“Эрдэнэс таван толгой” ХК-ийн Гүйцэтгэх захирлын үүргийг түр орлон гүйцэтгэгч, төрийн мэргэшсэн албан хаагч Н.Цэрэнсамбууг өчигдөр /2025.11.06/ УИХ-ын дэд дарга Б.Пүрэвдорж “нүүрсчин” хэмээн цоллон, чамаас асуух зүйл байхгүй хэмээн чуулганы хуралдааныг орхин гарахыг шаардсан.

Тэгвэл Н.Цэрэнсамбуу нь 2011 оноос Сангийн яамны зөвлөхөөс эхлэн ТӨБЗГ-т албаны дарга, Төрийн худалдан авах ажиллагааны газарт Хэлтсийн дарга, ЭТТ ХК-д Санхүү хөрөнгө оруулалтын даргаар ажиллаж байсан мэргэшсэн төрийн албан хаагч нэгэн аж.

Н.Цэрэнсамбуу УИХ-ын Дэд дарга Б.Пүрэвдоржид “хөөгдөн” УИХ-ын чуулганаас гарсныхаа дараа твиттерт “Бүх нүүрсний гэрээг нь ил болголоо. Бүх ачилт, экспортын мэдээллийг мөн ил болгосон. Нүүрсээ хямд зардаг байсныг биржээр үнэтэй нээлттэйгээр зардаг болгох дээр анхнаас нь хүчин зүтгэлээ. Цагаан хаднаас Ганцмод гэж галзуурсан үедээ тонн нь 2000 юань байсан бирж эхэлж буй үед 400 юань шуудхан хэлэхэд зарж буй үнээсээ өндөр байх үед биржийн тээврийг 5 дахин хямд үнээр эхлүүлж, одоо бол бүр 36 мянгаар л Ганцмод хүргэж өгдөг болголоо. Дундаас нь мөнгө олж өндөр ашиг хүртэж байсан олон хүний дургүйг хүргэсэн байх оо. Тийм олон хүмүүс худлаа үнэн хов ярьж эрх ашиг нь язганаж буй бизээ...” гэжээ.

Магадгүй түүний хэлсэнчлэн асуудалд шударгаар ажиллаж, авлига албан тушаалын хэрэгт холбогдолгүй үнэнч зүтгэсний нь төлөө түүнийг элдэв янзын хүмүүс буруутгаж, УИХ-ын дарга Б.Пүрэвдоржид буруу ташаа мэдээлэл хүргэсэн ч байж болох юм. Ямартай ч учир мэдэх хүмүүс “Эрдэнэс таван толгой” ХК-ийн Гүйцэтгэх захирлын үүргийг түр орлон гүйцэтгэгч Н.Цэрэнсамбууг эрхэлсэн ажлаа сайн мэддэг, ЭТТ ХК нүүрсийг биржээр худалдаалах ажлыг гардан зохион байгуулсан, зарчимдаа үнэнч, авлига албан тушаалын нөлөөнд автдаггүй шударга нэгэн гэх юм билээ.

Тиймээс УИХ-ын Дэд дарга Б.Пүрэвдорж та энэ асуудалд нухацтай хандан, барин тавин мэдээлэлгүй байж бусдын ташаа үгэнд автан, төрийн албан хаагч Н.Цэрэнсамбууг “нүүрсний хулгайч” мэтээр буруутгасандаа, түүнээс “уучлалт” эрнэ биз ээ...

А.Галт

Amlalt.mn