НИТХ-ын ээлжит бус VII хуралдаанаар “Нийслэлийн Засаг дарга бөгөөд Улаанбаатар хотын Захирагчийн 2024-2028 оны үйл ажиллагааны хөтөлбөрт нэмэлт, өөрчлөлт оруулах тухай, Нийслэлийн хөгжлийн 2026 оны төлөвлөгөө батлах тухай, Нийслэлийн 2025 оны төсөвт нэмэлт, өөрчлөлт оруулах тухай асуудлыг хэлэлцлээ. Тухайн асуудлыг Нийслэлийн Засаг даргын орлогч Т.Даваадалай танилцууллаа.
Агуулгын хувьд 5 бодлого, 25 зорилго, 208 зорилт хэрэгжүүлнэ
Нийслэлийн Засаг дарга бөгөөд Улаанбаатар хотын Захирагчийн 2024-2028 оны үйл ажиллагааны хөтөлбөрт батлагдсан нийт 208 зорилтын 43 хувь буюу 89 зорилтыг шинээр тусгаж, 57 хувь 119 зорилтыг үргэлжлүүлэн хэрэгжүүлэхээр тусгасан байна. Мөн НИТХ-ын намын бүлгүүдээс хөтөлбөрт тусгуулахаар нийт 36 санал гарснаас 16 саналын хүрээнд 12 зорилтыг шинээр нэмэлт өөрчлөлтөд тусгасан байна. Агуулгын хувьд 5 бодлого, 25 зорилго, 208 зорилт болон нийслэлд хэрэгжүүлэх 12 томоохон төслийг хэрэгжүүлэхээр тусгасан байна.
Нийслэлийн хөгжлийн 2026 оны төлөвлөгөөг дараах 5 бодлогын хүрээнд боловсруулав
“Нийслэлийн хөгжлийн 2026 оны төлөвлөгөө” төслийг хуульд заасан зарчмын дагуу НИТХ-ын 2024 оны 24/08 дугаар тогтоолоор баталсан "Нийслэлийн Засаг дарга бөгөөд Улаанбаатар хотын Захирагчийн 2024- 2028 оны уйл ажиллагааны хөтөлбөр"-т туссан 5 зорилго, 195 зорилт, УИХ-ын 2025 оны 48 дугаар тогтоолоор батлагдсан "Монгол улсын хөгжлийн 2026 оны Нийслэлийн хөгжлийн 2026 оны төлөвлөгөөний төслийг боловсруулсан байна.
-Бүсчилсэн хөгжлийн бодлогод 67 зорилтыг хэрэгжүүлэхэд чиглэсэн 9 их наяд 291.1 тэрбум төгрөгийн санхүүжих дүнтэй 170 төсөл, арга хэмжээ,
-Хүний хөгжлийн бодлогод 33 зорилтыг хэрэгжүүлэхэд чиглэсэн 397.7 тэрбум төгрөгийн санхүүжих дүнтэй 115 төсөл, арга хэмжээ,
-Эдийн засгийн бодлогод 29 зорилтыг хэрэгжүүлэхэд чиглэсэн 552.2 тэрбум төгрөгийн санхүүжих дүнтэй 57 төсөл, арга хэмжээ,
-Ногоон хөгжлийн бодлогод 21 зорилтыг хэрэгжүүлэхэд чиглэсэн 651.3 тэрбум төгрөгийн санхүүжих дүнтэй 56 төсөл, арга хэмжээ,
-Засаглалын бодлогод 40 зорилтыг хэрэгжүүлэхэд чиглэсэн 42.8 тэрбум төгрөгийн санхүүжих дүнтэй 51 төсөл, арга хэмжээ туссан байна.
Өвөлжилтийн бэлтгэл хангахтай холбоотойгоор төсөвт нэмэлт өөрчлөлт оруулна
"Нийслэлийн 2025 оны төсөвт нэмэлт, өөрчлөлт оруулах” тогтоолын төсөлд нийт 14.4 тэрбум төгрөгийн тодотгол оруулахаар тусгасан байна. Урсгал зардлыг 1 тэрбум төгрөгөөр нэмэгдүүлж байгаа бол хөрөнгө оруулалтын зардалд 13.4 тэрбум төгрөгийг нэмэгдүүлэхээр тусгажээ. Хөрөнгө оруулалтын зардал нэмэгдсэн гол шалтгаан нь 2025-206 оны өвөлжилтийн бэлтгэл ажилтай холбоотой юм. Тодруулбал, медлинг түлшний тээвэрлэлт, 32 мянган халаалтын зуух, 45 мянган өрхөд алсын зайн угаарын хий мэдрэгч суурилуулах шаардлагатай байгаа юм.
Ингээд Нийслэлийн Засаг дарга бөгөөд Улаанбаатар хотын Захирагчийн 2024-2028 оны үйл ажиллагааны хөтөлбөрт нэмэлт, өөрчлөлт оруулах тухай, Нийслэлийн хөгжлийн 2026 оны төлөвлөгөө батлах тухай, Нийслэлийн 2025 оны төсөвт нэмэлт, өөрчлөлт оруулах тухай зэрэг асуудлыг НИТХ-ын ээлжит бус VII хуралдааны II хэлэлцүүлгээр буюу ирэх долоо хоногт дахин хэлэлцэхээр боллоо.
