Цэнхэр гаргийн спортын хамгийн том үйл явдлын нэг хөлбөмбөгийн дэлхийн аварга шалгаруулах тэмцээн 23 хоногийн дараа буюу зургаадугаар сарын 11-нд эхэлнэ.

23 дахь удаагийн дэлхийн аварга шалгаруулах тэмцээнийг АНУ, Канад, Мексик улсад зохион байгуулах юм. Анх удаа гурван улсад зохион байгуулах тус тэмцээнд 48 орны шигшээ баг оролцоно. Мөн ДАШТ-ий турш анх удаа 108 тоглолт болох юм. Анхдагчаар дүүрэн уг тэмцээнийг Монголоос анх удаа гэрэл зурагчнаар буюу хөлбөмбөгийн ногоон талбайн хажуунаас сурвалжлахаар МУСГЗ, фото сэтгүүлч Ч.Ганбат эрхээ авчээ. Хөлбөмбөгийн ДАШТ-ийг сурвалжлах эрх амархан олддог зүйл биш. Тэрбээр ярихда,а “Монголын хөлбөмбөгийн холбоонд би анх хүсэлт өгсөн. Холбооноос миний хүсэлтийг ФИФА руу уламжилж, эцэст нь сурвалжлах эрх олголоо. Өмнө нь би хоёр, гурван удаа татгалзсан хариу авч байсан. Монгол Улс хөлбөмбөгийн буурай хөгжилтэй орнуудын тоонд багтдаг. Тиймээс шалгуурыг маш өндөр тавьдаг юм байна. Ямартай ч энэ удаа сурвалжлах эрхээ авч чадсандаа маш их баяртай байна. Хэдийгээр эрхээ авсан ч санхүүгийн бэрхшээл гарч байгаа юм. Улсаас ямар ч дэмжлэггүй учраас спортод элэгтэй албан байгууллага, үнэнч фанатуудаасаа дэмжлэг хүсэхээс өөр арга олдсонгүй. Та бүхнээсээ дэмжлэг хүсэж байна” гэв.

Хөлбөмбөгийн ДАШТ-ийг өмнө нь “Таван цагариг” сонины сэтгүүлч Ц.Энхтүвшин сурвалжилж байсан бол энэ удаа гэрэл зурагчин Ч.Ганбаттай хорших нь ээ. 23-хан хоногийн дараа хөшгөө нээх ДАШТ-ийг дэлхий даяар 5.8 тэрбум хүн телевизээр шууд хүлээн авч үзэх урьдчилсан тооцоо гарсан байна.

Тэгвэл Монголын хөлбөмбөг сонирхогчид MME international Sports Mongolia-ийн албан ёсны эрхээр НТВ, МҮОНТВ, Боловсрол, Сүлд гэсэн дөрвөн телевизээр ДАШТ-ий тоглолтуудыг хүлээн авах юм. Харин Олон улсын хөлбөмбөгийн холбооны мандатаар ДАШТ зохиогдох гурван улс, тоглолтууд болох 16 хот, цэнгэлдэхэд ажиллах эрхийг Монголоос анх удаа хоёр сэтгүүлч авч байгаа юм. ФИФА-ийн зүгээс тавьдаг мэргэжлийн маш өндөр шаардлага, шалгуур, сорилт, болзлыг ханган сэтгүүлч Ц.Энхтүвшин дөрөв, гэрэл зургийн сурвалжлагч Ч.Ганбат анх удаа эрхээ авсан нь энэ. Тэд хөлбөмбөг сонирхогчид, үнэнч фанатуудад албан ёсны мэдээ, мэдээлэл болон гэрэл зургийг хүртээмжтэй, олон сувгаар хүргэхээр зэхэж байгаа бөгөөд хамтран ажиллах сонин, сэтгүүл, сайт болон байгууллагуудад нээлттэй гэдгийг дуулгалаа.

Хөлбөмбөгийн ДАШТ-д анх удаа гэрэл зургийн сурвалжлагчаар ажиллах Ч.Ганбатын хувьд олимп болон тив, дэлхийн нэр хүндтэй 30 гаруй тэмцээнд сурвалжлагчаар ажиллаж, агшин бүрийг алдалгүй хүргэж байсан билээ. Тухайлбал, өвлийн хоёр, зуны дөрвөн олимп, Азийн зургаан наадамд ажилласнаас гадна жүдо бөхийн ДАШТ-ийг есөн удаа сурвалжилсан юм.

Эх сурвалж: Montsame.mn