Засгийн газрын өчигдрийн хуралдаанаар Орхоны хөндийд шинэ хот байгуулах тогтоолын төслийг дэмжиж, УИХ-д өргөн барихаар боллоо.
Энэ талаар Барилга, хот байгуулалтын сайд Б.Мөнхбаатар "Монгол Улс нэг хүнд оногдох газар нутгийн хэмжээгээр дэлхийд нэгдүгээрт ордог. 3.4 сая хүн амын нутагшил, суурьшилтын байдлыг төлөвлөн тооцож үзэхэд олон хот, тосгоныг барих боломжгүй.
Тиймээс ажлын байраа дагах ёстой Улаанбаатарын төвлөрлийг сааруулах Хөшигийн хөндий, Өмнийн говийн сумдыг хот болгох, Дархан, Эрдэнэтийг өргөжүүлэх асуудлыг үе шаттай хэрэгжүүлж байгаа.
Орхоны хөндийд шинэ Хархорин хот барих тогтоолыг УИХ-аар баталсны дараа газрын байршлыг судлах, ТЭЗҮ, хөрөнгө оруулалтыг шийдэх гээд урт хугацаандаа хэрэгжих бодлого юм. Шууд барих боломжгүй.
Орхоны хөндийд Түрэгийн эзэнт гүрэн, Уйгар, Уйгарын хар балгас, Эзэн Чингис хааны үеийн Хархорин хот гээд өвөг дээдсийн минь суурин байсан дурсгалт газрууд бий" гэв.
