Үйл явдлууд шил шилээ даран өрнөж эхэллээ. Миеэгомбын Энхболдыг АТГ шалгаж эхлэх гэнэ. Туул голын сав газарт газар олгожээ гээд.
Барилга орон сууцыг хүлээн авах Улсын комиссыг удирддаг С.Төмөрдулам гэдэг эмэгтэйг мөн шалгана гэнэ. Эл олгогдсон газарт “Ривер вилла” хэмээх хотхоныг баригдахад хүлээн авсан албан дарга нь энэ хатагтай байж. Энэ зуны үерийн дараагаас ийнхүү хариуцлагын “үер” явж эхлэхээр болж байх шиг байна.
Гурван тэрбумын барьцаа тавиад гадагш гарч одсон Д.Эрдэнэбилэг гэдэг хүний асуудал хүндэрч байх шиг байна. Хэрэг нь хүндэрч, хорих чигтэй болоод явчих шиг боллоо. Барьцаанд тавьсан мөнгийг улсын орлого болгох нь шиг байна.
Засгийн газрын хуралдаан дээр Ерөнхий сайд Л.Оюун-Эрдэнэ Чойжилсүрэнгийн урдаас нүүрс авна гэсэн 177 тэрбум төгрөгийг коксжих нүүрс барих үйлдвэрлэлд зарцуулахад зориулах чиглэл өгсөн тухай мэдээлж эхэллээ. Арга ч үгүй юм. Нийгмээрээ энэ зохисгүй шийдвэрийг эсэргүүцсэн.
Ер нь л нэг тийм бүхий л байдал чангараад явчихлаа. Ерөнхий сайдыг ганцаарддаг тухай мэдээлэл бүхий нийтэд гарч эхэллээ. Цаг үеийн болохгүйтэй тэмцэгч бүр л ингэдэг хойно доо. Үнэн байх. Э.Бат-Үүл, Г.Мөнхбаяр гэдэг хотын дарга асан хоёр нөхрийг бас шалгаад эхэлж.
Энэ зун хотыг харлуулсан “S Outlets”, “Авлига” хорооллын газрыг энэ хоёр хүн олгон шийтгэж өгсөн юм байна. Энэ үнэн бол тэгээд шалгуулахаас аргагүй. Ард түмнээрээ, нийслэлээрээ хохирсон энэ асуудлын буруутанг заавал олж, зохих шийтгэлийг ноогдуулах нь үндсэнтний эрх ашиг.
Сүхбаатарын дүүргийн ИТХ-д найман ажилласан Д.Батзориг гэдэг хүн “S Outlets”-ийн эзэн хэмээх мэдээлэл цацагдаж эхэллээ. Монгол Ардын намын хүн гэх. Цахим хөгжлийн яамны Н.Учрал өчигдөр хууль зөрчсөн байх магадтай газар олголт, хууль зөрчин баригдсан барилга байгууламжийн хүлээн авагч, эрх мэдэлтнүүдийн мэдээллийг гаргаад эхэллээ. Нээлттэй болгоод.
Олон хүн эдгээр мэдээллээр ил болох нь шиг байна. Монголын бүх баялагийн эх болсон “Эрдэнэс монгол” гэдэг компани бий. Эл компанийн захирал С.Наранцогт гэдэг хүний талаар мэдээлэл их гарч байна. Албан тушаалыг өдөр болгон шахуу сольж, ахиж энд ирсэн С.Наранцогтод ажил их байх шиг.
Татан буугдсан компаниудын ажилчдад нөхөн олговор олгох эсэх тодорхойгүй, ижил чиглэл бүхий компаниудыг эмхлээгүй, хөдөлмөрийн гэрээ хийлгүй гүйцэтгэх захирлууд ажиллуулдаг, саяхан ажлаа авсан “Монголын төмөр зам” удирдлага Б.Отгонсүхийг ажлаа өг гэж шахсан зэрэг хачин сонин мэдээллүүд С.Наранцогтод хаяглагдаж байна.
Багануурын уурхайн захирал асан Э.Номинчулуун гэдэг хүний гурван тэрбумын холбогдолтой хэрэг удахгүй шүүхээр дэнслэгдэх юм байна. Хөвсгөлд аялсан франц хүүхнүүд Чингэлтэй дүүргийн цагдаад гомдол гаргаж, хүчиндүүлсэн гэж. Булайяа. Ерөөлт гэдэг хүнтэй холбоотой мэдээлэл гарч байна.
Дөнгөж нэг сэргэж байгаа аялал жуулчлалд энэ мөн гайтай мэдээлэл биз. Энэ мэтээр манай улсад болж бүтэж байгаа зүйл нэг их харагдахгүй байх шиг. Засгийн газар ажиллаад л байна. Маш их ажиллахаас аргагүй. Энэ бүгдийг засахгүй бол урагшлахгүй. Хүрээний бузар далай гэсэн хэлц байдаг. Их хотын булай бузар их байна аа. Энэ бүхэн булайяа.
Бултаараа тэмцэж байж, эрүүл эх оронтой болно доо.
Б.БАЯР
Амлалт.мн
