Монгол орон маань найр наадмын уур амьсагалаар бялхаж байна. Зуны адаг сар гараад нилээд хижээлдчихлээ. Манайхан ер тоож байгаа юм алга. Сумдын зуун жил гээд л гоодсон улс мөн ч манаргаж байна даа.
Тэмдэглэлгүй л яахав. Гэхдээ ажил төрлөө бодохгүй бол болохоо байх нь дээ. Энэ долоо хоног дамнаад тавын таван аймгийн зуун жилийн ой болно гээд машин шилж, дээл баадагнасан улс даяар дүүрэн. Одоо нааддаг л байх даа.
Залгуулаад хүрээ даншиг болно гээд л зарлаастай. Хотоор дүүрэн бороо. Үер ус ч замаа алдлаа. Хаа сайгүй үер усны асуудал. Эд хөрөнгө, тав тух, стандарт орчин гээд олон зүйлээр ард иргэд хохироостой. Тоож байгаа хүн алга шиг. Нүүдэлчдийн амьдралаас хотынход шилжээд бас ч гэж он жилүүд үзсэн ч манай үндэстэний угаас “зэрлэгдүү” шинж чанар ер арилж өгөхгүй нь гачлантай. Энэ зуны нэг сайн мэдээ бол жуулчин гийчин их.
Энэ нь Засгийн газраас зарласан аялалын жуулчлалын жил гэсэнтэй бас ч дүйн байгаа нь сайшаалтай. Эх орны үзэсгэлэн, энүүхэндээ гэхэд атар Монголыг үзэх гэсэн ертөнцийн хүмүүсийн хүсэл л юм л даа. Яахав хөөрхийг, ядруу эдийн засагт бас ч хөөрхөн орлого, мөнгө эргэх нөхцөл болж байгаад залбирахаас аргагүй.
Гэтэл түвэгтэй асуудал их байна аа. Улаанбаатарт цахилгаан тасрах ердийн боллоо. Гадаад эх үүсвэр нь мэдэгдэхгүй хааж байна гэх. Гадаадаас хамаарахгүй л байх ёстой юм л даа, улс юм бол. 100 жилээ тэмдэглэж байгаа сумууд Завханы Их-Уулаас эхлээд харанхуй зуун жилээ тэмдэглэж байгааг иргэд халаглан бичиж байна.
Бие засах газрын асуудал аанай л мундраатай. Аялал жуулчлал сэргэх төлөв үзэгдэж буй энэ жил Монгол нолийн асуудлаа шийдчихжээ гэдэг мессежийг дэлхийд өгсөн бол хамгийн чухал нь тэр байлаа. Солонгосын хэдэн загварч охид ирэв ээ дээ. Хээр задгай бие засах аятайхан юм хэмээн мушийсан харагдана лээ.
Аялал жуулчлалын сайд Б.Бат-Эрдэнэ Тэрэлж рүү явахдаа анхаарна уу гээд цаг уурын асуудлыг ярьж, бичиж байна. Буруу алга. Б.Бат-Эрдэнэ гол нь нолийг л нэгмөсөн шийдвэл болох нь жинхэнэ тэр. Манай Түлш, эрчим хүчний сайд баруунтаа Алтанхөхийг тахинхан яваа үзэгдэх. Яахаараа ч Засгийнхан уул овоо тахих ажил хийдэг юм ойлгомжгүй. Хоёр гурваараа яваа үзэгдэх.
Алтанхөхийг Засгийн сайд тахивал Эрдэнэбүрэнгийн станц хөдөлнө гэж арай буулга буусан баймааргүй. Б.Чойжилсүрэн сайд уулнаас С.Бямбацогтыгоо дагуулан бууж ирээд эрчим хүч, зам тээврээ бодохгүй бол болохоо байлаа шүү дээ. Өвөл мөд болно. Аанай л утаагаа, угаараа салхиндаа найдаж, станц зогсчихвий гэдэг айдаст цаг руугаа бид дөхөж байна шүү дээ. Ажлаа бодсон нь дээр. Ганц ч станц барьчихгүй л яваад байна.
Н.Алтанхуяг харин өргөтгөх, тэлэх ажил жаахан хийсэн байх. Саяхан манай УИХ, Засгийн газрын гишүүдийн хөрөнгө орлого хэрхэн өссөн, тэр дундаа Засгийн долоон гишүүнийх үнэмлэхүй өссөн тухай мэдээлсэн байна лээ. Зүгээр, ил өнгийн Монголын сайд нарын хөрөнгө орлогыг харахад аль ч сайд 50 мегаваттын станц барьчихаар хөрөнгөтнүүд, долларын саятанууд байгаа үзэгддэг. Б.Чойжилсүрэн, Ж.Ганбаатараас эхлээд л.
Гэтэл хэн нь ч тэгдэггүй. Мөн Засгийн чиглэлээрээ ч барьдаггүй. Тэлмэн, Багануур, Бөөрөлжүүт гээд станциудыг барьдаггүй, “бариулдаггүй”. Өөрсдийн нь хөрөнгө нийслэлийг даахааргүй арвижсаар. Ийм л хачин яваад байгаа нийгэм, төрийн зүтгэлтнүүдтэй.
Хэний хүүхэн өсөж вэ гэж арай явдаггүй байлгүй. Өндөр овоонд гарч, хэний айраг исэж вэ гэж шилж яваа Монголын сайдуудаа ганц станц бариач ээ. Өвөл айсуй...
З.БАЯР
Amlalt.mn
