Засгийн газрын ээлжит хуралдаанаас гаргасан шийдвэрийг танилцууллаа.
Энэ үеэр Цахим хөгжил, харилцааны холбооны сайд Н.Учрал "Ирэх оны нэгдүгээр сарын 1-нээс E-Mongolia аппликэйшний тусламжтайгаар хаана ч очоод цахимаар төлбөр тооцоо хийдэг болох нөхцөлийг бүрдүүлнэ.
Дэд бүтцийн болон бусад хамтын ажиллагааны түвшинд арилжааны банкууд, төлбөрийн хэрэгслийн бүх хувийн хэвшил, ААН, байгууллагатай хамтарч ажиллана. Ямар нэгэн өрсөлдөөн үүсгэхгүйгээр зөвхөн холболт хийж, иргэдэд ээлтэй үйлчилгээг нэвтрүүлнэ. Ингэснээр далд эдийн засгийг ил болгох Засгийн газрын бодлого шийдвэрийг илүү амилуулна.
Төрийн үйлчилгээтэй холбоотой орлого, зарлагуудын бүртгэл, тендер худалдан авах ажиллагаа, халамжийн мөнгө гэх мэтчилэн төрөөс олгогдож байгаа тусламж үйлчилгээ бүх төрлийн дэмжлэгийг цаашдаа төрийн үйлчилгээний нэгдсэн систем дээр холбож, олон нийт хяналт тавих нөхцөлийг бүрдүүлэх юм.
НӨАТ-ын баримтын асуудал, буцаан олголтыг нэмэгдүүлэх эсэх талаар иргэдээс нээлттэй системээр санал авсан. Үүний цаана далд эдийн засаг байгаа учраас илүү бүртгэлжүүлэх чиглэлээр төр өөрөөс гаргаж буй төсвийн орлого, зарлагыг нэгдсэн бүртгэлд шилжүүлж, бүртгэдэг. Далд эдийн засгийг ил болгох том зорилгыг хангуулсан шийдэл нь цахим төлбөр тооцооны систем байна" гэв.
Тэрбээр үргэлжлүүлэн "Social pay, Q pay зэрэг олон төрлийн төлбөрийн хэрэгсэл байдаг. Иргэд утсан дээрээ аппликэйшн гаргаад QR кодыг уншуулахад тухайн хүний данс бүртгэлтэй тохиолдолд тооцоо нь хийгдэж байдаг.
Үүнтэй адилхан E-Mongolia өөрөө бүх төрлийн хувийн хэвшлийн цахим төлбөр тооцооны шийдлийг дэмждэг. Хаана ч очсон QR кодоо уншуулахад төлбөр тооцоо хийгддэг, мөн төрийн үйлчилгээнд тухайн шийдлээр төлбөрөө төлдөг нөхцөлийг бүрдүүлнэ.
Бие даасан данс нээгдэх биш, өөрийн тань бүх төрлийн дансны карт, бусад төлбөрийн хэрэгсэлтэй дэд бүтцийн хүрээнд нэгтгэгдэх юм. Жишээ нь Wechat, Samsung pay шиг аппликэйшн гаргаж ирээд уншуулахад тооцоо хийдэг шийдэл рүү орно. Ингэсний үр дүнд төрийн үйлчилгээний орлого, зарлага ил тод нээлттэй болох нөхцөл бүрдэж байгаа" гэлээ.
