Нийслэлчүүдийн толгойны өвчин болсон нэг томоохон асуудал бол нийтийн тээврийн чанаргүй, хүрэлцээгүй байдал юм. Ялангуяа хүйтний цагт бол бүр ч бэрх.
Нэг чиглэлд харьцангуй цөөн тооны автобус явж байгаагаас шалтгаалж, иргэд олон цагаар гадаа зогсон, цаг хугацаа, эрүүл мэндээрээ хохирсоор байна. Өглөө оройд автобусны буудлууд дээр багахан хэмжээний “дайн” өрнөдөг гээд хэлэхэд хилсдэхгүй.
Хүлээлгэн хүлээлгэн ирсэн автобус нь хүн багтахын эцэсгүй дүүрэн. Яаж ийгээд шингэе гэвч ижил хүсэлтэй олны дундаас “сугарна” гэдэг хэцүү. Дараагийнхыг нь хүлээнэ гэдэг бол бүр ч давшгүй даваа. Ийм л дүр зураг хэдэн жил үргэлжилж, үүнийг засна гэсэн дарга нар ч хэдэн жил “баарч” байна.
Нийтийн тээврийн парк шинэчлэлтийн асуудал “эрт балрын” үеэс л яригдсаар ирсэн. Гэвч манай “аваргуудын” ам нь түрүүлж, ажил нь хоцорсоор өнөөдөр дээрдсэн зүйл огтоос алга.
Өнгөрсөн тавдугаар сарын 18-нд болсон Засгийн газрын хуралдааны үеэр Нийслэлийн Засаг дарга бөгөөд Улаанбаатар хотын захирагч Д.Сумъяабазар “Нийтийн тээврийн парк шинэчлэлтийн хүрээнд 1432 автобусыг шинээр захиалахаар төлөвлөсөн. Үүний 50 хувийг энэ ондоо багтаан авч, үйлчилгээнд нэвтрүүлнэ” хэмээн сүрхий сайхан амлалт өгсөн.
Амлалтыг нь чимээлсэн иргэд “Түгжрэлтэй байсан ч ядаж энэ өвөл автобус хүлээн даарч хөрч, чихэлдэж, шахцалдах асуудал гарахгүй нь” хэмээн битүүхэндээ баярлаж байсныг ч нуух юун.
Олны энэ бодлыг бататгасан мэт 11 дүгээр сарын 14-ний өдөр зохиогдсон “Хотын соёл, хотын стандарт” зөвлөгөөний үеэр НЗД-ын захиргаа, хууль эрх зүйн асуудал хариуцсан ахлах зөвлөх Д.Мөнх-Эрдэнэ “Хотын стандартын дагуу эхний ээлжийн автобуснууд ороод ирсэн. Цаашид энэ ондоо багтаад 234 автобусыг нэмж авчирна. Засгийн газрын зүгээс Нийтийн тээврийн парк шинэчлэлтийг иж бүрэн хийх гэж байна” хэмээн итгэлтэйгээр мэдэгдсэн юм.
Үүнийг сонссоны дараа л үнэхээр олон жилийн турш “үлгэр” мэт явсан Нийтийн тээврийн парк шинэчлэлтийн асуудал энэ жилээс шинэ төвшинд хүрэх нь хэмээн сэтгэл тэнүүн “амьсгалах” багахан итгэл төрөв.
Гэвч бодит байдал өөр байлаа. Өнөөх сайхан амлалтуудын ард манай дарга нарын өөрсдийнхөө “толгойг хамгаалсан” хоосон хийрхэл л нуугдаж байсан бололтой.
Энэ долоо хоногт болсон Засгийн газрын ээлжит хуралдааны дараа УИХ-ын гишүүн, Хот хариуцсан сайд Ж.Сүхбаатар “Төсвийн эх үүсвэргүй болсон учир төлөвлөсөн автобуснуудаа авч чадахгүй боллоо” гэж хээв нэг мэдэгдэл хийж байх юм.
Ахиад л үр дүнгүй ажил, үр дүнгүй амлалтууд...
Нийтийн тээвэрт багтах эс багтахын дэнчингээр хүйтэн жаварт алгадуулж, хөл гараа хөлдөөх нь халаг юм болж байж л нэг юм иргэд нь унаатайгаа золгодог энэ байдлыг хэзээ бид халах юм бэ?
Хотын хөгжил, улс орны хөгжил нийтийн тээврийн хөгжилтэй салшгүй холбоотойг уг нь бүгд гадарлаж л баймаар. “Хөгжсөн хот гэж хүн болгон нь нийтийн тээврээр зорчдог хотыг хэлнэ” гэсэн тодорхойлолт хүртэл байдгийг манай “томчууд” олоод харчихаасай. Тэгвэл арай өөрийг сэтгэх ч юм шиг...
Ард иргэдээ тоглоом, шоглоом мэт үздэг “адтай” энэ сайд, дарга нарыг чухам яалтай. Уулзалт, чуулган, камерын өмнө сүрхий амладаг, хожим хойно амыг нь асуухаар “мэлзэж, аргацаадаг” ийм л түшээд, тийм л төр ардыг засаж байгаа нь дэндүү харамсалтай.
Д.Сүрэн
