Монгол хүн сансарт ниссэний 44 жилийн ой энэ сарын 22-ны өдөр тохионо. Энэхүү өдрийг тохиолдуулан Цахим хөгжил, инновац, харилцаа холбооны сайд Ц.Баатархүү тэртээ 1977 онд байгуулагдсан ШУА-ийн Сансар судлалын тасгийн хамт олонд өнөөдөр хүндэтгэл үзүүллээ.

Тодруулбал, Монгол Улсын анхны сансрын нисэгч, Чингис хаан одонт Ж.Гүррагчаа, тухайн үед сонгон шалгаруулалтад тэнцсэн С.Сайнцог, багийн эмч Л.Лхагваа, УИХ-ын гишүүн, Академич, Чацаргана, борцыг сансарт турших туршилтыг хийж байсан Д.Рэгдэл, Сансар судлалын тасгийн эрхлэгч Ч.Лхагважав, нарийн бичиг Ж.Гантулга, Д.Батмөнх нарын, Монгол Улсын сансрын анхны багтай уулзаж, яамны баримталж буй бодлогын талаар санал солилцов.

Монгол Улс 44 жилийн өмнө ЗХУ-тай хамтран сансарт анх нисэгчээ илгээсэн бол өнөөдөр хоёр дахь сансрын нисэгч нь хэн байх, аль улстай хамтран нисгэх вэ гэдэг асуудал хөндөгдөж эхэлсэн. Энэхүү асуудлыг Үндэсний Аюулгүй байдлын зөвлөлийн хуралдаанаар хэлэлцэж, шийдвэрлэнэ гэдгийг Цахим хөгжил, инновац, харилцаа холбооны сайд Ц.Баатархүү энэ үеэр онцлов.

Түүнчлэн үндэсний хиймэл дагуулыг Франц улстай хамтран хөөргөхөөр бэлтгэл ажлаа хангаж байгааг дурдсан. 10 гаруй жилийн турш яригдаж буй энэхүү ажил нь Монгол Улсын харилцаа холбооны бие даасан байдлыг хангах чухал ач холбогдолтой юм. Мөн манай улсад Старлинктэй ижил төстэй, нам орбитын чиглэлд хиймэл дагуул хөөргөж буй олон улс хамтран ажиллах санал тавьж байгаа.

Технологийн үсрэнгүй хөгжлийг дагаад сансар судлал нь эдийн засгийн шинэ бүтэц болж, урьд урьдынхаасаа илүү олны анхаарлын төвд орсон.

Иймд Цахим хөгжил, инновац, харилцаа холбооны яамны зүгээс Сансрын тухай хуулийн төслийг боловсруулж, УИХ-ын ирэх намрын чуулганы үеэр өргөн барихаар бэлтгэл ажлаа хангаж байгаа бөгөөд үүнд ахмадуудын оролцоо маш чухал болохыг Сайд Ц.Баатархүү онцолсон юм.

Ж.Гүррагчаа нь сансарт ниссэнээр Монгол Улсдаа анхны, Ази тивийн хоёр дахь, дэлхийн 101 дэх сансрын нисэгч болон түүхэнд бичигдсэн билээ. Харин Монгол Улс өөрийн нисэгчээ сансарт нисгэсэн дэлхийн 10 дахь орон болж, хүн төрөлхтний сансар судлалын түүхэнд нэрээ мөнхөлсөн юм.

Мөн сансрын уудамд техникээ гаргаж, туршсан дэлхийн тав дахь орон, сансар судалгааны төхөөрөмжийг нислэгийн явцад бүтээсэн 20 дахь орон болсон.

Тухайн үед нислэгийн эрдэм шинжилгээний хөтөлбөрийг боловсруулах ажлыг БНМАУ-ын ШУА-ынхан дангаараа хариуцаж байжээ.

Тус нислэгээр Атлантын далай, Латин Америк, Арабын хойг гээд тив газрууд, Канад, АНУ, Куба зэрэг улс болон ашигт малтмал, амьтан судлал гээд газар зүйн төлөвлөгөөт олон зураг авсан байдаг. Тэдгээр зураг нь олон салбарын үйл ажиллагаанд үнэтэй хувь нэмэр оруулсан. Ялангуяа, газрын мэдээлэлд буюу дэлхийн улс орны загас агнуурын аж ахуй хөгжихөд түлхүү ашиглагдсан байна.