Хөгжлийн банкны захирал гэж богинохон хугацаанд ажиллаад, төдөлгүй УИХ-ын гишүүн болсон. Удамтай, том сэхээтний үр удам. Монголын соён гийгүүлэгч өвөөтэй. Аав нь гадаад яамны нэртэй ажилтан, дипломатч байв. Сонгуулийн өмнө Ренчин өвөөгөө яриад л, Г.Аюурзана зохиолчтой телевизээр харагдах мэтийн сурталчилгаатай, нилээд эрхэмсэг хүн байв.

Гэтэл сонгуулийн сурталчилгааны үеэр давхар иргэншилтэй, өмнө хойнын эхнэртэй гээд мэдээлэгдсэн. За энэ ч хүний л амьдрал. Хамгийн сонирхолтой нь, эрхэмсэг төрхтэй, Хөгжлийн банкны захирал, хөгжүүлэх үйлстэй явсан энэ эрхэм Х.Ганхуяг нартай хамааралтайгаар, мөнөөх Хөгжлийн банкнаасаа эрх ашгийн хамаарал үүсгэн, 33 тэрбумын зээлийн асуудалд холбоотойгоор нэрлэгдсэн. УИХ -ын гишүүн ч болсон. Энэ гурван жилд аанай л энэ асуудалтайгаа “зууралдаастай” л явж байна.

Бараг хоёр сар үргэлжилж байгаа Хөгжлийн банкны булхай бугшааны асуудлыг шийдвэрлэх шүүх хуралд очиж зогсоод, мэдүүлэг өгч байгаа нь гарч байна лээ. Ингэж гоё шарк, хүүхэд залууст үлгэр, дүр төрхийн шинэ хандлага үүсгэгчээр ойлгогдож байсан Г.Амартүвшин таагүйхэн дүр төрхтэй, хэл ам дагуулсан УИХ-ын гишүүн байсаар, дөрөв дэх жилдээ явж байна.

Уг нь Г.Амартүвшингийн харагдуулсан дүр төрх, хүлээлт нь нийгмээс шинэ гялбаа, хөгжил, улс оронд өнгөтэй өөдтэй залуу тэмүүллийг бадраагч, өөрөө үлгэрлэгч байхаар эхлээд ойлгогдсон байсан ч, уг гишүүний таагүйтэй холбогдсоноос үүдээд нийгмийн үнэлэмж, бусад олон агуулгаар энэ хүн зүгээр л дулимаг нэр нүүрт нэгэн болж орхижээ.

Г.Амартүвшин угтаа зарчим ярьж, хөгжил дэвшлийн хуулиудад манлайлал үзүүлж, Монголын нийгэмд шинэ дэвшилтэт хэв загварыг илэрхийлэгч дүр төрхтөн, хууль тогтоогч байх байлаа. Гэвч энэ хүлээлтийн яг эсрэгээр нийгэмд ойлгогдон, тэр ойлголт нь хавтгайрлаа. Манай хууль тогтоогчид ингэж үнэ цэнгүйдэх нь л ард түмний итгэл урмыг хугалж, энэ хэрээр төрөө эс хүндэтгэх, парламентын нэр хүндийг бүдгэрүүлж байгаа юм.

Мэдээж, түүнд итгэл хүлээлгэсэн нам, намын удирдлагууд эдүгээ ямархан үнэлгээтэй байгааг тааж ядах юмгүй. Ардын намын нэр хүнд унасан нь, дөчин дөрвөн их наядын нүүрсний хулгай, Хөгжлийн банкны зээлтэй холбоотой булхайнаас бүрэн эхтэй.

Г.Амартүвшин энэ нэр хүндгүйдэх шалтгаануудад анхнаасаа нэр зоолттой явснаараа намынхаа нэр хүндэд “шан харамж” болж байгаа юм. Сайн бус замаар, салгуухан явж энэ хүрлээ. Эдүгээ түүнд хуулийн өмнө хариуцлага хүлээж, мөн УИХ-ын гишүүний замаас салах явдал чухал болсон. Харин тэр нэг үгийг шинэ хууль тогтоогчдод, нийгэмд хэлбэл сайн.

Тэр нь төрд өөрийгөө бэлтгэгдсэн гэж үзэж байгаа бол, хувийн ашиг сонирхол, төрийн зарчимтай эс нийцэх бүхэнтэй эхнээсээ, улс төрд орох шийдвэрийг гаргахаасаа өмнө бүх талаар нягтлал хийгээрэй гэж хэлбэл зохино. Ийм үг л хэлж чадвал түүний том “цагаатгал” болох талтай.

Б.БАЯР

Амлалт.мн