ХҮН намаас сонгогдон УИХ-ын гишүүн болсон Боловсролын сайд П.Наранбаярыг салбарын сайдаас нь огцруулах хүсэлтийг УИХ-ын гишүүн Н.Батсүмбэрэл, Б.Бат-Эрдэнэ, П.Сайнзориг, Д.Бум-Очир, Б.Баярбаатар нар Ерөнхий сайд Г.Занданшатарт хүргүүлсэн.
Тэдний шаардлагаас харвал Боловсролын сайд П.Наранбаяр нар эрх мэдэл, албан тушаалаа урвуулан ашиглаж төсвийн мөнгийг өөрийн хамаарал бүхий байгууллага руу шилжүүлсэн, илтэд хувийн ашиг сонирхолын зөрчил гаргасан, ЭЕШ-ыг өөрийн томилсон мэргэжлийн бус хүмүүсээр бүрдүүлсэн багаар хуудуутай зохион байгуулсан гээд хэд хэдэн асуудлаар хандсан юм билээ.
Тийм учраас түүнийг Боловсролын сайдаас нь чөлөөлж, хууль хяналтын байгууллагаар шалгуулах ёстой гэсэн байр суурийг дээрх нэр бүхий 5 гишүүд гаргасан аж.
Гэтэл ХҮН намын дарга, УИХ-ын гишүүн Т.Доржханд хэвлэлд хандан мэдээлэл өгчээ. Тэрбээр хэлсэн үгэндээ “П.Наранбаяр сайдтай уулзсан, огтхон ч ашиг сонирхлын зөрчил байхгүй, хууль хяналтын байгууллагаар шалгуулахад бэлэн, энэ бол улс төржилт явж байна гэж хэлсэн, мөн ХҮН намын даргын хувьд хэлэхэд манай УЗ нэг л байр суурьтай байгаа, та бүгд анзаарсан бол төрийн бодлого тогтвортой байх ёстой, энэ хүрээнд сайд нар тогтвортой ажиллах ёстой гэсэн шийдвэр гаргасан. Цаашдаа ийм үндэслэлгүй байдлаар улс төржилт явах юм бол ХҮН намын зүгээс сайдыгаа бол солихгүй, үнэхээр хуулийн байгууллагаар шалгагдаад үндэслэл нь гарч ирээд, нотлогдвол өөр шүү дээ. Гэтэл нотлогдоогүй асуудлыг ингээд ултөржүүлээд байх шаардлагагүй гэдгийг ХҮН намын зүгээс МАН-ын холбогдох гишүүдэд байр сууриа илэрхийлсэн. Бид Монгол Улсын эрх ашгийн үүднээс Засгийн газарт орж хамтраад ажиллаж байгаа шүү дээ. Ачаагаа үүрээд хамтраад явж байгаа улс төрийн хүчин. Үнэхээр хамтраад явж байгаа мөртлөө улс төржиж асуудалд хандмааргүй байна, улс төрийн соёлтой баймаар байна, үнэхээр хууль зөрчсөн асуудалд бодитой гарч ирэх юм бол бид харгалзаж үзнэ, ийм байдлаар улс төр хийгээд явах юм бол Засгийн газрын асуудал хөндөгдөнө” хэмээн П.Наранбаяр сайдыг чөлөөлбөл ХҮН нам Засгаас гарахад бэлэн гэсэн санааг илэрхийлчихлээ.
Тэгвэл ХҮН намын дарга П.Доржхандад хандаж хэлэх хэдэн үг сэтгүүлч надад байна.
- Хууль зөрчсөн бол МАН-аас томилсон хүн байна уу, ХҮН-ээс томилсон хүн байна уу хамаагүй, Хууль хяналтын байгууллага шалгах ёстой, П.Наранбаяр гэдэг хүн өөрөө “би хууль зөрчөөгүй, МАН-ын зарим гишүүд улс төржөөд байна” гэж танд хэлэхээр нь “ТИЙМ ЮМ БАЙНА” гэж та итгэж болох ч хууль хяналтынхан шалгах ёстой, шалгахдаа албан тушаалаас нь чөлөөлж байж шалгах ёстой, мөн Боловсролын сайд П.Наранбаяр ч бай, хэн ч бай төрийн бодлогыг тогтвортой, уламжилж явуулах ёстой гэдэгтэй хэн ч маргахгүй байгаа. Харин ингэж бодлого хэрэгжүүлэхдээ төсвийн мөнгийг өөрийн хамаарал бүхий хуулийн этгээд рүү явуулж болохгүй, энэ бол эрх мэдлээ урвуулсан, хувийн ашиг сонирхолдоо эн тэргүүнд тавьсан үйлдэл байж болзошгүй тухай асуудал яригдаж байгааг ойлгож байна уу та ер нь...
