Улсын Их Хурлын гишүүн Э.Батшугарыг Эрүүл мэндийн сайдаар томилохдоо Ерөнхий сайд Н.Учрал нэгэн чухал тайлбар хийж байв. Тэрээр “Э.Батшугар эмч биш ч чадварлаг эдийн засагчийн хувьд эрүүл мэндийн салбарын менежментийг сайжруулж чадна” хэмээн онцолсон. Энэ үг олон нийтийн хүлээлтийг өсгөж, салбарын шинэчлэлд итгэх итгэлийг төрүүлсэн юм.

Гэвч удалгүй энэ итгэлд сэв суух нөхцөл үүсэв. Учир нь Эрүүл мэндийн сайд Э.Батшугар нь эм ханган нийлүүлэлтийн чиглэлээр үйл ажиллагаа явуулдаг “Монфарм трейд” ХХК-ийн хувьцаа эзэмшигч төдийгүй эцсийн өмчлөгч болох нь ил болов. Тэрбээр сүүлийн дөрвөн жилийн хугацаанд Авлигатай тэмцэх газарт гаргадаг ХАСХОМ-доо ч үүнийгээ мэдүүлж ирсэн байна.

Харин түүний аав Н.Энхбаяр сэтгүүлчдийн асуултад хариулахдаа уг компанитай хүү нь холбоогүй, аль хэдийн орхисон гэж мэдэгдсэн нь баримттай зөрчилдөж байгаа юм.

Түүнчлэн Н.Энхбаяр “ашиг сонирхлын зөрчил гэдэг нь сайд албан тушаалдаа байхдаа өөрийн компанид давуу байдал олгохгүй байхыг хэлнэ” хэмээн тайлбарласан. Гэвч энэ нь хуулийн ойлголтыг буруу ташаа, хэт явцуу тайлбарласан хэрэг юм. Үнэн хэрэгтээ ашиг сонирхлын зөрчил гэдэг нь нийтийн албан тушаалтан албан үүргээ хэрэгжүүлэх явцад хувийн ашиг сонирхол нь нөлөөлж болзошгүй аливаа нөхцөл байдлыг бүхэлд нь хэлдэг.

Иймд эмийн компанид хувь эзэмшдэг хүн Эрүүл мэндийн сайдын албыг хашиж байгаа нь өөрөө ашиг сонирхлын бодит зөрчил мөн гэж үзэх үндэслэлтэй.

Нөхцөл байдлыг улам ноцтой болгож буй нэг зүйл нь Ерөнхий сайд Н.Учралын өгсөн үүрэг чиглэл юм. Тэрээр Эрүүл мэндийн сайдад “нэн шаардлагатай эм, бүтээгдэхүүний асуудлыг бие даан шийдвэрлэх” эрх олгосон. Энэ нь бодит байдал дээр хувийн ашиг сонирхолтой этгээдэд илүү давуу боломж олгож болзошгүй шийдвэр мэт харагдаж байна.

Эмийн бизнес эрхэлдэг хүн төрийн бодлогын төвшинд шийдвэр гаргах албан тушаалд ажиллах нь зах зээлийн шударга өрсөлдөөнийг алдагдуулах, цаашлаад эмийн салбарт монополь байдал үүсгэх эрсдэлтэй.

Тиймээс асуудлыг тодорхой болгох зайлшгүй шаардлага үүсч байна. Эрүүл мэндийн сайд Э.Батшугар Нэг бол “Монфарм трейд” ХХК дахь хувь эзэмшлээсээ бүрэн татгалзах, нөгөө бол Эрүүл мэндийн сайдын албан тушаалаасаа өөрөө огцрох гэсэн хоёр сонголтын аль нэгийг хийх ёстой болж байна.

Энэ бол ганц хүний асуудал биш. Энэ бол төрийн ёс зүй, нийтийн ашиг сонирхлыг хамгаалах зарчмын шалгуур юм.

Ц.Мөнх

amlalt.mn