Дөрвөн хүний амь авч, өчнөөн хүний эд хөрөнгө сүйтгэсэн энэ үер хэлж ирсэн. Сануулж ирсэн. Сарын өмнө, наадмын өмнө сануулгаа өгсөн. Монголын дарга нар ханцуй шамлан, харамсаж халаглан үерийн голомтоор хэд алхсанаас өөрөөр юу ч хийсэнгүй гэхэд болно.
Наадмын өмнө яав, үер болсон, Олон улсын хөрөнгө оруулалтын чуулган болсон, гаднын өндөр дээд зочид ирсэн, бүх ард түмнээрээ, нийслэлээрээ зам дээрээ гацаж, уур цахал болсон. Наадам гэдэг бүхнийг мартуулахын цэнгэл болоод, бүгдээр эх орноороо тарж одсон. Эдүгээ ч таран одоцгоосон, наадамласаар.
Харин хэлээд, сануулаад байсан үер том багаар үргэлжилж, уржигдар дөрвөн хүний амийг авлаа. Ийм харалган удирдагчид гэж байх уу. Д.Сумъяабазарыг өмөөрөх төлөв их харагдах.
Гучин жилийн гажуудал шүү гээд л. Тэр нь үнэн. Нийслэлд тийм л элэггүй, авлигачид удирдан 30 жил болоод, энэ хотыг Улаанбаатар бус, ухнанбаатар болгосныг ард түмэн зовлонгоороо харж, мэдэрч байна.
Д.Сумъяабазар энэ бүхэнтэй тэмцэх гэж, ажил хийх гэж, иргэдээ ингэж тамлахгүй гэж томилогдоо биз дээ. Нийслэлийн Иргэдийн хурал нь тэгж ам тангаргийг нь авч, УИХ-ын гишүүн болчихсон байсан улсын аварга Д.Сумъяабазарыг хотын дарга болгосон. Гучин жилийн гажуудал нь үнээн. Гучин жилийн гажуудлаа Д.Сумъяабазарыг засахаас эхлэх ёстой. Хариуцлага тооцож, халж эхлэх ёстой.
Нийслэлийн хурлын дөчин таван “амьсгаа” томилсон энэ хүнээ ажиллуулж чадахгүй юм бол, ажилладгийг нь олж тавихаас ажил, хариуцлага нэхэгдэх ёстой.
Ж.Батбаясгалан гэдэг нөхөр үүнийг хийх ёстой. Алтайн наадамд алхаж явна билээ шүү дээ. Ажлаа хий л дээ. Б.Сүхбаатар гээд хот байгуулалт, дэд бүтцийн хороо ахлагчаа дагуулаад наадамлаад явж байна лээ шүү дээ.
Тэр Б.Сүхбаатар нь ажлаа хий л дээ. Д.Сумъяабазартайгаа ажилла л даа. Баянзүрхээс сонгогдсон их улс төрч Б.Энхбаяр, Б.Саранчимэг, Х.Булгантуяа, Э.Бат-Амгалан нар нь ажилла л даа. Далан барина гэж амлацгаасан улс шиг байна лээ. Даланг ард түмэн бариад, чадах ядахаараа зүтгээд, манай хот элсэн ууттай далангаар бүрэгдчихсэн, эзлэгдсэн хотын дайчдын хориглолт шиг л байгаа шүү дээ. Даан ч дээ гэмээр.
Үер болохоор дарга нар нь хөмсгөө атиралдуулж алхан, зураг заан, нэг л их ажил шийдлийн дүр үзүүлэвч, хэрэг дээрээ юу ч хийхгүй байна. Хэвлэлд ярилцлага өгөхдөө нөхцөл байдал амаргүй байна, бид ажиллаж байна, төлөвлөж байна гэцгээн газрын зураг дэлгээ сүртэй зургаа сошиалд оруулцгаах юм.
Угтаа дарга нар гудамжаар явж ингэ тэг гэж заавар өгөх биш, мэргэжлийн инженерүүдийн гаргасан төлөвлөгөөг та дарга нар хэрэгжүүлэх ёстой. Дэлхийн жишиг ч тийм. Манай инженерүүд бардаггүй юм бол хотын үер усны асуудлуудыг шийддэг бусад улс орны усны мэргэжилтэн хүмүүсийг урьж ажиллуулаач ээ.
Ингээд хэсэгхэн л орсон борооны үерт иргэд дөрөв дөрвөөр нь сор залаад суугаад байх юм уу. Монголын дарга нар ич, төрөөс зайл. Ингэж ард түмнийхээ амиар суудалд суу гэж та нарыг залаагүй байх.
Энэ ард түмнээ дэндүү басамжлан дээрэлхэж, хариуцлагагүйгээр энэ улс, хотыг удирдаж байгаадаа яагаад ичдэггүй юм бэ. Та нарын нэг нь ч дөрвөн иргэний амийг алдсаны төлөө хариуцлага хүлээж, огцорч чадахгүй байна шүү дээ. Үнэн байдал нь ийм. Үйлийн үр гэж байдаг гэдэг. Үйлийн үр эрх баригчид, төр засгийг, хотыг толгойлогчдод ирэх нь тодорхой биз ээ. Энэ хотыг, улсыг удирдаж чадахгүй байгаа чинь тодорхой байна.
Үүнийг хүний амь хэлээд байна. Хотоо, улсаа удирд аа, эрх баригчид аа, хотын дарга нар аа, Д.Сумъяабазар аа, Ж.Батбаясгалаан.
Б.БАЯР
Amlalt.mn
