Эммануэль Макрон айсуй . Дөрөөн чимээ нь ханхийж байна. Харин манай улс төрд Үндсэн хуулийн нэмэлт өөрчлөлтийн асуудал ханх тавьж байна. Макроны удирддаг Франц улсаас бидэнд авах юм мөн их бийг санацгаая. Францчууд Шарль Де Гөлийн санаачлагаар эхтэй Тавдугаар Бүгд Найрамдах Улсын Үндсэн хуулийг 1958 онд баталснаас хойш 24 удаа нэмэлт өөрчлөлт оруулсан юм байна. Хамгийн сүүлийн өөрчлөлтийг 2009 онд хийж.
Харин манайхан хэдэн сарын өмнө Үндсэн хуулиндаа өөрчлөлт хийсэн, одоо дахиад хийх гэж байна. Францад хүний эрх, ажилчдын эрх ашгийг хамгаалсан жагсаал хөдөлгөөнтэй өдөр бүр таарч болдог. Тийм нийгмийн идэвх төгс суусан ард түмэн. Тэр хэрээр ертөнцөд тэргүүлэгч улс.
Өчигдөр манай соёл урлагийнхан жагслаа. Цалингаа нэмэгдүүлье гээд. Тэд цалингаа сая таван зуу болгомоор байна гэлээ. Гурван зуун ерэн евро юм, сая таван зуу гэдэг чинь. Францын жирийн дуучин монгол мөнгөөр зургаан саяыг, дээд талын нь эрэмбийнхэн 16 сая хүртэлхийг хүртдэг нь ил.
Францын “Арева” компани Монголд үйл ажиллагаагаа эхлээд олон жил боллоо. Ураны чиглэлээр. Мөн үед Казахстанд зэрэг эхлүүлсэн огноо байж байна. Өнөөдөр Казахстан уран экспортлогчоороо дэлхийн тэргүүлэгч болсон. Бид ямар байгаа билээ. Асуултгүй. Дороо эргэцэж байгаа.
Он цаг яваад л . Улс гүрнүүд дэргэд хөгжөөд л. Монголын улс төрчид, аугаа удирдагчид ганц станци барьчихгүй л он жилүүдийг барсаар. Дэлхий уранаар эрчим хүчээ хийж, үйлдвэрлэлийн аварга хөдөлгүүрүүд эргэсээр. Валютууд хамсаар. Манай Монголын уран хөрсөн дороо л хэвтэж байна. Адгийн үзэл суртал, ухнадсан дорой байдалтайгаа л. Франц уранаа Монголоос авах нь гэх мэдээ мэдээлэл ертөнцөөр жиргэлдэж байх шиг. Сонор мялаана.
Манай хууль тогтоогчид Үндсэн хуулиа өөрчлөх асуудлыг ганц өдөрт л шийдэж байна. Тоо , тогтолцоо алиныг нь ч. Францууд улс төрийн намуудын хууль, сонгуулийн хуулинд жендерийн асуудлыг нямбай эрэмбэлж чаджээ. Монголын парламентчид мөн энэ хуулиудаа ойрмог батална. Өнгөн дээрээ жендер ярьж төгс төгөлдөрийг үзүүлэх авч, үйлдэх дээрээ зөвхөн өөрсдийн эрх ямбыг хадгалахыг хүсэгчдийг Францчууд тун аятайхан шийдээд хуульчилсан. Тэр нь ердөө л төрийн санхүүжилтийг хасах заалтаар шийдвэрлэсэн. Нэр дэвшигчдийн хүйсийн зөрүү хэр их байна, мөн хэрээр улс төрийн намын санхүүжилтийг хасаад тогтоочихдог. Намуудын нэр дэвшүүлсэн эмэгтэйчүүдийн тоо квотдоо хүрээгүй тохиолдолд тухайн намын бүх нэр дэвшигчдийг сонгуулийн хуудаснаас хасах болзолтойгоор асуудлыг нягт хуульчилж чадсан. 2000-аад оноос хүйсийн тэгш оролцоог хатуу баримтлахыг улс төрийн шалгуур болгосноор дэлхийд тэргүүлэгч болж чадсан. Залуу Ерөнхийлөгч Макрон хүйсийн тэгш байдлыг хангах асуудалд бодлого явуулахдаа төсвийг илүү гарган, өмнөх үеүдээсээ хоёр дахин илүү зарцуулж үр дүнд хүрсэнийг манай улс төрчид, хууль тогтоогчид мэдээсэй.
Монголын хууль тогтоогчдыг нэн чухаг хуулиа хэлэлцэн, ард түмнийхээ багагүй бухимдлын дор байгаа энэ үед Эммануэль Макроны айлчлал чухал үйл явдал болж байна. Монголын хууль тогтоогчид энэ зурвас өгүүлсэн хэдхэн зүйлсийг эрхбиш мөрдөж ажиллах ухаан суу байдаг байлгүй дээ. Үг хэлээсээ ухарсаар, үйлдэл түүх нь буурсаар, улс өөдлөхгүй л байна шүү дээ.
Макрон эдүгээ дөч гарч яваа л Ерөнхийлөгч. Хоёр дахиа Ерөнхийлөгчөөр сонгогдон ажиллаж байгаа хүн. Эхнэр нь даруй хорь гаруй эгч хатагтай байдгийг ертөнц мэднэ. Илүү том Ерөнхийлөгч, тэр тусмаа Францад хоёр сонгогдсоныг тэр хатагтайгаас салгаж ойлгомгүй. Монголчууд энэ мэт өндөр хувь заяаны тохиолыг эртний ерөөл, хишиг буян хэмээн хэлэлцдэг нь үнэн.
З.БАЯРАА
Amlalt.mn
