Баян-Өлгий аймгаас сонгогдсон үе үеийн олон л гишүүн байлаа. Тилеуханы Аубакир бол илүү иртэй, мөртэй гишүүн байж мэдэхээр харагддаг. Тун буруугүй дуугараад байх шиг анзаарагддаг. Хувийн хэвшлийг дэмжих үзэл санаа нь ялгардаг. Төрийн хамгийн сайн дэмжлэг бол бизнест үл оролцох явдал гэдгийг хэлээд байх шиг байдаг.
Төр хувийн хэвшлийнхний эрх ашгийг хөндөж, бизнест оролцохгүй байхыг тэрбээр нэг бус тодорхой өгүүлсэн. Үйлдвэрлэх, үйлдвэрлэлийн чухлыг хэлээд байдаг нь олзуурхмаар. Мал аж ахуй гаралтай бүтээгдэхүүн, махны экспортыг дэмжих, нэмэгдүүлэх чиглэлд Т.Аубакирыг санаачлагатай ажиллаж байгааг гишүүд хэлэх юм билээ.
Нүүрсийг биржээр зарах, стандарт бизнесийн соёлоор экспортлох тал дээр ч энэ гишүүн эхэнд нь явав бололтой. Таван толгойн өнөөдрийн жаахан ноогдлыг бус, мөнөөх ноогдлоор угаах баяжуулах үйлдвэр барьж, үйлдвэрийн бүтээгдэхүүний өртгийг нэмж чансаажуулах үг нь дорвитой л сонсогдох. Нэг үгээр хэлбэл, Баян-Өлгий аймгаас өмнө сонгогдож асан гишүүдээс аль ч агуулгаараа жинтэйхэн төрийн түшээ мөн шигээр ойлгогдож, гишүүний хэв шинж бүрдэж байх шиг байна.
Парламентын дөрвөн жил гэдэг ч бага хугацаа биш л дээ. Энэ хугацаанд хэлд орохгүй дараагийн сонгуультой залгагсдыг бодвол Т.Аубакир нэгэнт төрийн түшээ, Их хурлын гишүүн шиг гишүүн болчихсоныг зөвшөөрцгөөх биз. Зөвшөөрцгөөхөөс өмнө зөвшөөрөгдөх нь л дийлж байх учиртай л даа. Асгатын мөнгөний орд гэж бий. Мөн ч олон жил ярьж байна. Манай орны эдийн засгийн нэг том үүц.
Т.Аубакир энэ төслийг хөдөлгөхөд тун дориун анхаарч байгааг хүмүүс хэлэх юм билээ. Газарзүйн байршил, дотоод гадаад улс төр гээд энэ ордыг хөдөлгөх амаргүй. Төрийн ордны тулхыг баригсад саяхан Засгийн газарт Асгатын мөнгөний ордыг хөдөлгөхтэй холбогдсон тун урагштай шийдвэр албажил гарсаныг “Энэ залуу чинь харин хөдөлгөх нь дээ” гэж хэлэлцсэн дуулдах. Асгатын мөнгөний ордоо хөдөлгөөд, эдийн засагт эргэлдүүлбэл аятай нь дамжиггүй.
Тилеуханы Аубакир гишүүн хэн бэ гэдгийг энэ төслийн хувь заяа харуулна. Сэлэнгэд төрж өссөн, Баян-Өлгийн уугуул энэ залуу гишүүн нэр төрөө хамгаалах шаардлага бодитой гарч дээ. Нөгөөтэйгүүр Даянгийн боомт гэж бий. Бас л чухал гарц. Энэ чиглэлд дэд бүтэц, замын асуудал амаргүй. Т.Аубакир нар бас ажиллаж байгаа л гэж сонсогдсон.
Баян-Өлгий аймаг бол манай улсын аялал жуулчлалын чухал бүс нутаг. Эдийн засгийн олон боломжууд харагддаг. Тариа будаа тарьж бизнест хөрвөжсөн, хил гаалиа мэдэх гишүүн Т.Аубакир Баян-Өлгий аймгийн хэтийн хөгжлийг том зурж байгаа байх аа, бодлого, хөтөлбөрийн агуулгаар. Харьцангуй нэр цэвэр хүн шиг мэдэгддэг. Хэлж ярих нь цэгцтэй, тэр хэрээрээ үйлс ажил нь эмхэрч байдаг хүн бололтой.
Тилеуханы Аубакир гишүүн, УИХ дахь гишүүдээ илүү манлайлж ажиллаасай. Мах, арьс шир, түүхий эдийг үнэ цэнтэй үйлдвэрлэл болгох талаар бодлогын дорвитой үр дүн гаргаасай. Ялангуяа хөдөө аж ахуй, газар тариалангийн салбарт Монгол Улс илүү их экспортлогч болох боломжийг бодлогын хувьд эрх зүйн орчинг нь бүрдүүлээсэй. Мөн түүнчлэн хувийн хэвшлийнхэний үнэмлэхүй ажиллах боломжийг, төрийн оролцоог хазаарлах замаар илүү их нэмэгдүүлээсэй гэж хүсмээр. За тэгээд, Асгат, Даяндаа хөрөнгө оруулалт татахад Засгийн газар, “Эрдэнэс Монгол””-доо зам жимийг илүү их нээчихбэл догь байна аа.
Үг яриа бус, үйлдэл л нотолдгийг Тилеуханы Аубакир үзүүлэх хэрэгтэй ээ. Тэгж гэмээнэ Баян-Өлгийнхөндөө, парламентдаа цолгорно.
Б.БАЯР
Амлалт.мн