Г.Зандашатарын парламент Хянан шалгах түр хороогоо ажиллуулж байна. Хөгжлийн банкнаас зээл авсан нөхдүүдийг “ээрэн” байцааж сонсож байна. Энэ зөв. Тэр их мөнгийг ямар хүмүүс зээлээд, яагаад, юу болгочихсон байгааг ард түмэнд нээлттэй харуулж байна.
Казино тоглочихсон хүн байна. Үйлдвэр барьчихсан ч хүн байна. Ямарваа юм үргэлж сайн тал руугаа явж байдгийн үлгэрээр энэ Хянан шалгах түр хорооны сонсгол олон зүйлийг илрүүлэн харуулж байна. Зээл авсан нөхдүүд ямар хариуцлагагүйг харууллаа. Ямар хариуцлагатай байх ёстойг харууллаа. Мөнгөний зарцуулалт ямар ч эмх замбараагүй, хяналтгүй, үр ашиггүй зарцуулагдсаныг харууллаа. Үр ашигтай байлгаж болох боломжтойг харууллаа.
Цөөхөн хүн зээл авч, их боломж эдлэснийг харууллаа. Түмэн олон харлаа. Вестерн Холд гэдэг компани цементийн үйлдвэр барьчихаж. Зээл нь гурав дөрвөн жил савираад байхад үйлдвэрээ босгочихсоныг Түр хорооны дарга Б.Энхбаяр сайшааж байна лээ. Зөв байна. Гангийн үйлдвэр барих гэснээс өгсүүлээд дандаа л зөв санаа, санаачлага байсан ч нийт зээлдэгчид бүгдээрээ хариуцлагатай байж чадаагүй байна.
Хөгжлийн банк бол хөгжлийн төслүүдийг санхүүжүүлэх банк. Гэтэл Хөгжлийн бус зээллэг, хөгжлөөс хөлбөрсөн зээлүүд ч зөндөө байгааг илрүүлж харууллаа. Энэ талаас нь үзэхэд Энхбаяр дарга сайн ажиллажээ, заримдаа мөрдөгч шиг, заримдаа ятган ухуулагч ч шиг, янз бүрээр л асууж байна.
Г.Занданшатар ч сайн чиглүүлсэн шиг байна. Цагтаа гишүүн явсан Магваны Билэгт зээлээрээ хийсэн ажлаа учирлаад сууж байна. За, ямар ч байсан, Хөгжлийн банкны хөрөнгийг хөгжилд, хэрхэн яаж хариуцлагатай зарж байх ёстойг, эргэн УИХ, Төрийн байгууллагууд нь хянан шалгаж, хариуцлагатай байлгахыг энэ Түр хорооны сонсгол нотлон харуулж байна.
Улсын мөнгө уйлдаггүй биш, ямар эмгэнэлтэй уйлж, тэр хэрээр хөгжил хойш суусаныг эл явдал бид бүгдэд тунхаглан харуулж байна. Хөгжлийн банкны зээлээр хөгжүүлсэн төсөл, барьсан үйлдвэрийг Вестерн Холд мэт шууд харуулж байх ёстойг харууллаа.
Зарчмын энэ хандлагаараа Гомбожавын Занданшатар спикерийн парламентынхан оноо авч байна. Итгэл төрүүлж байна.
Одоо нүүрсний хэргийг мөн ийн хэлэлцэн, ус тосыг ялгах хэрэгтэй. Зөвлөлдөх зөвлөлийн асуудлаа ч ингэж, нээлттэй эх орон даяар харуулж, засаглал, парламент, сонгуулийн хууль, намуудын хууль, жендерийн тэгш гээд бүх асуудлыг эл зарчмаар ханган ажиллах хэрэгтэй.
Энэ чинь ард түмэнтэйгээ хийж чадаж байгаа явдал. Ард түмэн парламентийг сонгосон. Сонгосон хүмүүстэйгээ хамт, Үндэсний эрх ашгийн төлөө ажиллах нь гарцаагүй. Залуу бүтээн байгуулагчид, шинэ үеийнхэн нэг юм хэлээд байна. Тэр нь ийм үлгэрлэлгүй ажиллаж, улсын мөнгийг ийм утгагүй түгжсэнд уучлаарай гэж хэлүүлэхийг хүсээд байна. Олон олон залуус ингэж хэлж байна. Олон нийтийн сүлжээнд бичиж байна.
Г.Занданшатар, Б.Энхбаяр нарын энэ сонсгол хойшид эн болж, сайн засаглалыг бүх түвшинд хадгалж чадвал, хийгээд, хөдөлмөрлөөд бүтээх залуус Монголоор дүүрэн байгаа байх аа.
Гол нь итгэл, зарчим шүү дээ.
З. БАЯРАА
AMLALT.MN
