Том үзэл санаа, тэнүүн үнэт зүйл сайхан. Ардчилсан нам өчигдөр утгаараа бүтэн болов. “Бүтэн Ардчилал” гэж Одонгийн Цогтгэрэл анх дуугарч, энэ агуулгаар олон дэвшилтэт хандлага, эв нэгдлийн уриалгыг бий болгосон. Үг, үйл, үйлдлээрээ ч хичээсэн. О.Цогтгэрэлийн дэвшүүлсэн мөнөөх бүтэн ийнхүү биеллээ олов.
Женкогоос гэрчилгээгээ авч, өчигдөр жинхэнэ тамгаа С. Эрдэнээс гардсан Ардчилсан намын дарга Л.Гантөмөр хүний нүүр рүү, ардчиллын бүтэнг хүсэгч түмэн рүү бүтэн харах нүүртэй болоод баруун аймгийн зорив. Ардчилсан намын даргууд нар ургах зүгээс эхэлдэг сэн. Л.Гантөмөр өнөөдөр Говь-Алтайд очих юм билээ. Цаахан талд нь, Ховд аймагт Ерөнхийлөгч У. Хүрэлсүх ажиллаж байгаа.
Эв нэгдлийг илэрхийлэгчийн ажиллаж байгаа зүгээс учигаа эрж, үйлсээ томох юм байх аа даа. Хэвлэл мэдээллүүд бичиж байна. Ардчилсан намынхан тамганыхаа асуудлыг шийдчихлээ, одоо МАН-аас салчихвал...
МАН-ынхан Ардчилсан намынхныг бөөнөөр нь айлгаж чадахгүй. "Л.Гантөмөр намаа засаж чадлаа" гэх мэтээр хэвлэлүүд бичиж байна.
Энэ бол мөнөөх Бүтэн Ардчиллын үзэл санааны үүднээс л хэлэгдэж байгаа үгс. Засгийн газрын хэрэг эрхлэх газрын дарга бөгөөд МАН-ын генсек Д.Амарбаясгалан ч Ардчилсан намын бүтэн болж буй явдалд талархал дэвшүүлсэн нь чин, худалгүй анзаарагдлаа.
Аргагүй дээ, өрсөлдөгчөө хэт намнаад, шалгаралгүй явахад жаран хэдээр дараалан ялавч дөчин их наядын хулгайтай суухын зовлонтойг ойлгосон хүний үг хандлага биз. Одонгийн Цогтгэрэл ингэж Ардчилсан намын дарга болохоос татгалзаад, Ардчиллаа бүтэн болгох, эвлэрэл, чөлөөт эдийн засаг, улс орны хувь заяаны үүднээс дуугарч, индэр эзэлж байсны хэрэг гарч байх шиг байна.
Өчигдөр гэхэд Хөгжлийн банкны хэрэг явдлыг, сонсголын дүнг УИХ хэлэлцэв. Энэ үеэр мань О.Цогтгэрэл аанай л Хөгжлийн банкны асуудлаар оночтой үг хэлсний дараа Баттөмөрийн Энхбаяр гишүүн түүнийг хүндэтгэдгээ хэлэв. Чөлөөт өрсөлдөөн, жам ёсны эдийн засаг, жинхэнэ капитализмын мөн чанарыг ойлгож, түүнийгээ ярьж хэлж, дархлаажуулахын нь тулд явдгийн учир О.Цогтгэрэлд тийн хэлж байгаагаа тодотголоо.
Тэрбээр, Хөгжлийн банкны зээлийн хорин хувь, таван зээл тутмын нэгийг улс төрчид авсныг нотолсноо, эх орончид, бизнесийн томчууд хэрэг дээрээ хэн хэн байсныг сонсголын үеэр ард түмэндээ тод томруун харуулсандаа талархалтай байгаагаа мөн тэмдэглээд, эдийн засгийн жинхэнэ капиталист, бодит өрсөлдөөний, шалгарлын хувьсгалд тэнцэгч үзэл санаагаар хамт цуг байгаагаа О. Цогтгэрэлд хамааруулав. Энэ туйлын чухал.
Ардчиллыг бүтэн болгохоос гадна, эдийн засгийн эрх чөлөөний бүтэн байдлын төлөө Б.Энхбаяр, О.Цогтгэрэл нар бодитой тэмцэх нь өнөөгийн нэн чухал эрх ашиг. Тогмидын Доржханд хэлж байна лээ. Олсон жаахнаа ингэж цацдаг, төлөвлөлт, төлөвлөгөөгүй улс төрийн, жалга довын эрх ашгийн утга учиргүй тогтолцоог. Хөгжих үндэсгүй байгааг.
Энэ бүхэнд дэвшилтэт залуу гишүүд улс орноо өөд нь татахын төлөө эдүгээ бүтэн эдийн засгийг цогцлоох нь өчүүхэн ч цаг алдалгүй байх ёстой. Санжаасүрэнгийн Зоригийн төрсөн өдөр өчигдөр тохиов. Тэр хүний төрсөн өдөр Ардчилсан намынхан эвлэж, тамгаа даргадаа өгч бүтэн нам болов. Ц.Нямдорж гарч ирэв. Б. Хурц гарч ирэв.
С.Зоригийн амь насыг бүрэлгэсэн хэргийн яг эсрэг хоёр баримтлал дахин мөргөлдөж, энэ хэргийн түүх шинээр эхэлж байх шиг байна. Талийгаачийн дүү С.Оюун мөн гарч ирсэн. Хэрэгт хэлмэгдэгсэд гэгчдийг өмөөрөв. Олон сонин давхцалууд.
Бүтэн болсон Ардчилсан намынхан одоо их удирдагч С.Зоригийн амийг хөнөөсөн хэргийн үнэн мөнийг бүтэн болгох хэрэгтэй. Эс тэгвэл ирэх сонгуулийн сэдэв дахин болох шинэ дэглэлт эхэлж байх шиг байна. Энэ хэргээр нэг нам, хэсэг хүн олон удаа улс төрийн оноо авч, ялах нь гутамшиг.
Л.Гантөмөр, О.Цогтгэрэл нар одоо бүтэн болсон АН-аа удирдаж сөрөг хүчний ажлаа жинхэнэ утгаар нь хийгээсэй. Эрх баригч МАН-ын булхай булчинг олон нийтэд дэлгээд, буруу зөрүү бодлогыг нь шүүмжлээд, мөрийн хөтөлбөр амлалтыг нь нэхээд ажиллаасай. Ардчилсан үзэл баримтлалтай залуус нэгдэж дуу хоолойгоо өргөөсэй. Ард түмэн АН-аас үүнийг л хүлээж байна.
