Энэ жилийн татвар төлөгчдийн өдрүүдийг тохиолдуулан “Таны ирээдүй-татварын боловсрол” уриан дор нээлттэй хаалганы өдөрлөг өнөөдөр МҮХАҮТ-ийн Их танхимд боллоо. Өдөрлөгт хариуцлагатай татвар төлөгчдийг төлөвшүүлэх чиглэлд төрийн болон хувийн секторуудын баримталж буй бодлого, төлөвлөлт, судалгаа шинжилгээний ажлуудыг танилцууллаа.

Энэ үеэр татварын орчин, иргэдийн санхүүгийн суурь мэдлэгийг дээшлүүлэх чиглэлээр хэрэгжүүлж буй үйл ажиллагаануудыг таниулах, хэлэлцүүлэг, судлаачдын татвар төлөх үүргийн биелэлтийн түвшин, татварын боловсролыг дээшлүүлэх арга зам түүнд мэргэжлийн мэргэшсэн боловсон хүчний оролцоо сэдэвт судалгаанууд танилцуулж, хэлэлцүүлгүүд өрнөлөө.

Хэлэлцүүлэгт Монголтакс ТМЗ ХХК-ийн ТУЗ-ийн дарга Х.Тунгалагмаа “Хариуцлагатай татвар төлөгч ба татварын боловсрол” сэдвээр илтгэл тавилаа.

Энэ үеэр Монголтакс ТМЗ ХХК-ийн ТУЗ-ийн дарга Х.Тунгалагмаагаас тулгамдаж буй асуудлын талаар тодрууллаа.

-Мэргэшсэн мэргэжилтэн бидний оролцоо ямар байх ёстой вэ гэхээр хуулийн болон стандартын өөрчлөлтөөс хамаарч бидний чиг үүрэгт нэмэлт үүрэг нэмэгддэг болсон. Гэтэл шинэ төрлийн татварын төрөл нэмэгдэхэд зарцуулах цаг, тэр ажилд тохирсон ямар нэгэн үнэлгээ, ажил хөдөлмөрийн үнэлэмж бидэнд байхгүй байна. Бидэнд мэргэжлийн суурь мэдлэг байдаг. Гэхдээ бизнес хумигдаж байгаа үед биш тэлэгдэж байгаа үед ажлын ачаалал, үнэлгээ болон стратегитай холбоотой асуудлаа яаж шийдэх вэ гэдэг чухал юм.

Өнөөдөр Монголын мэргэшсэн нягтлан бодогчдын институт мэргэжлийн мэргэшсэн 5400 хүнээ бэлтгэхэд юуг анхаарч ирсэн бэ, тэдний оролцоо, бизнесийн болон татварын хууль тогтоомжийн өөрчлөлт гэх зэрэгтэй холбоотой асуудал байдаг. Хиймэл оюун ухаан, дижитал технологид суурилсан мэдээллийн харилцан ижилхэн зүйлийг нэг мэдээллээс авдаг байх эх сурвалжийг төр хэрэгжүүлж чадвал мэргэжлийн нягтлан бодогч, санхүүч бидний олон цагаар сууж гаргадаг тайлан мэдээллийн тоо буурах юм.

Жишээ нь, ажлын цагаа хэмнэх боломжуудын талаар судалгаа хийх хэрэгтэй. Ганц бие хүмүүс маш их цагаар сууж ажилладаг тал байна. Ер нь бид маш их сууж ажилладаг учир мэргэжлээс шалтгаалах нурууны суулт, мэдрэлийн үрэвслийн өвчин тусдаг гэж ярьдаг. Иймээс өөрсдийнхөө төлөө, мэргэжилдээ үнэ цэнтэй ажиллах талаар шинийг санаачлах ажил байгаа. Үүний тулд Монголын мэргэшсэн нягтлан бодогчдын институт гишүүддээ хандсан санаачилгаа идэвхжүүлэх том суваг юм.

Иргэн бүр хуулиа дээдэлдэг, хуулиа биелүүлдэг, татвараа төлдөг, бусдыг хүндэтгэдэг эх оронч байгаасай гэж та бүхнээс хүсч байна"гэлээ.

Хүрэлцэн ирсэн бизнес эрхлэгч, хувь хүн болон аж ахуйн нэгжүүдэд татварын хууль, татварын төлөвлөлт, татварын эрсдэлийг хэрхэн удирдах талаар болон татвар төлөгчдийн сонирхсон асуултуудад Pro bono зөвлөгөө, үйлчилгээг нэг цэгээс үзүүлэх зэрэг үйл ажиллагаа болов.

Энэхүү өдөрлөгт Монголын татварын алба, Насан туршийн татварын боловсролын академи НҮТББ-аас хамтран татвар төлөгчдийн өдрүүдийг угтан ирээдүйн татвар төлөгч хүүхэд багачуудын татварын тухай мэдлэг, боловсролыг дээшлүүлэх зорилгоор “Татварын хөгжлийн үндэс” сэдвийн хүрээнд зохион байгуулсан гар зураг болон видео контент уралдааны шагналыг гардуулсан юм. Нээлттэй хаалганы өдөрлөгийг Монголтакс ТМЗ ХХК, МҮХАҮТ, Татварын ерөнхий газар зохион байгуулав.

Б.БАЯРМАА