Улс төрд орсноороо багагүй хохирол амссан хүн гэвэл Ц.Анандбазар гишүүн гэж хэлж болохоор. Онгоцны шатахуун нийлүүлдэг байсан. Тэрийг нь болиуллаа. Бензин шатахууны үнэ нэмэгдэх тутам өөчилж гоочиллоо.

Нөгөөтээгүүр хууль шүүхийн хавийнхнаас үргэлж дуудагдаастай энэ жилүүдийг өнгөрүүлж байна. Охид хүүхэн хүчирхийлсэн гэгдэж байсан, сүүлдээ нөгөө охид хүүхэн нь мань гишүүнийг хэлмэгдүүлж гүтгэсэн болж таарсан. Гишүүн ч ариун нэр төрөө аварлаа, үнэн яллаа болсон. Үгүй ээ, тэгээд л үргэлж ноолуулаастай хүн байх.

Айргийн баяр хийх гэлээ, илүү ажил гээд мөн л шүүмжилсэн. Төсөв , хөрөнгө амаргүй байх үед гэлцээд. Мөн тэгж байтал Булганд, тойрогтоо ажиллахад нь сурвалжлагч нар даган гүйлдэж, элдэв зүйл шалгаагаастай, гишүүн зугтаастай “муур хулганачилсан” маягийн үйл явдлууд баахан мундраалаа.

Бас ч үгүй, нүүрсний хэрэг мандахад, Ардын намын таван гишүүнийг нэрлэхэд мөн л Ц. Анандбазарыг нэрлэж, сүүлдээ нүүрстэй хамаагүй, хамаагүй ч гэж, нүүрсний машинд шатахуун нийлүүлдгээр яригдаж, замхарч байх шиг байна. Ингээд олон талаас нь харахад Ц.Анандбазарыг нийгэм “нүдэж”, гишүүн эл байдалдаа “дасанги” болоод, сайн муу, саар тааруу юм л бол энэ хүнийг холбогдуулан бичиж, нийтэлж байна.

Нэг тийм ёоз муутай өнгөөр тогтчихлоо. Булган аймагтаа дахин нэр дэвшихгүй байхаар хэнд боловч төвөггүй ойлгогдохоор нөхцөл байдалтай болчихлоо. Саяхнаас бас л дуулдаж байна, Ц.Анандбазар Булгандаа бие даан нэр дэвших чиг үнэмшилтэй байгаа гэж. Эндээс үүдээд мөн л юм юм босож ирэх байх даа. Ер нь сонгууль дөхөөд юм юм босгодог хүн л дээ. Тээр жил Э.Мөнх-очиртой сонгуулийн өмнө толхилцоод л байсан нь хэвлэлийн хуудаснаа бий байх. Баригдаж тавигдсан ч байх. Одоо ингээд бие даан нэр дэвшвэл нам нь хэрхэн үзэх юм бол. Таатай л байхгүй байх аа даа.

Төрийн өмчит компанийн олон тендерт орж, шатахуун тосоо нийлүүлдэг гээд үргэлж бичигдэнэ. Одоо Ц.Анандбазар гишүүн ингэж байхаар зүгээр л бизнесээ хийсэн шиг хиймээр. Олон жил бензин зөөж зарлаа. Одоо Монголд жишиг газрын тос боловсруулах үйлдвэр баримаар. Бид алийн болгон хойд, урдын крантнаас хамаарч суух юм бэ. Энэ чигийн бизнес олон жил хийсэн хүн байна, ганц сайхан газрын тос боловсруулах үйлдвэрийг Ц.Анандбазар гишүүн барих нь УИХ-ын гишүүн байх эрх ашгаас хамаагүй том эрх ашиг байна, нийтийнхээ агуулгаар. Алтанширээгийн үйлдвэрт ч анхаарлаа хандуулаад, аль болох түргэн ашиглалтад оруулахад нь тусалмаар байна, ингэж л монголчууддаа туслах нь Ц.Анандбазарын том гавьяа байх болно.

Д.Алтанцэцэг гэж нэг урагшгүй хүн тэр үйлдвэрийг удирдаад, одоо лавтайяа хорин долоо, найман оноос наашгүй нь шиг байна. Уул уурхайд сайд Ж.Ганбаатар нь тэгж хэлж байгаа. Ш.Адьшаа гишүүн нефть боловсруулахад хэрэгтэй түүхий эдэд татвар тэглэх хууль санаачилчихсан. Тэрийг нь дэмжээд, хууль эрх зүйн хувьд энэ үлдэж байгаа хугацаанд гялалзтал ажиллаад, Монголдоо бензин шатахуунаа хийдэг болоход л Ц.Анандбазар зүтгэх нь чухал байна. Мөн Б.Баттөмөртэйгөө хамжаад.

Ингэж монголчууддаа буян болбол Ц.Анандбазар гэдэг хүний нэр хүнд ихээхэн өөрөөр яригдах юм даа. Ингэж чадъя гэвэл Ц.Анандбазар чадах л хүн. Шийдмэг, ухрахгүй зүтгэж, санасандаа хүрдгээрээ бол хүрэх л хүн. Ц.Анандбазар гэдэг хууль тогтоох байгууллагын гишүүнээс илүү, хувь бизнесменийхээ хувиар ингэж чадах л хүн байгаа юм гэж бизнест тулхтай гэж хэлж болох хүмүүс ярилцацгаах . Ц.Анандбазар гэдэг хүний сүүлийн гурав дөрвөн жилийн өнгө дүнг үзэглэвэл иймэрхүү л маягийн дүн өнгө бууж байгаа юм. Б.БАЯР

Amlalt.mn