Монгол Улсын Ерөнхийлөгч асангууд энэ зун янз янзын л зан үйлтэй байна. П.Очирбат, Н.Багабанди хоёр Завхан аймгийнхаа зуун жилийн ойд оролцож, баярын парадад машинаар явав. Иргэд олон сайн муу, янз янзаар л хэлэв.
Таагүй нь хоёулаа дараалан Ерөнхийлөгч хийсэн атлаа Завханаа олигтой хөгжүүлээгүй гэдэг асуудлаар ээрэгдэж байгаа байдал ихээхэн ажиглагдсан. Завхан өөрөө сайхан нутаг. Завханы шинэ Засаг дарга Г.Өнөрбаяр харин Завханаа жаахан өөд татахаар шулуудсан нь харагдаад байна.
Ерөнхийлөгч асан Н.Энхбаяр энэ зун Румын, Энэтхэгт зочлоод, харин ч нэг соён гийгүүлэгч төрхөөр харагдаад байна.
Горькийн сургууль төгссөн, сонгодогуудыг уншиж, “Сохруудын орон”-г орчуулсан тэрбээр энэ мэт байх нь чухам сайхан. Хүү Э.Батшугарыгаа гишүүн болгосноос хойш улс төрийн хор хордлогоос бузгай ангижирч байх шиг. Пап лам мөд ирнэ. Энд оролцоотой ажиллаж байгаа гэх.
Гурав дахь гэсэн тодотголтой яваад байдаг нь тиймхэн. Нэгэнт өгсөн албаас хойш, соён гийгүүлэгч нь л ономоор. Цахиагийн Элбэгдорж олон улсын хурал зөвлөгөөнд их явж харагдах. Укрианд ч очсон тууж явсан. Гэхдээ тун нам жимхэн байх шиг. Ардчиллын бэлгэ тэмдэг мөн л дөө. Хархоринд нийслэлийг төвлүүлэхийг эртнээс бодсон хүн.
Ц.Даваасүрэн сайдад хамгийн зөвлөмөөр хүн дээ. Дөрөв дэх Ерөнхийлөгч Х.Баттулга улсаа тойрохоор мордож байгаа гэх. Намынхаа дарга Л.Гантөмөрийн өмнө хэрээд л байгаа. Улс төрөөсөө ер холдох бодолгүй шиг байна.
Л.Гантөмөр ч олигтой байхгүй, түүний мушгиа, этээ, муриа мэхэнд өртөмтгий байхаар дулихан байна. Ард түмэн Ардчилсан намыг л өөдтэй байгаасай гэж тун их хүсэх.
Ардчилсан намынхан харин хүсэхэд хясахуйн замаар л яваад байна. Х.Баттулгатай босоо Ганбаа, Норовын Алтанхуяг нар “гарлах” төлөвтэй болчихлоо гэнэ. Энэ чинь харин Ардчилсан намыг жинхэнээсээ хуваах, Ардчилсан намын байр суурийг ирэх сонгуулиар парламентэд эзэлчих орон хүчин болчих юм биш байгаа даа.
Ажил үүргээ гүйцэтгэж байгаа Ерөнхийлөгч У.Хүрэлсүх Хөвсгөлд амрангаа ажиллаж байгаа гэж улс төрийнхөн ярьж байна. Түүнд шадарлан Засгийн болоод намын гал тогоо удирдагч Д.Амарбаясгалан яваа бололтой. Сайд Л.Энх-Амгалан ч яваа сурагтай. Тэд нүүрсний асуудлыг хэрхэн залах тухай ярьж яваа гэж дуулдаж байна. Зөв дөө.
Дөчин их наядын хулгайг нэг тийш болгож шийдэн, ард түмэнд үнэн зөв дүгнэлт хийх, хохирлыг төлүүлэх бололцоог олгохгүй бол найман жил засагласан Ардын нам ирэх сонгуульд оноо авахад нэн хүнд болсон. Дөчин их наяд төгрөг бол Хархорум хотыг босгоход мөн ч өндөр дэмтэй хөрөнгө дөө.
Б.БАЯР
Amlalt.mn
