Ерөнхий сайд Г.Занданшатар өнгөрөгч лхагва гарагийн /2025.11.26/ Засгийн газрын ээлжит хурал дээр хэлсэн үгэндээ “Дөрөвдүгээр цахилгаан станц дээр хэд хэдэн инженер нь авлига авсан хэргээр Эрүүгийн хэрэг үүсгэн шалгагдаж байгаа, авилгал авсан нь тогтоогдсон, Захирал нь өөрөө асуудалд орсон, худалдан авах ажиллагаанууд нь үр ашиггүй, хэт өндөр үнээр юм шахдаг, энэ нь өөрөө Эрчим хүчний салбарыг үр ашиггүй болгоод байна. Тэгээд эцсийн дүнгээ ард түмэнд үүрүүлэх гээд цахилгаан дулааны үнэ нэмнэ гээд байдаг, эхлээд энэ хулгайгаа багасгах хэрэгтэй, тийм учраас ТЭЦ 4-р станцийн захирлыг хуулийн байгууллагад шилжүүлье. Хулгай луйварын дийлэх нь байгаа газар бол төрийн өмчийн компаниууд шүү. Шахаа байна, борлуулалт байна, гэрээнүүд байна. Үүний үр ашгийг сайжруулж, ирэх жил төсвийн орлогыг нэмэгдүүлэх бодитой алхам хийх хэрэгтэй, бүгдийг нь цэгцлэе, үр ашигтай болгоё, нээлтэй ил тод байдлыг нь хангая, олон нийтийн компани болгоё, ашигтай ажилладаг байх ёстой, үр ашиг нь сайжирдаг байх ёстой. Тэгэхээр энийг үе шаттсай хэрэгжүүлэхээр оруулж ирэх хэрэгтэй” гэж хэлсэн.
Ерөнхий сайд Ш.Занданшатар ТЭЦ IV-ийн захирал гэж хэний тухай ингэж ярив?
Дөрөвдүгээр цахилгаан станцийн захирал Ү.Төмөрхуяг нь энэ станцад олон жил болж байгаа атлаа үр дүн гаргаагүй, "Эрчис Монгол" ХХК-аас хийсэн шалгалт, санхүүгийн тайланд хийсэн дүн шинжилгээгээр ТЭЦ IV станци нь зуухны засвар хийхдээ 1.1 тэрбум төгрөгөөр төсөвт өртөгөө хэтрүүлсэн, жил бүрийн аудитын дүгнэлт нь хязгаарлалттай гарч байсан, станци дээр нь эрдэнэт хүний амь удаа дараа хохирч байсан ч нуун дарагдуулдаг, Монгол Улсын Ерөнхийлөгч У.Хүрэлсүх, Ерөнхий сайд асан Л.Оюун-Эрдэнийн нутгийн хүн, тэд намайг томилуулсан гэж төрийн өндөр албан тушаалтнуудын нэрийг барьж бусдыг айлган сүрдүүлж ажлаа явуулдаг, ажилтан албан хаагчидаа дарамталдаг, ажилтнууд нь түүнийг үүрэгт ажлаас нь чөлөөлж өгөхийг хүсэж удаа дараа салбарын сайддаа гомдол гаргаж байсан, хөрөнгө орлогын мэдүүлэгээ нуун дарагдуулсан, анхны эхнэртэйгээ нийлж бусдад мөнгө хүүлж зээлүүлдэг, хувийн компаниа өөрийн удирдаж байсан ТЭЦ IV-ийн тендерт шалгаруулж авч байсан, ажлын байран дээрээ үргэлж архи уудаг, ёс зүйн ихээхэн доголдолтой гээд яриад байвал далай шиг их “булхай паян”-тай нөхөр байдаг.
Тэрбээр Нэг ч удаа бизнес хийж үзээгүй атлаа их, бага хоёр гэргийтэй, тэднийгээ тус тусад нь орн сууцанд амьдруулдаг, бусдад их хэмжээний мөнгө хүүтэй мөнгө зээлдэг, бүр 2011 онд бусдад 1 тэрбум төгрөгийг бусдын барилгад хөрөнгө оруулалт хийх нэрээр зээлээд мартчихсан, өнөөх нь царцаад 10 жил болсон гээд яриад байвал ТЭЦ IV-ийн захирал Ү.Төмөрхуягийн “но” дуусашгүй арвин гэдэг.
Ямартай түүний төрөөс “хумсалж ирсэн” хулгай луйварын тухай мэдээлэл Ерөнхий сайдын чихэнд хүрч, түүнийг чөлөөлөх болсон нь сайшаалтай.
Гэтэл өчигдөр /2025.12.01/ Ерөнхий сайд Г.Занданшатар ТЭЦ IV станци дээр ажиллах явцад мөнөөх будлианы эзэн, Ерөнхий сайдын өөрийн нь хэлсэнчлэн “авлигачин захирал” Ү.Төмөрхуяг, ТЭЦ IV-ийн захиралын үүрэгт ажлаа гүйцэтгэсэн хэвээр, бүр Ерөнхий сайдад ажлаа танилцуулаад явж байх юм.
Тэгэхлээр ТЭЦ IV-ийн захирал Ү.Төмөрхуяг “сурсан зангаараа” нутгийн ах гэгддэг Монгол Улсын Ерөнхийлөгч У.Хүрэлсүхэд “хов зөөж”, Ерөнхий сайд Г.Занданшатарын шийдвэрийг цуцлуулчихаагүй л бол мань захирал Ерөнхий сайдад ажлаа тайлбарлах биш АТГ-ын комиссарт мэдүүлэг өгч байх ёстой биш бил үү?
Эсвэл Ерөнхий сайд ТЭЦ IV-ийн захирал Ү.Төмөрхуягийн тухай хэлсэн үгээ мартчихсан уу, сурсан зангаараа түүнтэй “эвлэрчихээд” үргэлжлүүлэн ажлаа хийх боломжийг олгосон юм болов уу?
Ямартай төрөөс хулгай хийсэн, авлига албан тушаалын гэмт хэрэгт нэр холбогдсон төрийн өмчит компаниудын удирдлагыг чөлөөлнө гэсэн үгэндээ Ерөнхий сайд хүрч, ТЭЦ IV станцийн захирал Ү.Төмөрхуягийг үүрэгт ажлаас нь чөлөөлж, ТЭЦ IV станцийн хамт олон болон хэрэглэгч түмний “нурууг тэнийлгэнэ” гэдэгт итгэж байна.
Ц.Мөнх
amlalt.mn
