Саяхан л улс төрийн илтгэлээ тавих гээд, амьсгааны зөв хуваарилалтгүй, дуу хоолой дээд доод өнгө “алдсан” нэг аймгийн дарга байгаад УИХ-д гараад ирсэн. Эрдэнэтчүүд харин ч “оцойтол” санал өгсөн байх. Ц. Нямдоржийг сураггүй хаяад Н. Алтанхуяг, босоо Ганбаа хоёрыг дагуулаад гараад ирсэн нөхөр. Архангайн хүн. Чимэддоржийн Ганзоригийг Эрдэнэтийн босс хийж, эзэрхэж явах үеэс түүнийг дагалдсан л залуусын нэг шиг билээ.
Намын чигийн ажилд л их гүйж явсаар аймаг толгойлж, улмаар УИХ-д ороод ирсэн. Баахан бярдуу, бас нударга шуу том яваа биз, Эрдэнэт чигт нэг биш зодоон цохион хийчихдэг л маягийн хүн дуулддаг байсныг хэвлэл мэдээлэл сануулах байх. УИХ-д орж ирээд жигтэйхэн турсан байна лээ, эрүүл хоол, элдэв бусаар домноо юм болов уу. Тун тийм нарийхан, урьдын Лутаас бага юм үлдсэн харагддаг.
За тэр бие бялдар яах вэ, урьдын Лут уг тархин дээрээ л хууль тогтоогчийн арвай нэмж байвал тарган туранхайн чанар ёстой алга. Лавтайяа, сүүлд жендерийн асуудал дээр тун мэдрэмжтэй, хуучин ханагаруудын дэргэд эвлэг зөв л дуугарч, эрх , хууль тогтоогчоо хэрэгжүүлж байна лээ. Зөв шүү дээ. Тиймэрхүү мэдрэмжтэй байж л урагшилна.
Үйлдвэржилтийн байнгын хорооны идэвхтэй гишүүний нэг байх. Үйлдвэртэй аймгаас сонгогдсон хүн тэгмээр. Тэр битгий хэл үйлдвэртэй байх тухай үргэлж сануулж зогсоход буруугүй. Улс төрийн дорвитой манлайлал эс үзүүлэх. Хөгжлийн банкны сонсголын нэг гишүүн байсан байх. Идэвхтэй л сууж харагдсан. Хүмүүсийг өрөвдөөд байдаг юм уу, яршиг түвэг гэсэн юм болов уу, доошоо харсхийж, дөлсхийж суусаар сонсголыг өндөрлүүлчих шиг анзаарагдсан. УИХ-д орж, улс төрч болж яваа бол хандлага төдийгөөр бус, харизмаар, халбайсан, данайсан улс төрөөр л илүү урагшилна л даа.
Харин Дамбын Батлут ингэж чадах уу гэдэг асуулттай байсаар байна. Гурван жил УИХ-д суулаа. Д. Батлутын гэх даамай хаягтай, улс төрийн шийдвэр, хууль тогтоогчийн манлайлал эс үзэгдэв гэхэд, тиймгүй ээ, Батлутыг маань бүдгэрүүллээ гэх хүн нэг их гарахгүй л байх. Харин нэг сайн тал түүнд байдаг гэх. Тэр нь ажлын бус өдрүүдээр бол ерөөсөө л Эрдэнэтдээ байж байдаг гэх. Нэг үгээр хэлбэл тойргоо үргэлж “манаатай”, додомдон, хамт байгаагаа илэрхийлдэг гэх. Тойрогтоо, сонгогчидтойгоо хамт байна гэдэг бол газар зүйн байршлаас илүү, тэдний эрх ашигт хамт, тэдний төлөө хууль тогтоогчийн өндөр шийдвэр манлайллаар хамт байх л явдал билээ л, угтаа. Дамбын Батлут ингэж явсаар нэгмөсөн тойрогтоо очиж “шингэх” юм уу, тойрогтоо дахин ялж УИХ-даа ирэх юм уу, Эрдэнэтийнхний л мэдэх хэрэг байх даа.
Б.БАЯР
Amlalt.mn
