БНХАУ-ын Улаанхад хотод Ханшань уулын үүлдэрийн цагаан ямааны ноолуурыг брэнд болгосон “Dongli” ноолуурын үйлдвэрээр Монгол Хятадын сэтгүүлчдийн сурвалжлах баг зочиллоо. Хятад улсын Ханшань мужийн цагаан ямааны ноолуур нь нарийн чанарын хувьд 13-16 микрометр, 36 мм-ээс дээш урттай буюу монгол ямааны ноолууртай ойролцоо боловч бүтээгдэхүүн үйлдвэрлэлээрээ тус компани дэлхийд нэлээд дээгүүрт ордог байна. Дунли ноолуурын үйлдвэр 2000 онд үйл ажиллагаагаа эхлүүлсэн бөгөөд өдгөө 1500 ажилтантай, бүрэн автоматчилагдсан үйлдвэр болон хөгжжээ. Мөн 10000 гаруй нэр төрлийн бүтээгдэхүүн үйлдвэрлэж, дотоодын хэрэгцээнд нийлүүлэхээс гадна, гаднын 30 улсын 40 гаруй хувцас үйлдвэрлэгч компаниудад бүтээгдэхүүнээ нийлүүлж байна.
Үүний зэрэгцээ Италийн брэнд компанитай хамтран ажиллаж, үйлдвэрлэсэн бүтээгдэхүүнийхээ 65 хувийг Итали зэрэг Европын улс орнууд руу экспортлодог аж. Тус үйлдвэрийн барилга руу ороход үйлдвэрийн ханыг Улаанхад уулын өнгөтэй адил өнгөөр будаж, чийдэнгийн бүрхүүлээ самнасан ноолуураар бүрхсэн, цонхны хөшигөө ноолууран утсаар шийдсэнээс гадна ханандаа өлгөсөн том жижиг олон фото мэт зургийг ноолууран шэйлээр урласан нь тун өвөрмөц шийдэл байлаа. Мөн тус компани технологийн чиглэлийн дунд, дээд мэргэжлийн сургуулиудтай хамтран ажиллаж, суралцагч оюутнуудаас ажилтан сурган авч, үйлдвэрийнхээ боловсон хүчнийг бэлтгэдэг аж. Дашрамд сонирхуулахад, Дунли компанийн бүтээгдэхүүнийг “Жеймс Бонд 007” уран сайхны киноны гол дүр, Английн жүжигчин Данейл Крейг кинонд тоглохдоо өмссөн байна. Мөн Хятадын онлайн худалдааны “Алибаба” группыг үүсгэн байгуулагч Жак Ма, дэлхийн хэмжээний тэрбумтан Билл Гейтс нарын олон алдартан, кино жүжигчид авч хэрэглэдэг аж.
Эх сурвалж: zms.mn
