Гонгорын Дамдинням буруу юм ярьсангүй. Ард түмний эрх ашгийг нухчин дарсан “Авлигал” хорооллынхонд хариуцлага тооцъё гэдэг түүний үгтэй ард түмэн хамт байгаа. Улсаараа усанд живсний буруутанд “ял оноох” хэнд ч ойлгомжтой. Гэтэл мөнөөх “Авлигал” хорооллын эзэн гэх А.Амарбаясгалан гэдэг хүн гарч ирээд шууд агсарлаа. Г. Дамдиннямыг шууд буруутгалаа. Боловсролгүй байна гэлээ.
Биднийг авлигач гэлээ, хэнд авлига өгсөн юм хэлээдэх гэх юм хэллээ. Бас миний ард улс төр, улс төрийн мөнгө санга юу ч байхгүй. Бид авлигагүй, ерөөсөө тунгалаг бизнесчид гэж хэллээ. Харин хэдэн хамтрагч байгаа гэлээ.
Одоо Г. Дамдинням гишүүн “үзээд” байх хэрэгтэй. Тэгвэл жинхэнэ баатар болно. Тэд энэ бизнесийг хийхдээ үнэхээр авлигажаагүй юу. Хэн энэ хүмүүст үйлчилж усан паркийг хороолол болгосон. Хэн хэнтэй хамтардаг. Ямар хөрөнгө оруулалтыг татаж үүнийгээ барьсан. Яагаад үндэстнийхээ эсрэг ингэж хөдлөв. Яагаад олон нийтээ бодсонгүй вэ. Яагаад Монголын, монголчуудын эрх ашгаас зөрөв. Одоо та бүхний энэ хөрөнгө оруулалт үндэсний эрх ашгаас давах ёсгүй. Ингэхээр нураахаас өөрцгүй. Та нар ингэхээр ямархуу эрсдэлд орж, хэрхэн шатах вэ. Ингэсний хариуцлагыг тань хэн хүлээх вэ. Хамтрагчид тань уу. Үнэхээр улс төр, авлига байхгүй гэдэг чинь үүгээр харагдана. Танай хорооллоос болж сүйдсэн олны хохирлыг та бүхэн барагдуулах уу гээд маш олон асуулт байна.
Тэр А.Амарбаясгалан гэдэг хүн Г.Дамдиннямтай үнэхээр үзээд дийлэх нь үү. Үнэхээр дийлдэхгүй тунгалаг хүн үү. Ингээд хармаар маш их зүйл байна. Ингээд энэ хоёр хүнийг сөргөлцүүлээд, хэлэлцүүлээд байхад “Дамдинням ба Авлига хороолол” гэдэг нийгмийн маш том нээлттэй хэлэлцүүлэг өрнөж, тэр хэрээр бид бүх буруутныг олж болно. Олох ч ёстой. Үүнтэй яг адил асуудал байна.
Тэр бол “S Outlets” гэдэг дэлгүүр. Энэ дэлгүүрийнхнээс Г. Дамдинням яг А.Амарбаясгалангаас асуусан шиг бүгдийг асуух ёстой. Танай дэлгүүр яагаад энд ард түмний эрх ашгийн эсрэг байршилд баригдав. Өвөрмонгол эзэдтэй гэнэ, үнэн үү. Эзэд нь халх эхнэртэй гэнэ, үнэн үү. Ямар хүүхнүүд тэгж Өвөрмонгол эрстэй нийлж ингэв. Эмээлт чиглэлд бас их бизнес, хүнд машин механизмын бизнестэй нь үнэн үү. Та нар бас тунгалаг уу. Авлигажаагүй юу. Улс төрийнхөнтэй холбоогүй юу гээд маш олон асуулт байна. Хариулт авч чадвал ард түмэн шүүнэ.
Г.Дамдиннямд амжилт хүсье. Хэлэлцүүлэг, халз ярилцлагаа даруй тогтон ажлаа эхлүүлнэ үү. Нийт ард түмний эрх ашиг тул УИХ-ын гишүүн та хором ч ухарч болохгүй. Дарханыг энэ зундаа март.
Б.БАЯР
Amlalt.mn
