Нийслэлийн ИТХ-ын ээлжит XIV хуралдаан болж байна. 2015 онд батлагдсан “Хорооны хэсгийн ахлагчийн ажиллах нийтлэг журам”-ыг шинэчлэн батлах тухай хэлэлцэж байна. Хэлэлцэж байгаа асуудлаар төлөөлөгчид санал дүгнэлтээ хэлж байна.
Шинэчилсэн журмаар хорооны хэсгийн ахлагчийн цалинг нэмэх, ажиллах нөхцлийг сайжруулах зохицуулалт хийгдэх юм. Мөн Хэсгийн ахлагч ээлжийн амралт эдэлдэг болох зэрэг олон давуу талыг олгожээ. Өнгөрсөн хугацаанд хэсгийн ахлагчид ээлжийн амралтгүй ажиллаж иржээ. Мөн шинэчилсэн журмаар хэсгийн ахлагчаар ажиллах иргэдийн нас, болзолд өөрчлөлт орох нь.
Энэ талаар төлөөлөгч Д.Пүрэвдаваа “Гэр хороолол, байшин хорооллын хэсгийн байцаагчдад ижилтгэх зарчмаар яагаад хандаад байгаа юм” гэв.
Нийслэлийн хүн амын тоо эрс нэмэгдэж байгаачлан хорооны тоо ч өссөн байна. Гэр хороололд ажиллаж байгаа хэсгийн ахлагчдын хариуцах өрхийн тоо, орон сууцны хороонд ажиллаж байгаа өрхийн тоотой харьцуулахад харьцангуй их. Иймээс гэр хорооллын хэсгийн ахлагч нарын ажлын ачаалал өндөр аж.
Хэлэлцэж буй журамтай холбогдуулан төлөөлөгч Ү.Оюунзул “Хэсгийн ахлагчид гэдэг бол иргэд, өрхтэй хамгийн ойр ажилладаг хүмүүс. Энэ хэрээрээ тэдний ажлын ачаалал өндөр байдаг. Тэгэхээр тэдгээр хүмүүсийн бүх ажиллах бололцоог нэмж, цалин урамшууллыг бодолцох ёстой. Хэсгийн ахлагчдын цалингийн хувь маш бага байна. Одоогийн цаг үе нөхцөл байдалтай харьцуулахад урамшуулал маш муу гэсэн үг. Үүнийг судалж үзсэн үү.
Мөн иргэдтэй уулзаад явж байхад зарим иргэдээс хэсгийн ахлагчдын талаарх гомдлыг хэлдэг. Халамж, тусламжийг зарим өрхөд илүү давуу байдалтайгаар олгодог гэдэг мэдээлэл байдаг.
Түүнчлэн, хэсгийн ахлагчдын ажиллах нөхцлийг сайжруулна гэсэн байна. Гэтэл бодит байдал дээр хэсгийн ахлагч нарт ороод суух өрөө, компьютер ширээ сандал байдаггүй шүү дээ. Энэ тал дээр ямар боломж гарц гаргалгаа байгаа вэ” хэмээв.
Д.Ганболд “Цалин урамшууллын хувьд 2013 оноос хойш хөдөлмөрийн хөлсийн доод хэмжээг 1.5 дахин нэмэгдүүлсэнтэй тэнцэх мөнгө олгож байгаа. Бусад төрийн албан хаагчдын цалинтай харьцуулахад харьцангуй доогуур байгаа. Ерөнхийдөөө нийслэлийн төрийн албан хаагчдын цалин бусад яам, төрийн агентлагуудаас харьцангуй бага байдаг. Хамгийн сүүлд Засгийн газрын хуралдаанаар Нийслэлийн төрийн албан хаагчдын цалинг 40-50 мянгаар нэмсэн. Гэхдээ хороонд ажиллаж байгаа ажилчдаас хэсгийн ахлагчдын цалин өндөр шүү.
Хувь хүний үзэмжээр иргэдэд хандаж байгаа гэх асуудалд хариулт хэлэхэд, тодорхой журмын дагуу хэсгийн ахлагч нар ажилладаг. Судалгааны дагуу халамж, тусламжийн асуудал явагддаг.
Хэсгийн ахлагч нарын хангамж, нөхцөл байдлыг дээшлүүлэх талаар энэ журманд тусгасан байгаа. Энэ тал дээр дүүрэг болон нийслэлийн түвшинд үе шаттай анхаарч ажиллах шаардлага байгаа” гэдэг хариултыг өглөө.
