Хар гэрт суугаа олимпын аварга Н.Түвшинбаярыг өөршөөж уучлаасай гэж нэг иргэн бичжээ. Гэхдээ энэ иргэн нь Худалдаа аж үйлдвэрийн танхимын удирдлага О.Амартүвшин юм байна. Отгондаваагийн Амартүвшиний эл үйлдлийг олон түмэн машид шүүмжилж байна.
Найдангийн Түвшинбаяр олимпын аварга болж монголчуудыг баясгасан нь үнэн. Аа, бас найз Э.Энхбатыгаа егүүтгэсэн нь ч үнэн. Эрдэнэбилэгийн Энхбат гэдэг залуу өв тэгш эр хүн байсан. Олон түмэн хэлээд байдаг. Олимпын аварга болтол нь түшсэн андыгаа аминдаа хүрнэ чинээ тэр сайхан залуу бодоогүй байх. Энэ залуугийн үхэл, үхэлд хүргэсэн хүн хоёр Монголын эмгэнэл болсон.
Алдар нэрийн донд ухаанаа ууж, улс төрчдийн ухваргүй зам аваргыг эвдэж, ямар ч ялгүй бүгдийг дийлнэ гэдэг тэнэглэлийг даамжруулж ийм байдалд хүргэсэн. Ямартаа л Булган нутгийн хүн атлаа Баянхонгорт нэр дэвшин ялагдаж байх вэ дээ. Олимпын аварга болсон хүн Их хурлын гишүүн болж яах ч гэсэн юм. Ингээд л буруудаад эхэлсэн. Женко гэдэг хүнийг л дагаж явсан даа.
Найдангийн Түвшинбаяр Монголын залуусыг ингэж болдоггүй юм, ингэж хэтийдэн буруу явснаар ингэж хохирдог гэдэг үлгэрээр хуулиас ноогдуулсныг үүрч ард түмэн, зон олондоо үзүүлэх нь хаа хаанаа ононо гэж иргэд ярьж байна. Энэ үнэн . Тэр хүн тэгж болдоггүй юмаа гэдгийн жишээнд энэ ард түмний залуусын ухаарал сэрэмжийн дэнс болж оногдсон ялаа үүрэх ёстой байх. Монголын ард түмэн түүнийг өргөмжлөн дээдэлж Чингисийн одон, Хөдөлмөрийн баатраа өгч гавьяаг нь үнэлсэн. Монголд бөхчүүдийн “явдал” үргэлжлээд л байгаа.
Иргэн Төмөрбаатарын Амарзаяа хотын дарга Долгорсүрэнгийн Сумъяабазарыг огцруулах санал асуулгыг явуулж, арван найман мянган иргэн огцруулах санал өгч гарын үсгээ зуржээ. Эл дүгнэлт саналыг албажуулж Засгийн газрын бичиг хэрэгт буюу албан журмаар хүргүүлжээ.
Засаг хэрхэхийг харах иргэд олон нийтэд тун сонин байна. Ажиглаж байна. Д.Түвшинбаяр нэг хүний амь егүүтгээд , түүнийг уучилна уу гэсэн иргэнд нийтээр үгүй ээ гэж хариулж. Тэгвэл дөрвөн хүний амь удирдсан талбарт нь үрэгдсэн хотын даргыг арван найман мянгаараа огцруулъя гэж байгааг Хөвсгөлд яваа Д.Амарбаясгалан хэрхэн авч үзэхийг Монголын иргэд ажиглаж байна. Эрдэнэт хотоор дайраад, Эрдэнэтэд ажилласан мэт ч Хөвсгөлд улс төр хийж яваа Д.Амарбаясгалан үтэр ирж, Д.Сумъяабазараа хэрхэн шийдэхээ олон түмэндээ мэдээлж, үйлдэл хийх нь зөв юм.
Дэргэдээ байгаа, эмхэлж журамласан Төрийн хяналтыг биелүүлэх агентлагийн Б.Баасандоржийг ажиллуулах хэрэгтэй. Иргэн Т.Амарзаяагийн Д.Сумъяабазарыг огцруулах асуудал Нийслэлийн хурлын дарга Жанцангийн Батбаясгаланд хаяглагдан мөн хамаарч байгаа. Энэ яг зөв. Ж.Батбаясгалан үүнийг шийдэх учиртай. Иргэдийн санал хүсэлтэд ямар нэг байдлаар хариулах ёстой. Ж.Батбаясгалан, Д.Амарбаясгалан хоёр Д.Сумъяабазарыг хамгаалах нь уу, хариуцлага ноогдуулах нь уу гэдэг асуудлын гол гогцоо нь үерт эндсэн дөрвөн иргэний амь насны асуудал юм.
Энэ бол баясгалантай асуудал огт бус шүү. Далан шуудуу барина гэж амлаад түмнээр нэг ичгүүр болж байгаа шударга Б.Энхбаяр, Б.Саранчимэг, Х.Булгантуяа, Э.Бат-Амгалан нар ч энэ асуудлаар байр сууриа илэрхийлж, ард түмэнд үгээ хэлэх хэрэгтэй.
Б.БАЯР
Amlalt.mn
