Төрийн эрх барих дээд байгууллага УИХ-ын гишүүд тун зохисгүй байна. Тэдэнд ёс суртахуун алга, эх оронч сэтгэл алга, өр нинжин ч алга, хариуцлага бүр алга. Ч.Ундрам гэж гишүүн гэр бүлээсээ гурван удаа салсан гээд ярьж байна. Ойлгомоор ч, ойлгомооргүй. Нөхрийнхөө өөрт нь өгсөн амлалтыг “Улаан бал”-аар уншаад сууж байна. Нэн зохисгүй.
Угтаа бол Сэлэнгэчүүдэд өгсөн амлалтаа уншаад сууж баймаар. За, энэ хүүхний явдал ч бага хэрэг бололтой. Яагаад гэхээр энэ хүүхэн би хүн алаагүй гэж бас хэллээ. Энэ Үнэн. Ойрмогхон УИХ-ын эрхэм гишүүн Б.Баттөмөр өөрийн сонгогдсон тойрогтоо гурван хүнээр тэнгэр тахилаа. Гишүүн мэдээж тэднийг юу л гэж гардан тийн насан эцэс болгох билээ. Энэ тодорхой. Гэвч бас тодорхой нь түүний сонгогдсон тойрогт байдаг, өөрийн нь бизнесийн талбарын шатахуун түгээх станцын нөөцийн агуулах дэлбэрч гурвын гурван хүнийг үгүй хийчихлээ. Дэндүү харамсалтай энэ хэрэг явдал нүүрсчдийн эсрэг жагсаал, Ч.Ундрамын явдалд дарагдаад өнгөрч байх шиг байна. Монгол шатахууны хараат орон. Үүнийг Б.Баттөмөр, Ц.Анандбазар нар эрхшээн зохицуулж, ОХУ-аас бензин оруулж ирж, ачлалтын дүрээр УИХ-д суун, бидний оройд залрах бөгөөд, нохой засуулсан хүндээ янагын үлгэрээр тэдний үзэмж, сүрээр Монголчууд унаагаа хөдөлгөх билээ. Үнэ өндөр, өрсөлдөөн байхгүй, салбарынхнаа хавчин хяхах эдний боорлол дор монголчууд тэрэг техникээ хөдөлгөн амьдарсаар удлаа. Сая харин Ерөнхий сайд Л.Оюун-Эрдэнэ зарлаж байгаад, эрх зүйн зохицуулалт хийж, онгоцны шатахууныг он удаан жил ганцаар шахан тарвалзаж байсан Ц.Анандбазарт тас тавьж, өрсөлдөөн шалгарлын гарцыг нээв бололтой. Аргагүй дээ, аялал жуулчлал хөгжихгүй байгаагийн учир энд буйг Ерөнхий сайд мэдэж л байгаа. Дөрвөн зуун сая биш гэхэд дөрвөн сая жуулчин ирдэг болчихвол юутай сайхан.
Ц. Анандбазарын хормой хотын явдлыг больё, ард түмнээ ингээд шулдгийг нь болиулах арга хэмжээ авч эхэлсэн нь эерэг. Монголчууд газрын тосоо урд хөршид зөөж, хойт хөршөөс бензинээ авдаг гутамшгийг хүн төрөлхтөн ойлгохгүй гэсэн утга бүхий үгийг Ч.Хурц сайд гаслан хэлсэн байдаг. Ер нь монголчуудыг газрын тосыг нь жинхэнэ утгаар нь ашиглуулахгүй, эцсийн бүтээгдэхүүн болгуулахгүй байх шалтгааны гол эзэд бол Б.Баттөмөр, Ц.Анандбазар нар болох нь хэнд ч ойлгомжтой. Үндэстнийхээ эрх ашгийн эсрэг байдаг ийм хүмүүсийг төрд байлган, дээш залдгийг Ардын намын айхтар дарга, өөрчлөлтийг хийж эхлэхээ өчигдөр давтан зарласан Л. Оюун-Эрдэнэ онцгой ойлгож, байранд нь тавиасай билээ.
Шатахуун хийдэг түүхий эдийг оруулж ирэхэд тавьдаг хориг саадаа цуцал, эрх зүйгээ тодорхой болгооч ээ. Энэ салбарт хөрөнгө оруулалт татаж, үйлдвэр бүтээж, үнэ, өрсөлдөөнийг чөлөөлж, шинэ мэдлэг, боловсролоор тэргүүлэгч алив бүхнийг эдгээр УИХ-д дархлагдсан “хулигаануудаасаа” хамгаалаач, дэмжээч. Тэртээ тэргүй өндөр үнээр авсан жаахан түлшээ монголчууд Улаанбаатарынхаа зам дээр түгжрэн гацан, утаа болгон, уур хилэн нь бадарч байгааг Ерөнхий сайд Л.Оюун-Эрдэнэ мэдэхийн дээдээр мэдэж байгаа . Тэр сөөм ч ухрахгүй гэсэн. Төө биш гэхэд сөөм урагшлаач Ерөнхий сайд аа.
Т.Гарьд
