Эрчим хүчний сайд Б.Чойжилсүрэн ажлаа хүлээж авсныхаа дараа зарим асуудлаар олон нийтэд мэдээлэл өгсөн билээ.
Тэрбээр "Би автоматикч, телемеханикч гэсэн хос мэргэжилтэй. Орчин үеийн хэллэгээр бол мэдээллийн технологийн инженер, цахилгааны инженер гэсэн үг. Энэ салбарт ажиллаж байгаагүй ч, мэргэшиж таван жил сурсан. Юун түрүүнд гурван ажлыг хийх зорилготой байна.
Манай салбар дэд бүтцийг хөгжүүлдэг чухал салбар тул аюулгүй ажиллагаа, техникийн бэлэн байдал нэн тэргүүнд тавигдана.
Өвөл хаяанд ирж байгаа тул өвөлжилтийн бэлтгэлийг системтэйгээр зохион байгуулахыг гол зорилго болгож байна.
Хоёрдугаарт, эрчим хүчний салбар 2019 оноос эхэлсэн ковидын нөхцөл байдал болон ОХУ, Украйны дайнтай холбоотойгоор санхүүгийн хувьд хүнд байдалд байна. Эрчим хүчний бүтээгдэхүүний өртөг ковидын өмнөх үетэй харьцуулахад 30-аас доошгүй хувиар өссөн. Энэ асуудлыг үе шаттайгаар зохицуулах арга хэмжээ авч, хэрэгжүүлнэ.
Гуравдугаарт, төвийн эрчим хүчний систем доголдож эхэлсэн. Иймээс “ТЭЦ III” цахилгаан станцын өргөтгөлийг энэ ондоо багтаж эхлүүлэх ажлыг эрчимжүүлэхээр төлөвлөж байна.
Мөн Таван толгойн цахилгаан станцыг засварлаж, шинэчлэх ажлыг эхлүүлнэ.
“Эгийн гол”-ын цахилгаан станцын ажлыг эхлүүлэх, эх үүсвэрийг олоход анхаарна" гэсэн юм.
