Сүүлийн үед Ерөнхий боловсролын сургуулийн сурагчдын хичээлийн ачаалал их байгаа, багш нар нь гэрийн даалгавраар хэт их шахаж байна гэх шүүмжлэл эцэг эхчүүдийн зүгээс гарах болсон.
Энэ талаар Боловсрол, шинжлэх ухааны сайд Л.Энх-Амгалан өчигдөр(2022.10.26) байр сууриа илэрхийллээ.
Тэрбээр “Өнгөрсөн хавар Боловсролын хүрээлэнгээс 1-12 дугаар ангийн сургалтын хөтөлбөр, сурах бичгүүдэд үнэлгээ хийсэн. Энэ үнэлгээгээр бусад оронтой харьцуулахад манай улсын сургалтын хөтөлбөрийн агуулга хүнд, хичээлүүдийн тоо их байна гэсэн дүгнэлт гарсан юм.
Тиймээс бид сургалтын хөтөлбөрийн агуулгаа эргэж харах шаардлагатай. Сурагчдын хичээлийн ачааллыг бууруулах хамгийн зөв арга нь хичээл хоорондын сургалтын агуулгын интеграцийг нэгтгэх явдал юм.
2023 оны хичээлийн шинэ жилээс эхлэн тодорхой ажлуудыг хэрэгжүүлэхээр төлөвлөсөн. Чанартай боловсрол сургалтын хөтөлбөрийн сайн агуулгатай л уялдана. Сурагчид даалгаварт дарагдаж байгаа гэдэгтэй бүрэн санал нийлнэ” гэв.
