Босоо хочит Сайнхүүгийн Ганбаатар үнэхээр “босоо” байж чадаж байна уу. Асуулт мөөн. Чухамдаа улс орны нийтлэг эрх ашгийн үүднээс, хууль тогтоогчийн нь зүгээс харвал босоо байгаа байх. Харин гүйцэтгэх засаглал, өөрчлөлтийн , хөдөлмөрийн чиг шугамаас үзвэл босоогүй байна гэхэд хилс болохгүй.
Хамгийн сүүлд мань гишүүн Эрдэнэс таван толгойн БЭТ-ийг дөрвөн “давхар дээлтэйг” хэлээд, МОННИС-ийг асуудалтай, тендерт ялах үндэслэлгүй, хууль шалгуурын дэнстэй байхад шалгаруулав гэдэг зөв л асуулт тавьж байна лээ. БЭТ Ж.Ганбат түүнд хамгийн бага үнийн санал өгсөн учраас шалгаруулсаан гэснээр Ганбаагийн асуудал хаагдаж байгаа юм.
Сайнхүүгийн Ганбаатарыг гүйцэтгэх засаглалд, гүйцэтгэгчээр, сайдаар тавьж ажиллуулмаар харагддаг. Энэ хүний хэлж ярих бол төгсөрсөн, бүх зүйлийг ярьсан, бүх зүйлийг сайн болгох кейс болгоныг тэр хэлсэн. Одоо энэ хүнийг өөрөө яг гүйцэтгэх, хийх ажилд хэр вэ гэдгийг хармаар байдаг.
Харамсалтай нь, энэ хүн дандаа л “нэгээрээ” явдаг. Бие дааж гишүүн болдог. Эс бол эвсэлээс ганцаараа ялдаг. Ерөөсөө л нэг тийм ганцын явдалтай. Хөдөлмөр нийгмийн хамгааллын яамны сайд юм уу хийгээд үзээсэй, тэр их ярьдаг, хэлдэг, бүх гаргалгааг илэрхийлдэг хүн яаж ажиллах бол гэж хармаар санагддаг нь нийгмийн эрэлт шүү.
Лавтайяа Болорчулуун, Даваасүрэн хоёроос хамаагүй илүү сайд байж чадна гэдэг итгэл үнэмшилтэй нийгмийн нилээд хэсэг байдаг л юм билээ. Оюу толгойн 34 хувьд ноогдох хөрөнгө оруулалтын өрийн бичгийг тэглэсэн явдлыг С.Ганбаатараас салгаж ойлгох аргагүй. Тэр зүтгэсэн, хийж чадсан. Нэртэй нийтлэлчид түүнийг гутаах ажлыг олон жил хийж байгаа. Мань Ганбаа тэднийг хөлс авахуулах “буян” хийж байгаагаа нэг бус бахархсан. Энэ бахархал оргүй биш.
С.Ганбаатар олон жил тэмцлээ. Гудамжинд, Үйлдвэрчиний эвлэлээс, УИХ-ын индрээс. Одоо энэ хүнийг гүйцэтгэх засаглалд л нэг ажиллуулж , үнэхээр бядтай эсэхийг нь үзмээр. Өөрөө ч хэлсэн дээ. Гуравхан сар Ерөнхий сайдаар ажиллаад өгье, яаж юм хийж болохыг харуулъя гэж хэлсэн хүн дээ. Ингэж хэлсэн хүн Монголын улс төрд байхгүй. Цээжинд нь бяд, санаа байдаг болоод тэгж хэлдэг биз. Ардын намынхан энэ олон жилд засаглаж, гишүүн бүр сэтрээ даахаа байсан. Нэгээс хоёр гурван албан тушаалтай. Бараг бүх гишүүд нь сайд болсон. Ерөнхий сайд болъё , ажиллаад өгөхийг минь хар гэж бядархаад байхад нь аль нэг яамыг толгойлуулж болох л байсан, болох ч. Эрүүл, гоё л харагдана.
Яг үнэндээ Сайнхүүгийн Ганбаатар бол Ардын намын хорин гишүүнтэй тэнцэхээр нөлөөлөлтэй, харизмтай улс төрч. Энэ огтхон ч худалгүй. Суудлын бөглөөс, кнопны таглаа гишүүдийн дэргэд Ганбаа гэдэг чинь “луу” шиг амьтан. Золгүй нь гүйцэтгэх засаглалд, ажлыг “эргүүлэх” суудалд сууж чаддаггүй нь. Тэртээ арван долоон онд бараг Ерөнхийлөгч болчих боломж харагдаж л байсан. Ах намууд л хавсайдан ялагдуулсан. Нэгэнтээ өөрийгөө Ерөнхийлөгч болох нь ойлгомжтой гээд эрт л хэлчихсэн товариш. Ийм нэг гишүүн УИХ-д хоёр дахиа сууж байна. Эдүгээ Ардчилсан намд орсон. А.Адьяасүрэнг дэргэдээ суулгасан. Адьяагаа дагуулаад Баянхонгор руу оччих гээд байгаа шиг. Зандан спикертэй заалдчихбал дийлдэхгүй л гэж үзнэ. Ер нь л дийлнэ. Гаажтай эр дээ.
Үзтэл ёс зүйн болоод эрх ашгийн сонирхол бусад ад дэв үзэгдэггүй. Шударга ёсын төлөө бодитой ноцолддог. С.Ганбаатар нүүрсний асуудлыг барьж аваад, Үйлдвэрчиний эвлэлээс хийж байсан тэмцэл шигээ ажилламаар байна. Урагшгүй Гочоогийн Ганболдоос урьдаад, аваад тэр нүүрсний холбогдолтой хэлэлцүүлгийг удирдаад, хар цагааныг нь сайн ялгаад өгөөсэй. Манлайлаасай.
Сайнхүүгийн Ганбаатар одоо нэг байрандаа ингээд ганцаардасхийгээд, дангааршаад, дөлсгээд баймааргүй байна. Туг шиг бай л даа. Арван гуравдугаар хорооллоос алхаад ажилдаа ирж харагддаг. Одоо урдаас, Туул талаас ирж байгаа харагддаг. Сайнхүүгийн Ганбаатар гишүүнээ, салбартал “нүдээч” авлигачдыг, салхи оруулаач төрийн ордонд, дүүрэн хулгайч нар дотор явахад нүд чинь эрээлжлэхгүй байна уу! Мэлмий тунгалаг харж, жинхэнээсээ босоо байгаач.
З.БАЯРАА
Amlalt.mn
