Ерөнхий сайд Л.Оюун-Эрдэнэ Чингис хааны мэндэлсний 860 жилийн ойг тохиолдуулж Хэнтий аймгийн Дадал сумын нутаг дахь Чингис хааны гэрэлт хөшөөнд цэцэг өргөж, хүндэтгэл үзүүллээ.
Эзэн богд Чингис хаан бол нийт монголчуудын эв нэгдлийн тулгуур, үндэстний шүтээн гэдгийг Ерөнхий сайд хэлсэн үгэндээ онцолсон юм.
Тэрбээр “Хэнтий аймаг Их эзэн Чингис хааны өлгий нутаг учраас Монгол Улсын Засгийн газраас Хэнтий аймгийг түүхэн аялал жуулчлалын бүс болгон зарласан. Ингэснээр Хэнтий аймагт түүхэн аялал жуулчлал хөгжиж, тус аймаг төсвийн орлогоо бие даан бүрдүүлэх улмаар орон нутгийн иргэдийн орлого нэмэгдэх боломжтой.
Чингис хааны мэндэлсний 860 жилийн тэгш ойг тохиолдуулж, Их хааны мэндэлсэн нутаг Хэнтий аймгийн Дадал суманд олон улсын жишигт нийцсэн “Чингис хаан аялал жуулчлалын цогцолбор”-ыг Азийн хөгжлийн банкны санхүүжилтээр эхлүүлж байгаа.
Монгол Улсын Засгийн газрын шийдвэрийн хүрээнд төр, хувийн хэвшлийн түншлэл болон хөрөнгө оруулалтаар олон бүтээн байгуулалт өрнүүлж, Монголын нууц товчооны түүхэн дурсгалт газруудыг авто замаар холбох, зүүн бүсийн транзит тээврийн өрсөлдөх чадварыг нэмэгдүүлэхээр ажиллаж байна” гэлээ.
Ташрамд дурдахад, Ерөнхий сайд энэ сарын 18-нд Хэнтий аймгийн Чингис хотод зохиогдсон зүүн бүсийн аялал жуулчлалын зөвлөгөөнд оролцох үеэрээ “Чингис хааны аялал жуулчлалын цогцолборын нээлтийг ирэх оны дөрөвдүгээр сард Хэнтий аймагт хийнэ” хэмээн мэдэгдэж байсан юм.
