Соёлын бүтээлч үйлдвэрлэлийг дэмжих тухай хуулийн төслийг хэлэлцэх эсэх асуудлыг УИХ-ын чуулганы нэгдсэн хуралдаанаар хэлэлцэж 57.8 хувийн саналаар дэмжигдлээ.
Соёлын бүтээлч үйлдвэрлэл нь хүний бүтээлч сэтгэлгээ, мэдлэг, оюун болон технологийн дэвшлийг хамтатгасан эдийн засгийн гол хөдөлгөгч хүчин зүйлийн нэг болж байна. ЮНЕСКО-ийн тайланд дурдсанаар соёлын бүтээлч үйлдвэрлэл нь жил бүр 2,2 их наяд ам.долларын орлого бүрдүүлж, дэлхий даяар 30 сая орчим хүнийг ажлын байраар ханган, дэлхийн улсуудын дотоодын нийт бүтээгдэхүүний 10 хувийг бүрдүүлдэг томоохон салбар болон хөгжиж байна. Соёлын бүтээлч үйлдвэрлэлийн зах зээлийг дэлхийн нүүрсний экспорттой харьцуулан авч үзвэл нүүрсний экспорт 78.4 тэрбум ам.доллар байхад соёлын бүтээлч үйлдвэрлэлийн экспортын хэмжээ 6.4 дахин их буюу 500.0 тэрбум ам.долларт хүрч байна.
Иймд дэлхий нийтээр соёлын бүтээлч үйлдвэрлэлийг дэмжих төрөл бүрийн бодлогыг санаачлан хэрэгжүүлж байгаа цаг үед Монгол Улс ч гэсэн соёлын бүтээлч үйлдвэрлэлийг дэмжиж, эдийн засгийн болон татварын таатай орчныг ААН, байгууллага болон уран бүтээлчдэд бий болгох хэрэгцээ шаардлага үүслээ.
Соёлын яамны захиалгаар уг хуулийн төсөлтэй холбогдуулан соёлын бүтээлч үйлдвэрлэлийн суурь судалгааг явуулсан. Уг судалгаагаар Монгол Улсын соёлын бүтээлч үйлдвэрлэлийн салбарт нийт 11.697 аж ахуй нэгж, байгууллага бүртгэлтэй байдаг бөгөөд эдгээрийн 5665 нь идэвхтэй үйл ажиллагаа эрхэлж, 33.931 хүн ажиллаж, соёлын бүтээлч үйлдвэрлэлийн дотоодын нийт бүтээгдэхүүнд оруулж буй хувь нэмэр 481.4 тэрбум төгрөгт хүрч улсын дүнгээр 1.4 хувийг эзэлж байна.
Тэгвэл “Соёлын бүтээлч үйлдвэрлэлийг дэмжих тухай” хуулийн төсөл батлагдсанаар соёлын бүтээлч үйлдвэрлэлийг хөгжүүлэх орчин бүрдэж, соёлын бүтээгдэхүүн, үйлчилгээг эдийн засгийн эргэлтэд оруулах үйл явж эрчимжинэ. Цаашлаад төрөөс үзүүлэх дэмжлэгийг тодорхой болгож, салбарын түншлэл, хөрөнгө оруулалтыг нэмэгдүүлнэ. Мөн соёлын бүтээгдэхүүн үйлчилгээг бүтээх, түгээхтэй холбоотой үе шат бүрд бүртгэл, мэдээллийн тогтолцоо нэвтэрч, соёлын салбарын нийгэм, эдийн засгийн ач холбогдлыг хэмжих боломж бүрдэнэ. Түүнчлэн хуулийн төсөлд гаалийн албан татвар болон НӨАТ-аас чөлөөлөх зэрэг зохицуулалт тусгагдлаа.
Хуулийн төсөл батлагдсанаар Монгол Улсад соёлын бүтээлч үйлдвэрлэл эрхлэх ААН, уран бүтээлчдэд үйл ажиллагаа явуулах таатай нөхцөлийг бүрдүүлснээр ДНБ-д эзэлж буй 1.4 хувийг 2030 он гэхэд 4 хувьд хүргэж өөрийн улсын соёл түүний онцлогийг шингээсэн соёлын бүтээгдэхүүн үйлдвэрлэж чадвал цаашдаа эдийн засгийг солонгоруулж уул уурхайн бус экспортын орлогыг нэмэгдүүлэх боломж бүрдэнэ.
Та бүхэн хуулийн төсөлтэй доорх веб хуудсаар зочлон танилцаж, өөрсдийн саналаа тусгах боломжтой.
https://d.parliament.mn/.../939febc8-16cd-48a8-86b0...
Amlalt.mn
