Улаанбаатар хот хууль эрхзүйн хүрээнд бол хангалттай “хөгжихөөр” болж байх шиг байна. Нийслэл Улаанбаатар хотын замын түгжрэлийг бууруулах, гэр хорооллыг орон сууцжуулах тухай хууль батлагдсан.
Энэ хуулийг дагаж 16 журам батлагдан хэрэгжинэ гэж Хотын дарга Х.Нямбаатар өнөөдөр (2024.01.18) НИТХ-ын хуралд танилцууллаа.
Нийслэл Улаанбаатар хотын замын түгжрэлийг бууруулах, гэр хорооллыг орон сууцжуулах тухай хууль хэрэгжиж эхэлснээр Нийслэл хот бие даан хөгжих, ялангуяа нийслэлийн иргэдийн бухимдлыг төрүүлээд байгаа авто замын түгжрэлийг бууруулах чиглэлд тулгамдсан асуудлыг шийдвэрлэх эрх зүйн орчин бүрдэнэ гэж харж байгаа.
Мөн эл хуулийг дагалдан гарах шинэ журмууд батлагдсанаар Улаанбаатар хотын түгжрэлийг бууруулах, гэр хорооллыг орон сууцжуулах богино, дунд, урт хугацааны арга хэмжээнүүдийг хэрэгжүүлэх боломжтой болох юм байна.
Улаанбаатар хот тулгамдсан асуудлаа төсвийн эх үүсвэрээс гадна төр, хувийн хэвшлийн түншлэл, гадаад, дотоод бонд гаргаж, томоохон төсөл хөтөлбөрүүдийг хэрэгжүүлэх замаар шийдэх аж.
Цаашид дулаан хангамж, эрчим хүчний найдвартай хэрэглээг хангах зорилгоор хуулийн төслүүд ч боловсруулж батлуулах юм байна. Гэхдээ иргэд олон нийтийн зүгээс хууль журам гаргахаас илүүтэй цахилгаан дулааны шинэ эх үүсвэр, станци бариасай гэж хүсч байгаа юм.
Амлалт.мн
