Ромын папын айлчлалыг онцгой зохион байгуулах үүрэг Монголчуудад ноогдож байна. Амлалт.мн сайт нийгэмд болж байгаа сайн үйл явдлыг хөхиүлэн сайшаахдаа хамгийн эрмэлзэгч байна.
Нийгмийг гутааж байгаад мөн хамгийн буруушаагч индэртэй байна. Энэ учир өнөө жилийн зун болж байгаа Монголыг сурталчилагч үйл явдлуудад, үйлдлүүдэд хөхиүлэл хэлэхдээ ер үг дутаахгүй санаатай.
Тиймээс ч Ч.Номин, Б.Бат-Эрдэнэ нарын зарим үйлдлүүдийг таашаан урамшуулж бичиж байгаа. Ингэх ч ёстой. Монгол оронг гэрэлтүүлэгч үйл явдлуудаас гэдийвэл язгуур эрх ашигт харшлана.
Долдугаар сарын аравдаар зохион байгуулсан Хөрөнгө оруулалтын чуулган нэн чухал үйл явдал байсан. Гэвч бүх талаар тэр чухал арга хэмжээг “онцгүй” болгосон, болсон. Наадмын урдхан өдөр, Их хурлын чуулган дөнгөж завсарласан цаг, бүх ард түмнээрээ баярын бэлтгэл гээд хөлхсөн байсан, эрхэм дээд зочдын өндөр хамгаалалт зэрэгцсэн. Улаанбаатарт могой шургах зайгүй болж, бүх машин тэрэг зам дээр гацаж, Алтан тэвшийн хөндий аугаа их уур цухлын хөндий болсон. Дэндүү харамсмаар байсан.
Хөрөнгө оруулалтын чуулганыг ийм агаартай хийж болохгүй байсан. Хөрөнгө оруулалт бол баяр баясгалан. Гэтэл тийм утгагүй агаар орчинтой, нөхцөл байдалтай болгосноороо зохион байгуулагчид буруутай, ард түмнийг буруутгах ер учиргүй. Төр засгийн удирдагууд ч нэн тааруу үг хэлсэн, хөрөнгө оруулагчдыг урихаасаа илүү тэдэнд, манайд яагаад хөрөнгө оруулахгүй байгаа юм бэ гэж тунирхсан “тэнэглэлт” үгүүдийг хэлсэн. Зүй нь ийм учраас манайд хөрөнгө оруулаач та нар гэж их уринаар, нэн найрсгаар хууль эрх зүй, нийгмийн соёлын зохилдлыг нийлүүлсэн хэдхэн сайхан үг хэлэх байсан. Гэвч тэгээгүй.
Спикер Г.Занданшатар бараг УИХ-ын дэгийг л ярьсан гэхэд хилс болохооргүй, нунж дорой үгийг хэлсэн. Одоо энэхүү Ромын папыг ирэх ажлыг Монголын төрийг тэргүүлэгчид онц чухлаар хийж их орноо гоё харагдуулмаар байна Үнэт зүйлээ илүү тодоор ертөнцийн оюун санаатнуудад ойлгуулж, тунхагламаар байна.
Гадаад яам, Батмөнхийн Батцэцэг сайд, Төрийн ёслол, Энхболдын Одмөнх нар харц цавчилгүй, ямар ч алдаагүй ажиллах хэрэгтэй. Төрийн өндөр дээд албан тушаалтнууд ч бүгд цэгц, цэцийг барин энэ үйл явдалд шамдан оролцох нь зохино.
Соёлт ертөнц тэр чигээрээ Ромын папын айлчлалт өдрүүдтэй зэрэг Монголыг харна. Ромын попын айлчлал манай улсын геополитик, оюун санаа, үнэт зүйл, дархлаа, жин гээд олон зүйлийг тодотгон харуулж, ертөнц дахинд Монгол орон их өөрөөр сурталчилагдах үйл явцыг дэлхийн мэлмий сонорт тийнхүү харагдуулах учраас, тэр өдрүүдэд аливаа төрийн ажлын цалгардал, ямарваа дутагдал гаргасан хэнийг ч болов цээрлүүлэн, хариуцлага тооцох нь нэн чухал.
Тиймээс Ромын пап дэлхийд Монголыг харуулсан өдрүүдийн зохион байгуулалтыг онцгой чинад мөрдөн хэрэгжүүлэх нь нэн тустай үйл юм.
Иймд Ромын папын айлчлалыг Хөрөнгө оруулалтын чуулганы үеийнх шиг болгож хэрхэвч огт болохгүй.
Пап ламын Монгол дах айлчлалын хөтөлбөртэй ЭНД ДАРЖ танилцана уу...
Б.БАЯР
Амлалт.мн
