Баттогтохын Чойжилсүрэн 177.5 тэрбум төгрөгөөр урдаас хагас коксжссон нүүрс авч энэ өвлийг давах юм гэнэ. Урагшаа гаргаж байгаа, экспортын ганц бүтээгдэхүүнээ урд нэмүү өртөг шингүүлээд тэгээд буцааж авах юм гэнэ.
Тэгээд нийслэлийн иргэддээ түлүүлж турших юм гэнэ. Туршаад шүү. Тэрийг нь өчигдөр Нийслэлийн хурлын дөчин тав ёсчлов бололтой. Тэр хурал дээр Баянзүрхийн Н.Баярмөнх гэдэг хүн салаавч үзүүлжээ. Мораль нь энэ юм чинь, Ардын намынхны. Ард түмэн рүүгээ үзүүлж байгаа хандлага нь ийм л байгаа. Гэхдээ энэ салаавчаа Нацагийн Баярмөнх Майнбаярын Тулгат руу бус Баттогтохын Чойжилсүрэн рүү гаргах нь онох байлаа.
Б.Чойжилсүрэн туршаад гэж байгаа юм. Энэ ард түмэн дээрээ ядууруулах, туйлдуулах туршилт тань төгс явагдаад дэлхий даяар хорт өмөн гэдгээр Монгол манлайлж байна. Дэлхийд Монголын манлайлж байгаа үзүүлэлт гэдгийг Хавдар судлалын дарга нар нь байнга ярьж байгаа биз дээ. Яах гээд байдаг юм, энэ ард түмнээ.
Доромжилж, тохуурхаж ханаагүй юм уу, эрх баригчид, Засгийн гишүүд ээ. Ардын нам сүүлийн найман жил засаглаж байна. Дөчин их наядын хулгайгаас, жаран хэдэн суудалтайгаас, үг сөрсөн, үнэнийг хэлэгсдийг барьж хорьсноос өөрөөр тэргүүлэл, манлайлал байгаа юм уу, та минь ээ, ард түмэн мэдэж байна шүү дээ.
“Амлалт.мн” сайт анхнаасаа бичсэн. Энэ Засгийн аль ч сайд станц барих мөнгөтэй, хөрөнгөтэй нь хөрөнгө орлогоос нь тодорхой байна. Улсдаа барьдаггүй юм гэхэд хувьдаа бариад, улс орныхондоо эрчим хүч өгөөч ээ, үйлдвэрлэлийн үндсэн хөдөлгүүр эрчим хүч шүү гээд бид бичээд л байгаа.
177.5 тэрбумаараа коксжуулах үйлдвэр барих ёстой гээд ард түмэн бичээд байгаа чинь үнэн шүү дээ. Д.Өнөрболор гэдэг гишүүн өнгөрөгч чуулган хаахад Б.Чойжилсүрээн, битгий ингэж ард түмнээ тохуурх, уушги, эрүүл мэндийг нь бүү хордуулаа гээд хэлээд байсан.
Онож л хэлж байсан байна шүү дээ. Дов болгон нүүрс, жалга болгон алт атал Монгол улс ингэж доройтох гэж. Экспортолсон нүүрсээ эргүүлээд импортолж авах ухаан Б.Чойжилсүрэнд л төрнө, яагаад гэхээр тэр эх оронч бус, зөвхөн өөрийгөө бодно гэж иргэд цахим сүлжээнд нил дүүрэн бичиж байна.
Ерөөсөө энэ Засгийн гишүүд энэ улсын өнгөтэй өөдтэй бүхнийг тонож, улсаасаа баян атлаа улсдаа, иргэддээ үлэмжийн ээлгүй байгаа нь тод үнэн. Уулын ам болгонд байшин барьж байгаа биз дээ, би ч барина гээд л Засгийн гишүүд уралдаад л бариад байгаа.
Уул уурхайн Ж.Ганбаатар нь манлайлаад л. Тэрбум тэрбумын хаусууд. Т.Аюурсайханаас эхлээд асуудал нь шүүх дээр яваа байх аа. Б.Чойжилсүрэн гэхэд Зайсангийн аманд одоо хорин хэдэн давхраар нь овоолж байна.
Эмүжин бичээд л байгаа. Монгол улсын Засгийн газар Б.Чойжилсүрэнгийн энэхүү 177 тэрбумаар нүүрс авч байгаа үйлдлийг даруй залруулан эерүүлэхгүй бол, энэ сайдын тань хэлсэн үг, хийсэн үйлдэл ард түмэн, эх орны эсрэг бүхий л агуулгаараа байгааг танхимаараа ярьж, шийдээ зөв гаргахгүй бол бүрэн бүрэлдэхүүнээрээ огцорсон нь онох тун дамжиггүй болж.
Д.Сумъяабазарыг иргэд огцруулах санал асуулга явуулаад, тэр нь гэрлийн хурдаар өрнөж байна. Энэ хүн угаасаа тэртээ тэргүй иргэдийн сэтгэл санаанд огцроод удаж байгаа. Харалган эрх мэдэлтүүд байлгаад байгаа болохоос бус.
Үүнийг шийдэх учиртай Ж.Батбаясгалан гэдэг дарга байдаг. Түүний удирдсан дөчин таван хүн Д.Сумъяабазарынхаа хийснийг зөв ч гэдэггүй, буруу ч гэдэггүй. Ард түмэн ажиллаж чадахгүй байна гээд өчнөөн хэллээ. Ж.Батбаясгалангийн танхим хараад, үзээд байгаа мөртөө таг. Ийм л байдалтай эх орныг удирдаж байна даа.
Б.БАЯР
Amlalt.mn
