Нүүрсний хулгай луйвар, авлигатай холбоотой 13,8 тэрбум төгрөгийн л тогтоогдол, илрүүлэл хийсэнээ хуулийнхан хэлж байна. Тэгвэл 43 их наяд 986 тэрбумын нь хохирол, шамшигдууллыг хэзээ олох юм бэ, Монголын гарамгай мөрдөгчид, авлигатай тэмцэгчид, тагнуулчид аа.
Засгийн газар, Ч.Хүрэлбаатар, Т.Доржханд гээд олон хүн нүүрсний хулгайг эхнээс нь ярьсан. Т.Доржханд дөчин их наядын дүнтэй хулгай болохыг өнгөтөөр ярьсан. Энэ дөчин их наяд гэдэг бол бодит тоо гээд маш тодорхой ярьсаныг ард түмэн мэднэ.
Гэтэл өнөөдөр бүтэн жил тойрч байхад нүүрсний хулгайчдыг ер илрүүлэхгүй байна. Илрүүлэхийг хүсэхгүй байгаа байдал их байна гэдгийг Монголын ард түмний мэлмий, сонор харж дуулаад л байна. Эрх баригч МАН-д гэхэд нүүрсний сонсголыг явуулахгүй, явуулна гэдэг хоёр бүлэг үүсэж, энэ хагарал даамжирна гэдгээр нийтлэлүүд цувах боллоо.
Энэ бол МАН-д, эрх баригчдад л нүүрсний хулгайн эзэд байна гэдгийг тод харуулж байна. Сонгууль болоход ердөө найм, есөн сар үлдэж. МАН, эрх баригчид нүүрсний хулгайчийг олж, цээрлүүлэхгүй бол ард түмнээс санал горьдоод огтхон ч хэрэггүй. Ерөнхийдөө тэд Т.Аюурсайхан, Б.Ганхуяг гэдэг хоёр хүнд бүх асуудлыг тохоод, сонгууль өнгөртөл энэ хэргийг ээдрээгээд, мартуулахын салхинд үдэх муу санаа энэ бүх явдлын цаана нуугдаастайг харж ядах юмгүй.
Т.Аюурсайхан өөртөө нүүрсний асуудлыг тохвол, бүгдийг ярина, бүгдээрээ хамтдаа хар гэрт явна гэж хэлсэн гэдэг тухай мэдээлэгдээд л байсан. Саяхан Хөвсгөлийн уулзалт гэдэг зүйл боллоо гээд хэвлэлээр бичигдээд байна. Т.Аюурсайхан Хөвсгөлд яваагүй байгаа даа. Нүүрсний чигийн, хэрэг түвэгт орооцолдогсод Хөвсгөлөөр ихээхэн гороолсон тухай мэдээллүүд удахгүй гарах байх.
Эрдэнэс таван толгойн захирал байгаад, эгээтэй л хаан шахуу болсон байсан Б.Ганхуяг гэдэг хүн түгжигдээд жил болох гэж байна. Энэ хүн баригдаад явахдаа тэр тэрийгээ та нар бариач ээ, тийм л юм бол гэж орилсон гээд л мэдээлэгдсэн. Яригдсан. Тэр тэр гэж хэн нарыг хэлэв. Тэд нарыгаа одоо Б.Ганхуяг ярих хэрэгтэй дээ.
Хэнд үйлчилж нүүрсний асуудлыг хулгай болгож, хуулийг гишгэчсэнээ ярих нь эх орны эрх ашигт чухал. Б.Ганхуяг гэдэг хүн ганцаараа дөчин их наядыг хулгайлах ямар ч боломжгүй, Т.Аюурсайхан тэр хоёр хавсраад хавсраад алгаханыг л “цохьсон” байх, дөчин их наядынхаа. Ийм хэмжээний хулгайг хийхэд систем хэрэгтэй байх.
Систем гэдэгт бол эрх мэдэл, хамжигчид, хулгайн схем, хамгаалагсад гээд цогц бүрдэц хэрэгтэй байх. Маш тодорхой нэг зүйл ажиглагддаг, ард түмэнд. Тэр бол дөчин их наядын хулгайг хийлгэсэн “удирдагчтай”, тэр удирдагч одоо дөчин их наядын хулгайн асуудлыг дарах аяныг удирдаж байгаа гэдэг логик маш тодорхой байна шүү дээ.
Тиймээс Л.Оюун-Эрдэнэ Ерөнхий сайд ард түмнээсээ дэмжлэг эрнэ гэдэг үгийг хэлээд байгаагаар ойлгогддог. Н.Удаанжаргал гэдэг хүн гадаадад дүрвээд жил тойрлоо. Тэр хүн гадаадаас ч гэсэн асуудлыг яриасай. Эх орон, ард түмний эрх тэгш, шударга ёсны төлөө. Хэн өөрийг нь ингэж дүрвэж, орох оронгүй, оочих аягагүй явуулах хулгайн зэтгэрт хутгав гэдгийг. Хэрэв үүнийг яривал Н.Удаанжаргал эх орондоо, эзэн биедээ ял хөнгөлөх нь дамжиггүй.
Энэ, энэ учрын учир Б. Ганхуяг, Н.Удаанжаргал нар яагаад хулгайд холбогдов, тэр тусмаа дөчийн их наядын буюу урьд өмнө Монголд хэзээ ч яригдаж байгаагүй их дүнтэй хулгайд холбогдсон бэ гэдгийнхээ талаар ард түмэндээ тайлбар хийж буян болох ёстой. Мөрдөн байцаалтын нууц энэ тэр гэж байдаг.
Гэхдээ эдгээр хүмүүсээр тэр нууцыг давуулан үгийг хэлүүлэх нь Монголд тустай. Яагаад гэхээр Монголчууд хэн хулгайч, хэн нь хулгайч бусыг мэдэж авах эрхтэй. Дөчин их наяд төгрөгөөр Монгол улс нүхэн жорлонгүй болох байсан. Атомын станц барих байсан. Дулааны станциудыг өч төчнөөнийг барих байсан. Гангийн үйлдвэр барих байсан.
Газрын тос боловсруулах үйлдвэр барих байсан. Ахмадуудынхаа тэтгэвэрийг нэмэх байсан. Хүүхдийн мөнгөө нэмэх байсан. Эвдэрхий замуудаа эн тэгш болгох байсан. Их өрүүдээ төлөх байсан. Зээлжих зэрэглэлээ нэмэгдүүлэх байсан. Хөрөнгө оруулалтын орчноо дархлаах байсан.
Эдийн засгаа их, их наядаар тэлэх байсан. Энэ улсын зоноо тэжээх байсан. Валютын нөөцөө нэмэх байсан. Ийм их боломжоо алдсан тул энэ дөчин их наядын орсон нүх, гарсан гавыг Б.Ганхуяг, Н.Удаанжаргал нар яриасай. Учиг тэдэнд бий. Тиймээс нэгийг нь түгжээд удлаа, нэг нь дүрвээд удлаа.
Б.Баяр
Амлалт.мн
