“Эрдэнэс алт ресурс” ХХК-ийн таван жилийн ойн онол практикийн бага хуралд “Соёолон интернешнл” ХХК-ийн гүйцэтгэх захирал Ц.Мөнхбат “Уул уурхайн салбар дахь төр, хувийн хэвшлийн үр дүнтэй хамтын ажиллагаа” сэдэвт илтгэл тавихдаа чухал санал, асуудлыг дэвшүүлсэн юм.
Тэрээр “Эрдэнэс алт ресурс ХХК-ийн хэрэгжүүлж буй Салхитын уурхайн төсөлд төр, хувийн хэвшлийн хамтын ажиллагаа үр дүнтэй явагдаж байгаа. Төр менежментээр хангаж байна. Гүйцэтгэлд хувийн компаниуд үйл ажиллагааг нь хариуцдаг. Өнгөрсөн жилүүдэд “Эрдэнэс алт ресурс” компаниас хийсэн бүтээгдэхүүн үйлдвэрлэл төлөвлөгөөгөө давуулан биелүүлж, Монгол Улсад олон тэрбумын татвар төлөөд, хүртэх ёстой өгөөжөө ард түмэнд хүртээсэн. Энэ бол хамтын ажиллагааны үр дүн юм.
Цаашдаа төр, хувийн хэвшлүүд хамтарч олон төслүүдийг хэрэгжүүлж чадвал илүү үр дүнтэй ажиллагаа болон монголын олон компаниуд хөгжих боломж харагддаг. Монгол инженерүүд хөгжиж, монголд өгөөжтэй, эцсийн бүтээгдэхүүнд нь чанартай, хариуцлагатай ажиллагаатай болж байна. Ингэж байж бид баялгийнхаа эзэн болно. Түүнчлэн баялгаа үр дүнтэй ашиглахын тулд эхлээд чадамжтай, технологио мэддэг, боловсон хүчнээ сайжруулах ёстой.” гэж ярив.
“Соёолон интернешнл” ХХК-ийн Гүйцэтгэх захирал Ц.Мөнхбатын илтгэлтэй холбогдуулж доорхи тодруулгыг авлаа.
-Та түрүүн цүнх барьсан хуурамч ажиллагаатай хүмүүс энэ салбарт ажиллаад байгааг илтгэлдээ дурдлаа. Цүнх барьсан хүмүүс Хятадын талд байна уу, Монголын талд байна уу?
-Тэр цүнх баригч хүмүүс бол гол төлөв инженерийн болон ТЭЗҮ зураг төслийн компаниудад яригдсан асуудал юм. Цүнх барьсан компаниуд гэдэгт чадамжтай, байнгын, тогтвортой боловсон хүчин байхгүй гэсэн утгаар хэлсэн. Цүнхэндээ тамгаа хийгээд явдаг монголын зарим компаниуд чадамж сул хэрнээ төслийн “ажил” авч хийгээд байдаг.
Миний хэлээд байгаа тэр компаниуд хэдэн ажилчинтай, хэдэн хүмүүсийн нийгмийн даатгалыг төлдөг, ямар чадамжтай, ажлын туршлага нь ямар вэ зэрэг бүх талаас нь зөв үнэлж, төслийн ажил өгөх шаардлагатай. Ер нь чадвартай компаниудаар ажил хийлгэвэл дараа нь тухайн төсөл бодитой, үр дүнтэй хэрэгжих нөхцөл бүрдэнэ.
-Чадваргүй цүнх баригч компанид төслийн ажил яагаад өгдөг юм бэ?
-Шударга хэлэхэд, яамдууд, Ашигт малтмалын газарт ажилладаг зарим газрын дарга нар хамаарал бүхий компанитай байдаг гэсэн яриа байдаг. Манай салбарын хүмүүс бүгд мэдэж байгаа. Манай салбарын ТЭЗҮ зураг төслийн 100 гаруй компаниуд байдаг. Энэ 100 гаруй компанид ажиллах тийм их боловсон хүчин байдаггүй. Эдгээр компаниудын чадвар, чанар танигддаг. Тэгэхээр төслүүдэд ажиллах компаниудад шалгуураа чангатгаж байж, боловсон хүчин, чадамжийг нь зөв үнэлж, чанартай компаниудаар төслийн ажлаа хийлгүүлбэл бодит хөрсөнд буусан сайн төсөл болж, монголын эдийн засагт хувь нэмрээ оруулж чадна гэж би үзээд илтгэлээ тавьсан.
Б.БАЯРМАА
