ИЗНН-ын дэргэдэх Хангарьд жигүүрийн зарим гишүүд 2026 оны 02 сарын 07-ний өдөр хуралдаж ИЗНН-ын шинэчлэл, хууль дээдлэх ёс ба намын Онц их хурлыг хуралдуулах асуудлаар хэлэлцлээ.

Хэлэлцүүлэгт УИХ-ын гишүүн Р.Батболд, ИЗНН-ын тэргүүн дэд дарга С.Батбаатар, ИЗНН-ын Дэд дарга Т.Бат-Эрдэнэ, ИЗНН-ын Ахмадын хорооны дарга, доктор, профессор Л.Дашням, Намын орон нутгийн төлөөллөөс Дорнод аймгийн намын хорооны дарга Б.Оюунчимэг, Ховд аймгийн намын хорооны дарга Г.Баяртогтох, ХУД-ийн намын хорооны ахмадын дарга Г.Элбэгсайхан, ИЗНН-ын ахмад гишүүн Б.Цэнд нар оролцлоо.

ИЗНН-ын дүрмийг Дээд шүүхэд бүртгэхгүй байгаа шалтгаан, ИЗНН-ын Санхүүгийн тайлан ба сонгуулийн төв байгууллагын дүгнэлт, ИЗНН-ын Онц их хурал зарлах шаардлага, эрх зүйн гаргалгаа зэрэг сэдвийн хүрээнд хэлэлцүүлэг өрнөлөө.

Хэлэлцүүлэгт оролцогчид “Монгол Улсын Дээд шүүх аливаа намын дүрмийг хуульд нийцүүлэн бүртгэнэ. Гэтэл ИЗНН-ын дарга Б.Батбаатар намын дүрмийг боловсруулахдаа намын анхан шатны нэгж, жирийн гишүүдийн дуу хоолойг тусгаагүй, намын салбар болон бүтцийн нэгжийг татан буулгах үндэслэл, журмыг намын дүрмээр зохицуулаагүй зэрэг шалтгааны улмаас Улсын дээд шүүхээс ИЗНН-ын дүрэм 4 удаа буцаагдсан" нь ИЗНН-ын дарга Б.Батбаатарын хариуцлагагүй, эрх мэдлийг өөртөө хэт төвлөрүүлсэн, гишүүдийн сонгох сонгогдох эрхийг дүрмэндээ тусгаж чадаагүй, товчхондоо намын тухай хуульд дүрмээ нийцүүлэн боловсруулаагүйтэй холбоотой гэдгийг онцлов.

Намын санхүүжилтийн тухайд санхүүжилт шилэн бус, удирдах албан тушаалтнууддаа төдийгүй гишүүддээ мэдээлэл өгдөггүй хаалттай байдаг, өнгөрсөн жилийн баяр наадмын өмнө наадам хийхэд “нам мөнгөгүй байна” хэмээн гишүүд, удирдах албан тушаалтнуудаас намын татвар хандив татан төвлөрүүлж авсан атал үнэндээ бүр наадмаас өмнө 5-р сард төрөөс ИЗНН-д олгосон 455 сая төгрөгийг авчихсан байсныг бүр намын гишүүд бид хожим 9 сард мэдсэн.

Намын төв аппаратад 1-2 хүн орон тооны ажилладаг атал бэлтгэн нийлүүлэлт нэрээр 300-400 сая төгрөг зарцуулдаг тухай санхүүгийн тайланд тусгасан нь энэ нь юунд зарцуулсан нь ойлгомжгүй, мөн Намын тухай хуульд заасанчлан төрөөс ИЗНН-д олгосон зардлын тодорхой хувийг буюу санхүүжилтийн 30 орчим хувийг намын дэргэдэх Ахмад, Эмэгтэйчүүд, Залуучуудын хорооны үйл ажиллагаанд зарцуулах ёстой ч өөр зүйлд, зориулалтын бусаар зарцуулсан байх магадлалтай, нам зээл авсан гэдэг ч юуны учир, ямар шалтгаанаар, авсан зээлээ юунд зарцуулсан тухай мэдээлэл хаалттай байгааг Хангарьд жигүүрийн гишүүд хэлж байв.

Иймд цаашид ИЗНН-ын санхүүжилттэй холбоотойгоор хөндлөнгийн аудит оруулж, зөрчилтэй эсэхийг нь нягтлуулах нь зүйтэй гэдэг дээр хэлэлцүүлэгт оролцогчид санал нэгдэв.

ИЗНН дээд шүүхэд дүрмээ батлуулж чадалгүй дөрвөн удаа буцаагдчихсан, намын санхүүжилт нь тодорхой биш, нам бүхэлдээ нэг хүний хувийн компани шиг болчихсон, ах дүү найз нөхдөөр нь намын Дүрмийн хороо болон Үндэсний хороо, Улс төрийн зөвлөл дүүрчихсэн зэрэг нөхцөл байдлын улмаас ойрын хугацаанд ИЗНН-ын ОНЦ ИХ ХУРАЛЫГ зарлан хуралдуулах нь зүйтэй гэдэг дээр санал нэгдэж, намын гишүүддээ уриалахаар тогтлоо.

Амлалт.мн