2022 оны тавдугаар сарын 31-ний өдрийн Засгийн газрын ээлжит хуралдааны дараа Боловсрол, Шинжлэх ухааны сайд Л.Энх-Амгалан цэцэрлэгийн хүртээмжийг нэмэгдүүлэхтэй холбоотой асуудлаар сэтгүүлчдэд мэдээлэл хийсэн.
Тэрээр "Засгийн газрын хуралдаанаар цэцэрлэгийн хүртээмжийг нэмэгдүүлэх талаар авч хэрэгжүүлэх арга хэмжээний тухай тогтоол батлагдлаа. Улмаар цэцэрлэгт явж чадахгүй байгаа хүүхдүүдийн цэцэрлэгийн хамрагдалтыг нэмэгдүүлэх санхүүгийн эх үүсвэрийг шийдвэрлэв. Хүүхдүүд цэцэрлэгт явж чадахгүй байгаа хэд хэдэн үндэслэл байна. Нэгдүгээрт, манайх бүртгэлээ их буруу гаргадаг. Бүртгэл буруу учир төлөвлөлт буруу болдог. Түүнчлэн санхүүжилтийн механизм нь тодорхой болоогүй байгаатай холбоотой.
Өнөөдөр улсын хэмжээнд сургуулийн өмнөх насны 237 мянган хүүхдийн 75.5 хувь нь цэцэрлэгт хамрагдаж байна. Цаана нь 65 мянга гаруй хүүхэд цэцэрлэгт хамрагдаж чадахгүй байгаа юм. Нийслэлд 2-5 насны нийт 141 мянган хүүхэд байна. Тэдгээрийн 104 мянга нь л хувийн болон улсын цэцэрлэгт хамрагдах боломжтой байна. Энэ намар сугалаагаар цэцэрлэгт орж байгаа хүүхдүүдийн асуудлыг бүрэн шийдвэрлэнэ” гэж хэлсэн билээ.
Тэгвэл өнгөрсөн есдүгээр сард Боловсрол, Шинжлэх ухааны сайд Л.Энх-Амгалан өөрийн цахим хуудсандаа “Цахимаар бүртгүүлсэн 115.000 хүүхэд цэцэрлэгтэй болоод байна. Цэцэрлэгийн сугалаанд багтаж чаддаггүй, цоожтой хаалганы цаана үлддэг 38.000 хүүхдийн 35.000 нь цэцэрлэгтэй болсон. Одоо үлдсэн 3000 хүүхдийг ирэх аравдугаар сарын 15-ны дотор цэцэрлэгтэй болгох боломжийг нээж өгнө. Өмнөх жилүүдийнх шиг хүүхдээ бүртгүүлэх гэж цэцэрлэгийн гадаа хонодог, бухимддаг, цагдаагийн цахилгаан бороохой тачигнадаг, авлига өгч, хэн нэгнийг царай алддаг тэр хар үе ард үлдсэн гэдгийг шууд хэлье ээ” хэмээн бичжээ.
Эндээс харахад Боловсрол, Шинжлэх ухааны сайд Л.Энх-Амгалангийн амлалт 100 хувь ажил хэрэг болж, хэрэгжжээ.
