Монгол Улсын Ерөнхий сайдаар ажиллаж байсан хүний үг яриа хариуцлагатай гэж ойлгож байгаа. Гэтэл өчигдөр NTV телевизийн “Лхагвын тойм” шууд ярилцлагад орох үеэрээ Ерөнхийлөгч асан Х.Баттулгын тухай “ноцтой” мэдээлэл хэлэв.

Түүний хэлснээр бол Ерөнхийлөгч асан Х.Баттулга, одоогийн Ерөнхийлөгч У.Хүрэлсүх хоёр “сайн найзууд” бөгөөд “Баттулгагүй Хүрэлсүх, Хүрэлсүхгүй Баттулга” гэж байхгүй гэв.

Энэ ярианд итгэе гэж бодовч итгэл ерөөс төрөхгүй юм. Учир нь Ерөнхий сайд асан Л.Оюун-Эрдэнийн эцэг нэгт төрсөн ах, Херо студийн захирал Б.Баатар бол Женко Х.Баттулгатай “эртний найзууд”. Л.Оюун-Эрдэнэ Баатар ахаараа дамжуулж, Женкотой ойр дотно байсан хүн.

Ерөнхийлөгч У.Хүрэлсүх, өмнө нь Ерөнхийлөгч байсан Х.Баттулгатай ойр дотно, найз нөхөд, ашиг сонирхолын хувьд ойр дотно байсан гэх ямар ч мэдээлэл сошиал орчинд байхгүй. Тэгээд ч нэг нь МАН-аас нэр дэвшин Ерөнхийлөгч болсон, өнөөх нь өмнө нь АН-аас нэр дэвшин Ерөнхийлөгч болж байсан хүмүүс. Тиймээс түүний яриад итгэхэд бэрх.

Дээр нь МАН-ын дарга байсан У.Хүрэлсүх МАН-аас сонгогдон Ерөнхий сайд болсон Л.Оюун-Эрдэнэд хандан АН-ын гишүүн Х.Баттулгыг спортын зөвлөхөөрөө авчих гэж хэлсэн гэхэд итгэл төрөхгүй байна.

Харин Л.Оюун-Эрдэнийн ах Херо Баатар Женко Х.Баттулгатай ойр дотно, найз нөхөд, уран бүтээлийн хамтрагч байсныхаа хувьд дүүдээ хэлж, зөвлөж, Ерөнхийлөгч асан Х.Баттулгыг дэргэдээ авчих гэж хэлсэн гэвэл хэн хүн итгэнэ биз.

Амундрагийн тухайд ч мөн адил. Бодь группын охин компанийн захирлыг ажилд авчих гэж Ерөнхийлөгч У.Хүрэлсүх захиж хэлсэн гэдгээ Ерөнхий сайд асан Л.Оюун-Эрдэнэ нотлоно бизээ. Харин Ерөнхий сайд асан Л.Оюун-Эрдэнэ Амундраг өөрөө татаж, Баатар ахтайгаа цуг Ковидын үед “Мэдээллийн урсгал” зэрэг контент хийлгэж, пиардаа ажиллуулж байсныг хэлэх хүн олон.

Ю.Баатар

amlalt.mn