Монгол Улсын Үндсэн хуульд зааснаар Байгалийн баялаг ард түмний мэдэлд байдаг. Тэр тусмаа төрийн оролцоотойгоор хайгуулыг хийж нөөцийг тогтоосон байгалийн баялагийн тодорхой хувийг төр эзэмших хуультай.
Гэтэл Эрдэнэт үйлдвэрийн овоолгыг түшиглэн бий болсон “Зэс эрдэнийн хувь” гэдэг компани Эрдэнэтийн 24500 иргэний нэрийг барьж, Эрдэнэт үйлдвэрээс 8А, 12 овоолгыг ашиглах гэрээ байгуулан ажиллаж байгаа атал цөөн хэдэн хүн 70 хувийн хувьцааг нь эзэмшиж, цөөн хэдэн хүмүүс ашиг олсоор байна.
Анх 2010 Д.Алтанхуяг гэдэг хүн санаачилга гаргаж Орхон аймгийн 24552 иргэний нэрийг оролцуулаад “Зэс эрдэнийн хувь” нэртэй хувьцаат компани байгуулсан. Улмаар 2015 онд тус компани нь аймгийн ИТХ, “Эрдэнэт үйлдвэр” ХХК-тай зөвшилцөлд хүрсэн тухай зарлаж, “…Овоолгыг түшиглэн жилд 5000 тонн катодын зэс үйлдвэрлэх хүчин чадалтай үйлдвэр байгуулах” гэрээнд гарын үсэг зурсан.
Дараа нь 2020 оноос “Бльюмон металс” ХХК 36, Орхон аймгийн 24552 иргэн 30 хувь, “Эрдэнэт үйлдвэр” ТӨҮГ 34 хувийг эзэмших болсон. Улмаар “Бльюмон металс” ХХК 70 хувь эзэмшиж, Орхон аймгийн 24552 иргэн 30 хувиа эзэмшиж үлдсэн. 2023 оноос тус компанийн 30 хувь бас өөр эзэмшигчид шилжсэн. Тэгвэл өнгөрсөн долоо хоногт “Зэс эрдэнийн хувь”-ийн хувьцаа эзэмшигчид дахин өөрчлөгджээ.
Анх тус овоолгыг "Зэс эрдэнийн хувь" ХХК-д өгөхөд Эрдэнэтийн 24500 иргэн тус компанийн 74 %-ийг эзэмшдэг байсан бол өдгөө 24500 иргэн 22 хувь болж буусан аж. Харин эрх мэдэлтнүүд 70 %-ийн хувьцааг нь эзэмшихийн зэрэгцээ тус компаниас олох ашгийг 70 хувийг хүртсээр байна.
Хамгийн сонирхолтой нь аливаа компани хөрөнгө оруулалт оруулалт хийж банкнаас зээл авахдаа байж болох бүхий л нөөц боломжоо эрэлхийлдэг бол бол эрх мэдэлтнүүдийн нөлөөлтэй гэх "Зэс эрдэнийн хувь" ХХК нь зэсийн овоолго болон ирээдүйд олох мөнгөн орлогоо барьцаалж зээл авсан байх юм.
Хэрвээ “Бльюмон металс” ХХК, "Зэс эрдэнийн хувь" ХК-д хөрөнгө оруулалт хийх нэрээр "халхавчлан" Эрдэнэт хотын 24500 иргэдийн хувийг бууруулах байсан бол Эрдэнэт үйлдвэр "Зэс эрдэнийн хувь" ХК-д 8А, 12-р овоолгоо өгөхгүй байсан бизээ.
Товчхондоо Эрдэнэт хотын 24500 хувьцаа эзэмшигч иргэдийн нэрээр халхавчлан "Зэс эрдэнийн хувь" компаниас улс төрийн нөлөө бүхий хүмүүс, тэдний хөл бологсод асар их хэмжээний ашиг хүртсээр байгааг бид энэ удаад онцолж байна.
ҮРГЭЛЖЛҮҮЛЭН БИД БАРИМТ НОТОЛГООТОЙГООР МЭДЭЭЛЛИЙГ ЦУВРАЛАР ХҮРГЭХ БОЛНО...
Amlalt.mn
