Сонгуулийг холимог тогтолцоогоор явуулахдаа иргэд саналаа хэрхэн өгөх талаар УИХ-ын гишүүн Д.Тогтохсүрэн тайлбар өглөө.
Тэрбээр "Гадаадад байгаа иргэд зөвхөн пропорционалиар нэр дэвшиж буй хүмүүст саналаа өгөх боломжтой. Иргэд тойргоосоо өөр газар явахдаа пропорционалиар санал өгөх эрхтэй ч мажоритарт саналаа өгөх эрхгүй. Өөрийн тойрогтоо заавал очиж өгөх ёстой. Энэ нь сонгох сонгогдох эрхийг эдлүүлэх хийгээд олон нийтийг сонгуульд идэвхтэй хамруулахад чухал нөлөөтэй" гэв.
Товчоор бол хуулийн төслийн нэмэлтэд иргэд Монгол Улсын хаана ч явсан пропорциональ системээр саналаа өгөх боломжийг хангаж өгч байгаа гэсэн үг юм. Харин тойрогт нэр дэвшигчдэд саналаа өгөхийн тулд зайлшгүй харьяа газраа очих хэрэгтэй ажээ.
Тэгэхээр иргэн харьяаллаа шилжүүлээгүй байсан ч сонгуульд ямарваа нэгэн байдлаар оролцох эрх нь бүрдэх боломжийг эл хуулийн төсөлд тусгасан гэж ойлгох боломжтой юм.
