Баянгол дүүргийн нутаг дэвсгэр дээр үйл ажиллагаа явуулж буй төрийн болон хувийн хэвшлийн эрүүл мэндийн байгууллагуудын дунд өнөөдөр Яаралтай тусламжийн “ДУУДЛАГА–2026” тэмцээнийг зохион байгуулж байна.

Эмч, сувилагч, эмнэлгийн мэргэжилтнүүдийн дунд эмнэлзүйн стандарт, удирдамжийн дагуу яаралтай үед амилуулах болон лавшруулах, амь тэнссэн үед яаралтай тусламжийн үйлчилгээг багаар үзүүлэх мэдлэг, ур чадвар, хандлагыг төлөвшүүлэх зорилготой зохион байгуулж буй энэ тэмцээнд Улсын Гуравдугаар төв эмнэлэг, Гэмтэл Согог судлалын үндэсний төв, дүүргийн Эрүүл мэндийн төв, Төмөр замын төв эмнэлэг, Өрхийн эрүүл мэндийн төвүүд, Гурван гал нэгдсэн эмнэлэг, Асралт мед эмнэлэг, “Номун” эмнэлэг болон ЕБС-ийн эмч нараас бүрдсэн 9 багийн 45 эмч, сувилагч оролцож байна.

Тэмцээний нээлтийн үйл ажиллагаанд Баянгол дүүргийн ЗДТГ-ын Нийгмийн хөгжлийн хэлтсийн дарга З.Балдандугар, Хүний гавьяат эмч, АУ-ны магистр, клиникийн профессор, зөвлөх зэргийн эмч, С.Алтансүх болон бусад зочид төлөөлөгчид оролцлоо.

Тэмцээнийг Баянгол дүүргийн ЗДТГ, дүүргийн Биеийн тамир спортын хороо, ЭМЯ-ны Яаралтай тусламж судлалын мэргэжлийн салбар зөвлөл, Монголын яаралтай тусламжийн нийгэмлэг, дүүргийн Өрхийн анагаах ухааны мэргэжилтнүүдийн холбооны салбар зөвлөл хамтран зохион байгуулж байна.

Тэмцээний шүүгчээр Нийгмийн эрүүл мэндийн магистр, Монголын яаралтай тусламжийн нийгэмлэгийн тэргүүн, тэргүүлэх зэргийн эмч Ж.Уламсайхан, Цэргийн төв эмнэлгийн ЯТТ-ийн эрхлэгч, ахлах зэргийн эмч Т.Чойсүрэн, Удирдахуйн ухааны магистр, хүүхдийн ахлах зэргийн эмч Д.Солонго, Улсын хоёрдугаар төв эмнэлгийн ЯТТ-ийн эмч Ц.Энэбиш, Улсын нэгдүгээр төв эмнэлгийн ЯТТ-ийн ахлах зэргийн Д.Цэрмаа ажиллаж байна.

Баянгол Дүүрэг ИТХАА