УИХ-ын гишүүн “Ажнай” Д.Бат-Эрдэнэ, Т.Аюурсайхан, Н.Наранбаатар гурвыг ямар нотлох баримтын хүрээнд, ямар үндэслэлүүдээр шалгаж буй тухай маш бодитой таамаглалыг Ubn.mn сайт мэдээлжээ.

Тэнд бичсэнээр “Ажнай” Д.Бат-Эрдэнэ өөртөө их хэмжээний ногдол ашиг хуваарилсан, Капитрон банкаараа дамжуулан мөнгө угаасан хэрэгт шалгагдаж байгаа бол Т.Аюурсайхан морины 3 жүчээ, 700 саяын тансаг орон сууц тэргүүтэй 1.6 тэрбум төгрөгийн хөрөнгийн эх үүсвэрээ тайлбарлаж чадаагүй төдийгүй хөрөнгө мөнгөтэй холбоотой нөлөө бүхий томоохон албан тушаалуудад өөрийн найз нөхдөө томилуулахад улс төрийн дэмжлэг үзүүлж, тэднээр дамжуулж дээрх авлигийн гэмт хэрэг үйлдэр сүлжээ байгуулсан байж болзошгүй хэрэгт шалгагдсан бол Өмнөговь аймгийн Засаг даргаар ажиллаж байсан УИХ-ын гишүүн Н.Наранбаатар “Эрдэнэс тавантолгой” ХК-ийн удирдлагад нөлөөлөн БНХАУ-ын нэр бүхий компаниудтай нүүрс худалдах, худалдан авах гэрээ байгуулуулах давуу байдал бий болгосон хэргээр тус тус шалгагдаж байгаа аж.

Шалгагдаж байгаа гэдэг нь гэмт хэрэг нь нотлогдсон гэсэн үг биш бөгөөд эдгээр гишүүдийн бүрэн эрхийг нь түтгэлзүүлж байж илүү нарийн шалгаж, цаашид гэмт хэрэгт хамааралтай эсэхийг нь хууль хяналтын байгууллага тогтоох юм. Мөн гишүүдийн бүрэн эрхийг түдгэлзүүлнэ гэдэг бол буруутай гэж шийдсэн үйлдэл огт биш. УИХ-ын гишүүний хуулиар хамгаалагдсан эрхийг түр хугацаанд түтгэлзүүлж, энгийн иргэний адил шалгана гэсэн үг. Хэрвээ буруутай нь тогтоогдвол шүүхээс ял авч, буруугүй гэж тогтоогдвол бүрэн эрхээ сэргээлгэх юм.

Хэрэгт холбогдсон гэх гишүүд өөрсдөө "нүүрсний хулгайн хэрэгт холбогдолгүй, намайгт гүтгэж байна" гэж хэлдэг. Гүтгэж байгаа нь үнэн бол тэд өөрсдөө бүрэн эрхээсээ татгалзаж байгаад хууль хяналтын байгууллагаар нэг мөр шалгуулаад, хэрэгт холбогдолгүйгээ тогтоолгож, нэр төрөө сэргээгээд, эргээд нүүр бардам сонгогчдын өмнө, олон нийтийн өмнө дуугарах хэрэгтэй дээ. Ингэхгүйгээр "ангийнханаараа" өөрсдийгөө авч үлдээх арга саам хийж "үлдэх" нь хэтдээ "гэмт хэрэгтэн" гэж олон нийтээр цоллуулах үндэс болно.

А.Галт

Amlalt.mn