болох байсан. Хууль зүйн сайд асан хүмүүс Хөгжлийн банктай холбогдохгүй, зээл мээлийн асуудалд орооцолдохгүй байсан. Гэвч хэн нь ч Хишгээгийн Нямбаатар шиг ийм шударгуу, хичээл зүтгэлтэй ажиллаагүй юм.

Хишгээгийн Нямбаатар одоо мөсөн уулын оройтой л ноцолдож байна. Их бие нь тэр чигээрээ байж байна. Тэд УИХ, Засгийн газраар дүүрэн шигээстэй байна. ЖДҮ-чид, сургалтын зээлээ төлдөггүй гишүүд, дабль стандартынхан, Хөгжлийн банкыг тоногчид, нүүрсчид, Тээвэр ложистикийн хэрэгтнүүд, Концессчид, тендерчид, зээлийн санг тоногсод, Эрдэнэтээр зоологсод бүгд Х.Нямбаатартайгаа зэрэгцэн сууж байна.

Х.Нямбаатар иймээс мөсөн дотроо сууж байгаа юм. Тэгээд тэдэнтэйгээ тэмцэж байна. Тэр битгий хэл бөөр нийлж, борви зэрэгцсэн таваас чинь гэхэд хоёр нь авлига нүүрсний хэрэгтэн болчихлоо. Хишгээгийн Нямбаатарт алдах эрх алга аа. Эрх мэдлээр хуяглаж, мэдээлэлд ойроор бүгдийг мэдсэн эх оронч чухал царайлсан “хулгайчуудтайгаа” Х.Нямбаатар зэрэгцэн суугаад тэдэнтэйгээ тэмцэж байна.

Хууль зүйн сайд өчигдөр гадаадад, бусад олон газарт дүрвэсэн хулгай нарыг мэдээлвэл арван мянган доллараар урамшуулах тухай зарлалаа. Тэр зарууд ирнэ ээ. Ард түмэн шударга ёсыг нэн хүсэмжилж байгаа болохоор сайдад хэлээд л өгнө байх. Тэгээд ч арван мянган доллар тэдэнд дөчин их наядаас ч их сонсогдож байгаа. Ард түмэн Х.Нямбаатар сайдад дэргэд нь суугаа нөхдийнх нь тухай мэдээллийг л их өгөх байх аа даа. Тэрийгээ л арван мянган ногоон болго гэж хэлэх магадтай.

Х.Нямбаатар нэг зүйлийг онц сэрэмжлэх нь чухал. Хүн гүтгэхвий, хүн хэлмэгдүүлэхвий гэдгийг. Улсаасаа баян болсон улс төрч нарыг үзэн ядсандаа, боломжуудыг нь хуу тоносоны тул иргэн, ер нь хэн ч өширхсөндөө хүний эрхийн эсрэг мэдээлэл өгөхвий гэдгийг л тун бодоорой доо.

Бусдаар бүх талаар Хууль зүйн сайдаа монголчууд бултаараа дэмжин ажиллах хэрэгтэй. Энэ их хулгай дээрмийн эсрэг тэмцэхэд түүнд олон түмний дэмжлэг хамгаас чухал. Тийм учраас Ерөнхий сайд олон түмнээсээ дэмжлэг хүснэ гэж удаа дараа хэлсэн.

Олон түмэн дэмжиж байна аа, хэн хэн нь хулгайч, хэн нь улсын тусын тулд гэдгийг ялгаад байна. Хэхэрсэн, хөндий саваар дүүрэн байшин барилга авлигын, Хөгжлийн банкны хөрвүүлсэн мөнгөөр хаус барьсан улс төрийн хулгай нар харин Х.Нямбаатарыг халаасандаа гараа зангидан, зөрүү харж шүдээ зууж занан байж тун мэдэх.

Х.Нямбаатар сайдын үйлсийг нягт олноороо бүчиж түш, олон түмээн.

З.БАЯРАА

Sanuulga.mn