Монгол Улсын уул уурхайн салбарын хөгжлийг бүсчилсэн хэлбэрээр дэмжих, орон нутгийн бизнес эрхлэгч, хоршоод, төрийн болон хувийн хэвшлийн байгууллагуудын хамтын ажиллагааг өргөжүүлэх зорилгоор зохион байгуулагдаж буй “Mining Week – Бүсчилсэн хөгжил” арга хэмжээнд Өмнөговь аймгийн төлөөлөгчид оролцож байна.
2025 оны 9 дүгээр сарын 11-13-ны өдрүүдэд Улаанбаатар хотын Налайх дүүрэгт зохион байгуулагдаж буй салбарын уулзалт, үзэсгэлэн, хэлэлцүүлэгт Өмнөговь аймгийн Иргэдийн Төлөөлөгчдийн Хурлын дарга О.Эрдэнэ-Өрнөх, Засаг даргын орлогч Ж.Занабазар, болон аймгийн Засаг даргын Тамгын газар, холбогдох хэлтэс, албадын төлөөлөл оролцож байна.
Тус арга хэмжээнд оролцох үеэр орон нутгийн хоршоо, аж ахуйн нэгжүүдийн үйл ажиллагааг танилцуулах, бусад аймаг, бүс нутгийн төлөөлөлтэй туршлага, мэдээлэл солилцох, уул уурхайн салбар дахь тогтвортой хөгжил, хөрөнгө оруулалтын боломж, төр-хувийн хэвшлийн хамтын ажиллагааны шинэ гарц, боломжуудыг эрэлхийлэх зэрэг чиглэлээр оролцож байна.
“Mining Week – Бүсчилсэн хөгжил” арга хэмжээ нь бүс нутгуудад бизнесийн таатай орчин бүрдүүлэх, хөрөнгө оруулалт татах, баялаг бүтээгчдийг дэмжих, тогтвортой хөгжлийн загваруудыг хэлэлцэх чухал хурал, уулзалт бөгөөд уул уурхайн гол бүс нутаг болох Өмнөговь аймгийн хувьд онцгой ач холбогдолтой юм.