- Хулгай хийсэн байж болзошгүй нөхцөлийг тодруулах, хариуцлага тооцохын оронд “засагт хамтарсан, ачаа үүрч байгаа, улс төржиж байна, сайдыг маань огцоруулбал Засгаас чинь гарна” хэмээн “сүрдүүлж” байгааг харвал “та арай П.Наранбаяр сайдтайгаа халаас нэгтэйгээр “хулгай худалд нь оролцчихсон юм биш биз” гэсэн хардлагыг төрүүлж байна. Мөн ЕБС-ийн Ахлах анги төгсөж байгаа 44 мянган хүүхэд таны өмөөрөөд байгаа Боловсролын сайд П.Наранбаярын томилсон, танай намын гишүүн “БОЛОВСРОЛЫН ҮНЭЛГЭЭНИЙ ТӨВ”-ийн дарга, төрийн байгууллагад нэг ч жил ажиллаж үзээгүй, мэргэжлийн бус томилгооны “эзэн” Г.Гантуяа гэгчийн “буруутай” үйлдлээс болж ЭЕШ-ийн тест алдаатай болсон, задарсан, зарим шалгуулагч дээр оноо нэмсэн гээд хэл ам гарч байгааг юу гэх вэ? Соёлтой улс оронд зөвхөн энэ үйлдлийн төлөө Боловсролын сайд огцрох хангалттай үндэслэл болно. Харин танай ХҮН-ийнхэн “ШИР” царайтай улс юмаа даа...
- Т.Доржханд та Монгол Улсын Засгийн газрын гишүүн, Монгол Улсын Шадар сайдаар ажиллахдаа Эрчим хүчний реформын үндэсний хороог ахлан ажилласан. Энэ хугацаанд ямар үр дүнтэй ажил хийсэн вэ гэдгээ олон нийтэд тайлагнах цаг болсон байх. Эрчим хүчний салбарынханы ярьж байгаагаар бол та мөн л эрх мэдэл, сайдын албан тушаалаараа “сүр далайлган” өөрийн хамаарал бүхий этгээдийн хувь эзэмшдэг “МОНРЕ ДААТГАЛ”-даа Эрчим хүчний салбарынханы амь насны даатгалыг даатгуулсан гэх яриа чих дэлсэж байна. Хэрвээ энэ асуудал үнэн бол хариуцаж буй салбартаа хувийн ашиг сонирхолоо ямар нэг байдлаар шингээнэ гэдэг нь Эрүүгийн хуулийн 22-р зүйлд заасан эрх мэдэл, албан тушаалаа урвуулан ашигласан, авлигын шинжтэй ГЭМТ ХЭРЭГ мөн. Т.Доржханд гишүүнтэй холбоотой эл асуудлыг АТГ, хууль хяналтын байгууллага шалгаад үзэхэд гэмгүй биз.
Ер нь авлига, албан тушуулын гэмт хэрэг нь ОЛОН УЛСАД бол шууд Эрүүгийн хүнд гэмт хэрэгт тооцогддог атал манай улс төрчдийн дунд эрх мэдэл албан тушаалаа урвуулан ашиглан өөрт болон өөрийн хамаарал бүхий этгээдүүдэд давуу байдал үүсгэсэн байж болзошгүй гэмээр эс үйлдэл, үйлдэл гаргах нь гэмт хэрэг биш, бараг байж болдог хэвийн үзэгдэл мэт болчихлоо.
Энэ асуудлыг нь сэтгүүлчид, иргэд, олон нийт баримтаар шүүмжлэхээр ӨӨДӨӨС нь “улс төржиж байна, ажил хийлгэхгүй байна, төрийн тендерт оролцох компани олдохгүй болохоор шууд гэрээлсэн, би мэдээгүй” зэрэг хариулт хэлж, бултаж булзааруулах нь их боллоо.
Ийм нөхцөл байдал нь улам даамжирсаар өдгөө улс орны хэмжээнд амжилттай яваа компаниудын цаана заавал нэг улс улс төрч байдаг хэмжээнд очиихсон нь нууц биш боллоо.
Үүнийг шийдэхгүй бол албан тушаалтнууд байжсаар, авлига улам гаарсаар, улс орны хөгжил улны хэмжээнд уруудсаар, авлигын индексээрээ бид дэлхийн улс орнуудын сүүл барьж хойшилсоор байх болно.
Ер нь ХҮН намын дарга Т.Доржханд “аавдаа айлгаж байгаа хүүхэд шиг” Засгаас гарна гэж “сүрдүүлээд байвал” гарна л биз дээ, ХҮН намтай, ХҮН намгүй МАН дангаараа Засгаа байгуулах боломжтой гэдгийг Ерөнхий сайд Г.Занданшатар сайн мэдэж байгаа.
Ц.Мөнх
amlalt.mn
